Read Kaqchikel 2 Sam 4 Bible Online

2 Sam 4 - Kaqchikel bible

2 Sam 4

¹Toq ri Is-bóset xrak'axaj chi ri Abner xkamisex kan pan Hebrón, xk'is ronojel ruchuq'a'. Y konojel ri ek'o pan Israel janila xkixibij-ki'.

²Ri Is-bóset ek'o k'a ka'i' achi'a' ri yesamej rik'in richin ye'eleq'. Jun chike rije' rubini'an Baaná y ri jun chik rubini'an Recab. Rije' e ruk'ajol ri Rimón ri aj-Beerot y e rijatzul kan ri Benjamín.

³Ri aj-Beerot kan e aj-Benjamín-wi, stape' ri ojer kan xa xe'animej-el y xebek'oje' pa Guitaim chiri' pa ruwach'ulew Judá.

⁴Y k'o k'a jun ruk'ajol kan ri Jonatán, ri ruk'ajol kan ri Saúl rubini'an Mefi-bóset, ri wo'o' rujuna' toq xeken ri Saúl y ri Jonatán. Ri ixoq ri nitz'eton richin, toq xrak'axaj ri rutzijol ri' ri peteneq pa Jezreel, xuch'elej-el ri ak'ual richin nanimej. Y roma k'a anineq beneq, xutzeq-el. Y roma ri' ri ak'ual xok kan jetz'.

⁵K'o k'a jun q'ij ri Recab y ri Baaná xebe chirachoch ri Is-bóset. Xe'apon pa nik'aj-q'ij toq rija' uxlawineq juba' pa ruch'at roma ri k'aten.

⁶Ri e ka'i' achi'a' ri' xkiben k'a el chi nibekik'ama' trigo chiri', y roma ri' xe'ok-apo. Jak'a toq xe'apon chupan ri jay ri', xkitz'et chi ri Is-bóset jebel niwer pa ruch'at. Jari' toq xkikamisaj y xkelesaj-pe ri rujolon, y k'ari' xkik'en-pe. Xebiyin chijun aq'a' chupan ri taq'aj bey ri niq'ax chuchi' ri raqen-ya' Jordán.

⁸Y xkik'en k'a pe ri rujolon ri Is-bóset rik'in ri David pan Hebrón y xkibij chire: Re' jare' ri rujolon ri Is-bóset ri ruk'ajol kan ri Saúl ri etzelanel awichin, ri xajowan richin xarukamisaj rat. Jak'a re wakami ri Jehová xuya' ruk'exel chire ri Saúl y ri rijatzul roma ri man utz ta ri xkich'ob chawij, xecha'.

⁹Y ri David xubij chike ri Recab y ri Baaná: Kan k'es-wi ri Jehová ri xukol ri nuk'aslen chuwech ri bis.

¹⁰Toq xya'ox rutzijol chuwe ri pa Siclag chi ri Saúl xken yan, ri uk'uey rutzijol xuch'ob chi ruk'uan-el utzilej rutzijol chuwe. Jak'a yin kan xinteq rukamisaxik rija'.

¹¹Jak'a iwik'in rix itzel taq achi'a' kan más k'a xtik'o ruwi' ri xtinben chiwe roma xikamisaj jun achin chiri' pa rachoch toq niwer pa ruch'at, ri xa man jun rumak. Wakami k'a ninben ruk'exel chiwe y xkixinwelesaj k'a el jumul chuwech re ruwach'ulew. xcha' chike.

¹²K'ari' ri David xuteq kikamisaxik ri ka'i' achi'a' ri'. Xtzak'ix k'a ri kiq'a', ri kaqen y ri kich'akul xbetzeqebex kan chuxikin ri yakbel-ya' richin Hebrón. Chuqa' ri rujolon ri Is-bóset xbek'amer-pe richin xbekimuqu' kan junan rik'in ri Abner chiri' pan Hebrón.