Read Kaqchikel 2 Sam 24 Bible Online

2 Sam 24 - Kaqchikel bible

2 Sam 24

¹Chirij ronojel re' ri Jehová xyakatej chik jun bey royowal chikij ri winaqi' israelita, y roma ri' xuya' q'ij chi ri David xtaqchi'ix richin chi xuben jun tz'iban bi'aj chiri' pan Israel y pa Judá.

²Roma ri' ri David xch'on rik'in ri Joab, ri más nim ruq'ij ri k'o pa kiwi' ri aj-labal ri k'o rik'in rija', y xubij chi tibe kik'in konojel ri tzobaj richin Israel, ri nitiker-pe pa Dan y napon k'a pa Beerseba richin nuben jun tz'iban bi'aj richin ri tinamit, richin chi nretamaj ri janipe' aj-labal ek'o.

³Jak'a ri Joab xubij chire: Ri Jehová ri qa-Dios xtunimirisaj ta wok'al mul más chike ri aj-labal ri ek'o wakami, y re' kan xtatz'et ta rat. Y ¿achike k'a roma kan nawajo' naben re jun tz'iban bi'aj re'?, xcha'

⁴Jak'a ri ruch'abel ri David kan ja wi ri' xtzeqelibex. Y keri' k'a xkiben ri Joab y ri e aj-raqen. Rije' xe'el k'a el richin xkiben ri tz'iban bi'aj richin ri tinamit Israel.

⁵Xe'el k'a el pa Jerusalem y xkiq'axaj ri raqen-ya' Jordán, y xe'apon pa tinamit Aroer. Chiri' k'a xkichop-wi-el ri tz'iban bi'aj pa xokon chire ri tinamit ri k'o pa nik'aj chire ri taq'aj. Chirij ri' xebe pa xaman pa ruwach'ulew Gad y k'ari' xe'apon pa tinamit Jazer.

⁶K'ari' xebe pa ruwach'ulew Galaad y xe'apon pa tinamit Cadés richin Siria. K'ari' xe'apon-q'anej pa Dan, y chirij ri' xebe pa Sidón ri k'o pa qajbel-q'ij.

⁷K'ari' xe'apon pa tinamit Tiro, y xekajlaj janipe' aj-labal ek'o ri akuchi ek'o-wi-qa. Chirij ri' xebe chik y xe'apon pa taq kitinamit ri winaqi' hitita y ri cananeo, y xebe pa xokon chire ri Judá k'a pa tinamit Beerseba.

⁸Toq xe'el-pe pa Beerseba, k'ari' xetzolin pa Jerusalem. Ronojel re' xkiben pa beleje' ik' y juwineq q'ij. Keri' xeq'ax chupan chijun ri ruwach'ulew Israel.

⁹Y ri Joab xujech ronojel ri tz'iban bi'aj richin ri tinamit Israel chire ri David. Y xutz'et chi ri pa xaman ek'o e 800,000 aj-labal, y e 500,000 ri ek'o chiri' pa Judá.

¹⁰Jak'a toq ri David xuben yan re tz'iban bi'aj re', k'ari' xuna' chi xmakun, y xubij k'a chire ri Jehová: Yin kan janila ximakun chawech roma xinben re jun tz'iban bi'aj re'. Wakami k'a, nink'utuj utzil chawe chi takuyu' numak, roma yin kan xinben re' roma maneq nuna'oj, xcha'.

¹¹Y ri ruka'n q'ij, toq ri David k'a man jani tiyakatej, ri Jehová xch'on rik'in ri q'alajirisey ruch'abel rubini'an Gad, ri nitz'eton ri peteneq chikiwech, y xubij:

¹²Kabiyin rik'in ri David, y tabij chire chi k'o oxi' ruwech ruk'ayewal ri ninsuj chire. Tucha' rija' ri nrajo' richin ninben yin, xcha'.

