Read Kaqchikel 1 Rey 10 Bible Online

1 Rey 10 - Kaqchikel bible

1 Rey 10

¹Y toq ri rutzijol ri retamabal ri Salomón, ri ya'on chire roma ri Jehová xapon k'a pa ruwach'ulew Sabá, jari' toq ri reina richin chiri' kan xbe k'a chutz'etik ri Salomón, y richin nutejtobej ri retamabal, kan xuch'ob k'a el k'iy na'oj ri kan e k'ayew-wi ri niberuk'utuj chire.

²Y toq ri reina xapon k'a pa tinamit Jerusalem kan e k'iy k'a rusamajela' ri e beneq rik'in, e kik'uan el camello ri kejqalon-el jubulej taq aq'om, q'anapueq pa ruk'iyal y jebelej taq abej. Ri reina xapon k'a rik'in ri Salomón y xtzijon rik'in chirij ronojel ri k'o pa ránima richin xubij chire.

³Ri rey Salomón kan xtikir xubij ronojel ri xuk'utuj ri reina chire y man jun k'ayew xuben chuwech richin xuchol ronojel chire.

⁴Y ri reina xrak'axaj k'a ri etamabel y ri na'oj ri xuch'abalij ri Salomón y chuqa' xutz'et ri rachoch ri rubanon-q'anej.

⁵Toq xutz'et ri jebelej taq q'utun, ri kachoch ri e aj-samaj ri ek'o rik'in, ri jebelej kina'oj y ri kitziaqul ri ye'ilin richin, ri e pajoy y ri e jachoy vino, y ri kamelabel ri xeporox ri chiri' pa rachoch ri Jehová; jari' toq janila xumey,

⁶y xubij chire ri Salomón: Kan qitzij na wi ri rutzijol ri apowineq pa nutinamit, pa ruwi' ri janila ana'oj y ronojel ri abanon-q'anej.

⁷Jak'a yin xa man xinimaj ta ronojel re', k'a xipe na chutz'etik rik'in ri runaq' nuwech. Ri wak'axan-pe kan man nuq'i' ta k'a ri awetamabal ri nintz'et wakami. Kan qitzij wi chi ri na'oj y ronojel ri k'o awik'in kan janila k'iy, man achi'el ta ok ri rutzijol ri wak'axan-pe.

⁸Jebel ruwa-kiq'ij ri awinaq ri ek'o awik'in; jebel ruwa-kiq'ij ri asamajela' roma kan q'ij-q'ij nikak'axaj ri awetamabal.

⁹Tinimirisex k'a ri rubi' ri Jehová ri a-Dios ri utz xarutz'et richin xarutz'uyuba' kan chupan ri tz'uyubel richin xatok rey pa ruwi' ri Israel, roma rija' kan jantape' rajowan-pe ri atinamit Israel. Roma ri' xarukusaj kan rey richin kan ta k'o q'atbel-tzij pa ruchojmilal, xcha'.

¹⁰Ri reina xusipaj chire ri rey, jumuch' wuqu' quintal q'anapueq, janila chi jubulej taq aq'om, jebelej taq abej ri kan man jun bey tz'eton ta. Kan man jun bey ri k'o ta pe pan Israel pa ruk'iyal ri jubulej taq aq'om achi'el ri xusipaj ri reina richin Sabá chire ri rey Salomón.

¹¹Chuqa' ri molaj barco richin ri rey Hiram ri e peteneq pan Ofir, ri kik'amon-pe q'anapueq, kan kik'amon-pe chuqa' k'iy che' ri nibix sándalo chire y jebelej taq abej.

¹²Rik'in ri sándalo, ri rey xeruben grada chire ri rachoch ri Jehová y chire ri rachoch rija'. Chuqa' rik'in ri che' ri' xeruben q'ojom ri rubini'an arpa y salterio, kichin ri bixanela'; y ri chiri' kan man jun bey k'a tz'eton jun samaj rik'in ri che' ri' achi'el ri xuben ri Salomón, ni man jun bey chik xtz'et k'a re wakami.

¹³Y ri rey Salomón xuya' chire ri reina ri achike xrajo' y ri achike xuk'utuj chire. Y ri xuya-el chire kan xik'o k'a ruwi' chire ri ruk'amon pe ri reina. Chirij ronojel re' ri reina xtzolin pa rutinamit e rachibilan-el ri rusamajela'.

¹⁴Ronojel juna' ri Salomón nuk'ul jubama 500 quintal q'anapueq.

