Read Kaqchikel 2 Sam 15 Bible Online

2 Sam 15 - Kaqchikel bible

2 Sam 15

¹Chirij k'a ronojel re', ri Absalón xuben-el ruchojmil jun carruaje richin oyowal. Xerukanoj-el kiej, y chuqa' e kawineq lajuj aj-labal richin ye'ik'o-el chuwech ri carruaje.

²Y rija' ronojel k'a q'ij nimaq'a' yan niyakatej, y nik'oje' chuxikin ri bey ri nok-apo pa tinamit Jerusalem. Y nuk'utuj k'a chike ri winaqi' ri yeq'ax wi ye'apon rik'in ri rey richin jun ch'ojikil, o richin nuq'et-tzij pa kiwi'. Y nuk'utuj k'a chike akuchi kepe-wi. Y wi nubij chi chupan jun chike ri tzobaj richin ri Israel ri k'o pa xaman,

³jari' toq ri Absalón nubij chire chi ronojel ri nubij kan choj, y kan ruk'amon-wi richin ta nichojmirisex rik'in ri rey, jak'a xa man jun achike xtak'axan richin ri chiri'.

⁴Y ri Absalón nubij k'a chike ri winaqi' chi rija' kan nurayij chi nok jun to'onel pa ruwi' re ruwach'ulew richin chi ye'apon rik'in konojel ri k'o ch'ojikil chikikojol, y rija' kan nuq'et ta tzij pa ruwi'.

⁵Y toq k'o jun nijel-apo rik'in richin nulukuba-qa-ri' chuwech, ri Absalón nuya-apo ri ruq'a' chire, nuyek-q'anej y nutz'ubaj.

⁶Y keri' k'a xuben kik'in konojel ri winaqi' israelita ri yepe rik'in ri rey richin nikichojmirisaj xabachike na'oj. Keri' xuben ri Absalón richin utz xtz'et koma ri winaqi', y xa kan rik'in rija' xkikuquba-wi kik'u'x.

⁷Toq q'axineq chik kaji' juna', ri Absalón xubij k'a chire ri David: Nink'utuj utzil chawe richin taya-el q'ij chuwe richin yibe pan Hebrón richin ninbenya' ri nusujun chire ri Jehová.

⁸Roma yin k'o xinsuj chire ri Dios toq xik'oje' pa Guesur ri k'o pa ruwach'ulew Siria, y xinbij chi wi rija' xtuya' q'ij chuwe richin yitzolin chik pa Jerusalem, yin kan xtinsamajij, xcha'.

⁹Y ri David xuya' k'a el q'ij chire richin xbe. Y keri' ri Absalón xbe rik'in uxlanibel-k'u'x.

¹⁰K'ari' ri Absalón pan ewel xeruteq uk'uey rutzijol kik'in konojel ri winaqi' israelita richin xbekibij chi toq xtikak'axaj chi xtiq'ajan ri trompeta, jari' toq xtikibij chi ja rija' ri rey, y ja rija' ri niq'aton-tzij pan Hebrón.

¹¹Ri Absalón e ruk'uan k'a el e 200 achi'a' aj-Jerusalem. Y re achi'a' re' kan rik'in k'a ronojel kánima e beneq y man ketaman ta ri achike ruch'obonik ri Absalón.

¹²Rokik ri Absalón nusuj ri kamelabel chuwech ri Jehová, jari' toq xroyoj ri Ahitófel ri aj-Guiló, pixabanel richin ri David. Y ri yakatajinenri'il ri' kan ik'owineq chik ruwi' ri ruchuq'a', y kan e k'iy k'a ri winaqi' ri xetzeqeliben richin ri Absalón.

¹³Y k'o k'a jun ri xbeya'on rutzijol chire ri David, y xberubij chi ri tinamit Israel xkiben yan ki-rey chire ri Absalón.

¹⁴K'ari' ri David xubij chike konojel ri e tata'al ri k'a ek'o rik'in: Qojyakatej y qojanimej, roma man xqojtikir ta xtiqakol-qi' chuwech ri Absalón. Wi man xqojanimej ta, man xqojkolotej ta, y ri Absalón kan xtuben k'a janila chi kamik. Jo' chi'anin richin man yojruq'i' ta y yojruk'is roj y konojel ri winaqi' richin re tinamit, xcha'.

¹⁵Y ri e tata'al xkibij chire chi kan xtikiben ronojel ri xubij rija' chike.

¹⁶K'ari' ri David xuchop-el bey y xeruk'uaj-el ri ralk'ual y ri rixjayil. Jak'a k'a xeruya' na kan e lajuj ru-concubina richin nikichajij kan ri rachoch.

¹⁷Y toq ri David y konojel ri e beneq chirij xe'apon rik'in ri ruk'isibel jay chire ri tinamit, xepa'e-qa chiri'.

¹⁸Y konojel ri e tata'al xeq'ax k'a el chuwech. K'ari' xeq'ax ri e chajiy richin rija'. Y xeq'ax chuqa-el ri e 600 aj-labal ri e aj-Gat. Konojel re' xeq'ax-el chuwech ri David, y rija' e rutzuliben-el.