¹³Y ri Gad xapon rik'in ri David richin xberubij chire ri xubij ri Jehová. Y xubij k'a chire chi tucha' jun chike ri oxi' ruk'ayewal ri xtuya' ri Jehová: Oxi' juna' richin wayjal, oxi' ik' ri k'o chi nanimej chikiwech ri e etzelanel richin, o oxi' q'ij richin yabil ri kan ruk'amon-pe kamik pa kiwi' ri winaqi' israelita. Xubij k'a chire chi tuch'obo' jebel ri nrajo', roma rija' k'o chi niberubij chire ri taqayon-el.

¹⁴K'ari' ri David xubij chire: Wakami xik'oje' pa latz'. Xa kan más k'a utz chi yojqaqa pa ruq'a' ri Jehová, roma rija' kan joyowanel-wi, ke chuwech yojqaqa pa kiq'a' ri e yakatajineq chiqij, xcha'.

¹⁵Y kan chupan k'a ri nimaq'a' ri' ri Jehová xuteq-pe jun nimalej yabil pa ruwi' ri Israel. Xuchop k'a pe pa Dan y xapon k'a pa Beerseba y xeken e 70,000 winaqi'.

¹⁶Ri ángel richin ri Jehová xapon k'a ri akuchi nich'ay-wi ri trigo richin ri achin rubini'an Arauna ri Jebuseo, naqaj chik chire ri tinamit Jerusalem. Y toq xurik' ri ruq'a' richin yeruk'is ri winaqi' ri ek'o chiri', jari' toq ri Jehová xujoyowaj kiwech ri winaqi' ri', y xubij chire ri ángel chi titane' y man yerukamisaj ta chik.

¹⁷Y toq ri David xutz'et ri ángel ri nikamisan kichin ri winaqi', xubij chire ri Jehová: ¡Ja yin ri ximakun! ¡Ja yin ri in aj-mak! Ri nuwinaq xa kan e achi'el k'a taq karne'l ri maneq kimak. Yin nink'utuj utzil chawe chi pa kik'exel rije' taya' ri tijoj-poqonal pa nuwi' yin y pa kiwi' ri wijatzul, xcha'.

¹⁸Chupan ri q'ij ri', ri Gad xapon chik rik'in ri David, y xubij chire chi tibe ri akuchi nich'ay-wi trigo pa rulew ri Arauna ri Jebuseo, richin niberupaba' jun porobel richin nusuj kamelabel chuwech ri Jehová.

¹⁹Xbe k'a el ri David richin niberubana' ri porobel achi'el ri xbix chire.

²⁰Y ja toq ri David y ri rusamajela' e beneq-el, ri Arauna xerutz'et-pe. Y kan jari' xberuk'ulu' ri David, y xuqasaj-ri' chuwech k'a pan ulew.

²¹Y xuk'utuj chire achike roma xapon chiri'. Y ri David xubij chi richin nuloq' ri ulew ri', richin nupaba-q'anej jun porobel richin ri Jehová, richin chi nik'is-el ri yabil ri qajineq pa kiwi' ri winaqi'.

²²Y ri Arauna xubij chi tucha' k'a ri David akuchi ri más utz nutz'et richin nupaba-q'anej ri porobel. Y xerusuj chuqa' ri rubóyix richin yeporox jumul. Y richin ri si', xusuj ri che' ri ch'ayibel ri trigo, y ri che' ri niya'ox pa kiwi' ri bóyix.

²³Rija' xusuj ronojel re' chire ri David, y xubij chire chi kan ta xtik'ul roma ri Jehová ri ki-Dios.

²⁴Jak'a ri David xubij: Ninmatioxij chawe, jak'a yin k'o chi ninloq' chawe y ninya' ri rajel ronojel, roma man ruk'amon ta ninsuj chire ri Jehová poron chikop ri xa man ja ta yin in ch'akayon, xcha'. Y keri' ri David xuloq' ri ulew ri', y xeruloq' chuqa' ri bóyix y xutoj rik'in jun libra rik'in nik'aj saqipueq.

²⁵Chiri' k'a xupaba-wi-q'anej ri porobel richin ri Jehová, y xusuj chikop richin niporox jumul, y sipanik richin nuq'alajirisaj chi junan ruwech rik'in ri Dios. K'ari' ri Jehová xuk'ul ri k'utunik richin ri David pa kiwi' ri ruwinaq. Keri' xk'is-el ri nima-ruk'ayewal pan Israel.