¹⁵Y chupan re' man etan ta ri nikitoj-apo ri k'ayinela', ni ri nitoj roma ri k'ayij, ni ri nikitoj ri rey ri ek'o pan Arabia, ni ri nikitoj ri e aj-raqen ri ek'o chupan ri ruwach'ulew Israel.

¹⁶Y ri rey Salomón xeruben 200 tobel ri e nima'q banon rik'in q'anapueq, ri achi'el yekusex pan oyowal, y xukusaj k'a wolajuj libra q'anapueq richin xuya' chikij jujun tobel.

¹⁷Y chuqa' xeruben 300 kokoj tobel y xukusaj k'a oxi' libra q'anapueq richin xuya' chikij jujun tobel. Y ri rey xeruya' k'a re tobel re' ri chiri' pa rachoch ri rubini'an Che' Richin Líbano.

¹⁸Y ri rey xuben chuqa' jun nimalej rutz'uyubal, y xuben rik'in rey tix, y k'ari' xuya' q'anapueq chirij.

¹⁹Ri rutz'uyubal, k'a pa waqi' grada k'o-wi-q'anej, y ri ruraq'alibal setesik rubanik y ri pa ruxikin k'o ri akuchi yeruya-wi ri ruq'a', y ri tz'uyubel ri' k'o chikikojol ka'i' kiwachibel koj ri e pa'el.

²⁰Chikiwech-pe ri ka'i' wachibel ri', k'o chik pe ka'i' cholaj kiwachibel koj, jujun koj pa jujun grada, y keri' kibanon chi ka'i' rutza'n ri grada. Ri kajlabal ri ka'i' cholaj wachibel ri' e kablajuj. Kan man jun chik k'a q'atoy-tzij pan Israel ri xbanon jun tz'uyubel richin q'atbel-tzij achi'el ri xuben rija'.

²¹Y ronojel qumbel ri richin ri rey Salomón kan e banon rik'in q'anapueq, y keri' chuqa' ri jalajoj ruwech rulaq ri k'o pa rachoch, rubini'an Che' Richin Líbano. Toq ri Salomón xq'aton-tzij, man xukusaj ta saqipueq roma man jun rejqalen.

²²Chuqa' ri rey k'o jun molaj ru-barco ri yebe pa ruwach'ulew Tarsis junan rik'in ri molaj ru-barco ri rey Hiram. Y ri barco ri' chi ox-ox juna' ye'ok'ulun kik'amon-pe k'iy q'anapueq, saqipueq y nima'q taq key tix; chuqa' e kik'amon-pe ri batz', y chuqa' ri pavo real.

²³Kan xaxe k'a ri rey Salomón ri k'o más rubeyomel, y más runa'oj chikiwech konojel rey richin ri ruwach'ulew.

²⁴Konojel k'a winaqi' richin chijun ruwach'ulew nikikanoj k'a ri rey Salomón roma nikajo' nikak'axaj ri na'oj ri ya'on chire roma ri Dios.

²⁵Konojel ri ye'apon rik'in kik'ualon k'a apo sipanik ri nalex pa kánima, richin nikiya' chire. Yekiyala' k'a saqipueq, q'anapueq ri jalajoj rubanik banon chire, chuqa' tzieq, kamisabel, jubulej taq aq'om, kiej y bur. Y kan kere' k'a xbanatej ronojel juna'.

²⁶Ri Salomón xeruloq' k'a e k'iy ru-carruaje y xek'oje' e k'iy ruwinaq ri yech'oke' chirij kiej. Ronojel k'a ri ru-carruaje e 1,400, y e 12,000 achi'a' ri yech'oke' chirij kiej, ri xerutaluj k'a pa taq tinamit ri akuchi yeyak-wi ri carruaje, y chuqa' ek'o xek'oje' kan rik'in ri chiri' pa Jerusalem.

²⁷Ri rey xuben chi chiri' pa tinamit Jerusalem ri saqipueq kan pa ruk'iyal ri xk'oje', y kan achi'el chik k'a ri abej rubanon, y chuqa' janila xetamex ruwech ri tiox-che' kan achi'el etaman ruwech ri ruche'el wíkix ri k'o pa taq'aj.

²⁸Ri kiej ri e richin ri rey Salomón yeloq' k'a pe pan Egipto y pa Cilicia; y ri loq'onela' y ri k'ayinela' richin ri rey jari' ri yeloq'on-pe ri kiej ri'.

²⁹Toq rije' nikiloq' jun carruaje ri nipe pan Egipto, nikiloq'-pe chi 600 raqen saqipueq, y jun kiej nikiloq'-pe chi 150 raqen saqipueq. Y re' yekiteq chik el richin yekik'ayij chike ri rey hitita y ri aj-Siria.