Read Kaqchikel 2 Sam 5 Bible Online

2 Sam 5 - Kaqchikel bible

2 Sam 5

¹Xe'apon k'a ri ch'aqa' chik tzobaj richin Israel rik'in ri David pan Hebrón richin yech'on rik'in. Y kere' xkibij chire: Ojk'o wawe' roma junan qakik'el y junan qabaqil-qaboch'il.

²Y kan qitzij na wi chi ja ri Saúl ri xq'aton-tzij pa qawi'. Jak'a xa kan ja rat ri at uk'uayon ri bey chikiwech ri aj-labal. Chuqa' ri Jehová rubin chawe chi rat xkatok yuq'unel y tata'al qichin roj tinamit Israel, xecha'.

³Chuqa' xepe k'a konojel ri aj-raqen richin ri Israel rik'in ri David pan Hebrón. Y ri David xujikiba' k'a rutzij chuwech ri Jehová y chikiwech rije'. Y xkiqasaj k'a aceite pa ruwi' richin xok kan rey richin chijun Israel.

⁴Ri David juwineq lajuj k'a rujuna' chiri' toq xutikeriba' xuq'et-tzij. Y kawineq juna' xq'aton-tzij.

⁵Wuqu' juna' rik'in nik'aj xq'aton-tzij pa ruwi' ri Judá chiri' pan Hebrón. Y juwineq oxlajuj juna' xq'aton-tzij pa ruwi' chijun ruwach'ulew Israel chiri' pa Jerusalem.

⁶K'ari' ri David e rachibilan-el ri aj-labal xebe pa Jerusalem richin nibekibana' oyowal kik'in ri winaqi' ri ek'o chiri', ri nibix jebuseo chike. Ri winaqi' ri' xech'on rik'in ri David, y xkibij chire chi rije' man xketikir ta xke'ok-apo chiri', roma xa kan jajun ri e moyi' y ri e jetz' ri xtikipaba-ki' chikiwech. Keri' xkibij roma xkich'ob chi ri David man xtikir ta xtok-apo.

⁷Stape' keri' xkibij ri aj-Jebús, ri David xtikir xuch'ek ri kitinamit y xok chupan ri jay richin tobel ri chiri' pa ruwi' ri juyu' Sión. Y roma ri' ri tinamit ri' xubini'aj Ri Rutinamit ri David.

⁸Richin xech'akatej ri aj-Jebús, ri David xubij k'a chi richin yetikir yekikamisaj, k'o chi ye'ok-el chupan ri rubey ya' ri napon pa tinamit. Y chuqa' xubij chi wakami xtutz'et wi qitzij chi ri e moyi' y ri e jetz' xketikir xtikipaba-ki', roma rija' kan yeretzelaj-wi ri winaqi' ri'. Chiri' k'a peteneq-wi ri ch'abel ri nibix chi ri moyi' y ri e jetz' man ruk'amon ta ye'ok chupan ri rachoch ri Dios.

⁹Y chirij ri' ri David kan xk'oje-qa chiri' chupan ri jay richin tobel chiri' pa Sión. Y roma ri' xubini'aj Tinamit Richin ri David. Rija' xunimirisaj-q'anej ri tz'aq ri k'o pa relebel-q'ij chire ri jay richin q'atbel-tzij, y xunojisaj-q'anej chi ulew.

¹⁰Y ri rajawaren ri David kan q'ij-q'ij más beneq runimirinen, roma ri Jehová, Dios k'iytisanel richin ronojel k'o rik'in.

¹¹Ri chiri' pa tinamit Tiro k'o k'a jun rey rubini'an Hiram. Y rija' xeruteq k'a uk'uey rutzijol rik'in ri David. Ri achi'a' ri' kik'uan k'a el tiox-che', y e kachibilan-el ajanela' y achi'a' ri yesamajin abej richin nikipaba-q'anej ri rachoch ri David.

¹²K'ari' ri David xq'ax chuwech chi kan ja ri Jehová ri xjikiban kan richin chupan ri ajawaren, y roma ri' ri ajawaren kan janila xnimer chuwech roma ri rajowabal ri Dios pa ruwi' ri tinamit Israel.

¹³Toq ri David xel-pe pan Hebrón y xapon pa Jerusalem xek'oje' ch'aqa' chik ru-concubina y rixjayil. Chuqa' xek'oje' chik k'iy ralk'ual kik'in ri ixoqi' ri'.

¹⁴Jare' ri kibi' ri ralk'ual: Ri Samúa, ri Sobab, ri Natán, ri Salomón,

¹⁵ri Ibhar, ri Elisúa, ri Néfeg, ri Jafía,

¹⁶ri Elisamá, ri Eliadá y ri Elifélet.

¹⁷Toq xkak'axaj k'a ri aj-Filistea chi ri David xqasex aceite pa ruwi' richin xok kan rey richin Israel, xkimol k'a ki' konojel ri aj-labal richin nibekibana' oyowal rik'in. Y toq rija' xunabej, xbe chupan ri jay richin tobel.

¹⁸Y xejote' k'a el ri aj-Filistea, y xebek'oje' pa taq'aj richin Refaim.

¹⁹K'ari' ri David xuk'ulubej ri Jehová richin nretamaj wi ruk'amon niyakatej-el chikij richin niberubana' oyowal kik'in. Y xuk'utuj chuqa' wi yerujech pa ruq'a'. Y ri Jehová xubij chire chi kan xkerujech-wi pa ruq'a'.

²⁰Y ri David kan xyakatej k'a el chikij, y xeruch'ek k'a. Y rija' xubij k'a: Ri Jehová kan xerumes k'a el ri ye'etzelan wichin achi'el nuben jun nimalej raqen-ya' ri nuqirirej-el ronojel, xcha'. Y roma ri' chiri' xubini'aj Baal-perasim.*f4*

²¹Y ri aj-Filistea, toq xe'animej, xekiyala' k'a kan ri wachibel ri nikiya' kiq'ij. Y ri David y ri aj-labal xkik'uaj k'a el ronojel re'.

²²Chirij ri' ri aj-Filistea xetzolin chik pe, y xek'oje' chik qa chiri' pa taq'aj richin Refaim.

²³Y ri David xuk'ulubej chik jun bey ri Jehová. Y rija' xubij chire chi man tijote-el chikiwech, xa tibekisutij-pe-kij y kekichapa' chi oyowal akuchi ek'o-wi ri che' bálsamo.

²⁴Y ri Dios xubij k'a chi ri David k'o chi nroyobej k'a toq xtrak'axaj chi achi'el k'o ri nibiyin pa kitum ri che' ri'. K'ari' toq ri David xtijote-el chi'anin chikij, roma jari' xtik'o-el ri Jehová chikiwech richin yerukamisaj ri achi'a' aj-Filistea.

²⁵Ri David kan xuben k'a achi'el xubij ri Jehová chire; kan k'a pa Gabaón xtiker-pe chikikamisaxik ri aj-Filistea y xapon k'a pa Guezer.