¹⁹Jak'a toq xq'ax ri Itai jun chike ri aj-Gat, ri David xubij chire: ¿Achike roma at peteneq chuqa' rat qik'in roj? Katzolin kan y kak'oje' kan rik'in ri k'ak'a' rey roma rat xa man at qawinaq ta, y nej chire ri aruwach'ulew atk'o-wi.

²⁰Rat xa k'a juba' katoqaqa wik'in. ¿Xtinben ta k'a chawe richin yabe-kela' yabe-kela' chiqij roj ri xa man qetaman ta akuchi yojbe-wi? Más utz katzolin kan, y ke'ak'uaj kan ri awinaq. Y ri Jehová xtuk'ut chawech ri rajowabal beneq ruwech y man ta xkaruya' kan, xcha'.

²¹Jak'a ri Itai xubij: Ninjikiba' nutzij chawech pa rubi' ri Dios, chi rokik at k'es rat, yin kan xkatintzeqelibej richin k'aslen o kamik. Akuchi xkak'oje-wi rat, chiri' xkik'oje-wi yin, xcha'.

²²K'ari' ri David xubij chire: Jo' k'a, y katik'o-el, xcha'. Y xik'o k'a el ri Itai, y ri ch'aqa' chik achi'a' ri e beneq rik'in, y chuqa' ri e aj pa kachoch.

²³Konojel k'a ri winaqi' ri xek'oje' kan pa tinamit janila xe'oq' rik'in janila q'axo'n, rokik xeq'ax ri David y ri ruwinaq pa ti ch'uti'n raqen-ya' Cedrón. Y rije' xeq'ax pa ruchojmilal ri tz'iran ruwach'ulew ri k'o pa relebel-q'ij.

²⁴Beneq k'a ri Sadoc ri nimalej sacerdote y ri Abiatar ri chuqa' sacerdote. Rije' e kachibilan-el ri e levita ri e uk'uayon ri káxa richin ri rujikibel-tzij ri Dios. Rije' xkiqasaj k'a qa ri káxa ri', y xk'oje' chiri' k'a toq xeq'ax na konojel ri winaqi' ri e eleneq-pe pa tinamit.

²⁵Jak'a toq ri David xuchop chik el bey, xapon k'a rik'in ri Sadoc y xuben chire chi tiberuya' kan pa tinamit ri káxa ri'. Y xubij chire: Wi ri Jehová xtujoyowaj nuwech, rija' xtuben chuwe richin xkitzolin chik, y xtintz'et chik ri káxa y ri rachoch rija'.

²⁶Jak'a wi ri Dios xtubij chuwe chi man yiqa' ta chik chuwech, kan tubana' k'a wik'in ri niqa' chuwech rija'.

²⁷Jak'a rat Sadoc roma kan natz'et ronojel ri peteneq-apo chiqawech, más utz katzolin kan pa tinamit rik'in uxlanibel-k'u'x. Katzolin kan rik'in ri ak'ajol Ahimaas, y chuqa' ri Abiatar rachibilan ri Jonatán ri ruk'ajol.

²⁸Yin xkik'oje' pa taq'aj chire ri tz'iran ruwach'ulew, k'a toq xtiteq-pe rutzijol wik'in, xcha'.

²⁹K'ari' ri Sadoc y ri Abiatar xkitzolij ri káxa richin ri rujikibel-tzij ri Dios pa Jerusalem y chiri' xek'oje-wi kan.

³⁰Ri David xuchop chik k'a el bey chuwech ri juyu' richin olivo, y maneq k'a ruxajab beneq. Noq' y ruya'on-el jun tzieq pa rujolon retal richin bis. Y konojel ri winaqi' ri e beneq rik'in chuqa' kiya'on-el tzieq pa kijolon y ye'oq' e beneq.

³¹Y ri David kan retaman chik k'a chi ri Ahitófel k'o chikikojol ri e yakatajineq chirij. Roma ri' xuk'utuj utzil chire ri Dios chi xtuyoj ta ronojel ri ruch'obonik ri Ahitófel.

³²K'ari' ri David xapon-q'anej pa ruwi' ri juyu' richin olivo ri akuchi niya'ox ruq'ij ri Dios ojer. Jari' toq xuk'ul-ri' rik'in ri Husai arquita, beneq rik'in rutziaq tzeretzik, y ruya'on-el ulew pa rujolon, retal richin rija' nibison rik'in ri David.

³³Jak'a ri David xubij chire chi wi rija' xtibe, xa kan jun ejqa'n ri xtuya' chirij.

³⁴Y xubij chire chi titzolin pa tinamit richin niberubij chire ri Absalón chi rija' xtok jun rusamajel achi'el rubanon-pe rik'in ri rutata'. Ri David xubij re' richin chi ri rupixabanik ri Ahitófel xtiyojtej ta.

³⁵Xubij chi chiri' xtiberuk'ulu-ri' kik'in ri Sadoc y ri Abiatar, y ronojel ri achike xtrak'axaj-pe chupan ri rachoch ri rey, tubij chike rije'.

³⁶Y ri e kik'ajol rije', ri Ahimaas y ri Jonatán, ja rije' ri xkebeya'on rutzijol chire rija'.

³⁷Keri' ri Husai ri rachibil ri David xbek'oje' pa tinamit. Y jari' toq ri Absalón xok chuqa' pa Jerusalem.