Read Kaqchikel 1 Rey 12 Bible Online

1 Rey 12 - Kaqchikel bible

1 Rey 12

¹Chirij ri rukamik ri Salomón, ri Roboam xbe k'a pa tinamit Siquem roma konojel winaqi' richin Israel xebe chiri' richin nikiben ki-rey chire rija'.

²Y ri Jeroboam ruk'ajol ri Nabat k'a k'o na pan Egipto, roma animajineq-el chuwech ri rey Salomón. Y toq xrak'axaj chi xken yan, xtzolin pa ruwach'ulew Israel.

³Y ri Jeroboam xtaq k'a ruk'amik chiri' pa Siquem, y toq rija' xapon chiri', rija' y konojel ri winaqi' richin Israel xech'on rik'in ri Roboam, y xkibij chire:

⁴Ri atata' k'iy k'a ri ruq'aton kan pa qawi', jak'a wi rat naqasaj ruwi' ri ilinri'il ri ruq'aton kan pa qawi', richin utz ta juba' yojk'ase', roj kan xkatqilij k'a, xecha' chire.

⁵Y ri Roboam xubij chike chi kebe y ketzolej chik pe rik'in pa rox q'ij. Y ri winaqi' kan keri' k'a xkiben.

⁶K'ari' ri rey Roboam xeruk'ulubej k'a ri achi'a' ri aj-na'oj ri xek'oje' rik'in ri Salomón chijun ruk'aslen y xubij chike chi achike ta na'oj nikiya' chire pa ruwi' ri k'utunik ri xkiben ri winaqi' chire.

⁷Y ri achi'a' ri' xkibij chire: Wi rat nawajo' naq'et-tzij pa qawi' roj, k'o chi xkatok samajel richin ri qatinamit, y utzilej taq ch'abel ri xtabij-el chike; wi keri' xtaben, rije' kan xkatkilij chijun ak'aslen, xecha'.

⁸Jak'a ri Roboam man xuya' ta ruxikin chire ri xkibij ri achi'a' ri', y xa xuk'utuj chik runa'oj kik'in ri alaboni' ri junan e k'iyineq rik'in, ri e rusamajela' chuqa'.

⁹Y xuk'utuj chike: ¿Achike ta na'oj niya' chuwe, richin ta ninbij-el chike ri winaqi' ri xkik'utuj utzil chuwe chi tinqasaj juba' ruwi' ri samaj ri xuya' kan pa kiwi' ri nata'?, xcha'.

¹⁰Y ri alaboni' ri junan xek'iy rik'in xkibij chire: Ri winaqi' ri xkibij chawe chi ri atata' k'iy ri xuq'et kan pa kiwi' richin nikiben, y nikajo' chi naqasaj juba' ruwi'. Kere' k'a tabij-el chike: Rix k'ayew xina' roma ri xuben ri nata' iwik'in y re' xa man jun ok. Tiwoyobej juba' y xtiwetamaj ri in achike yin.

¹¹Ri nata' xuya' al ejqa'n chiwij, jak'a yin kan xtinben chi janila ralal ri ejqa'n ri'. Rija' xixruch'ey rik'in tz'um, jak'a yin xkixinch'ey rik'in tz'um ri k'o k'ix ch'ich' chutza'n, xkacha-el chike, xecha' ri alaboni'.

¹²Toq xapon k'a ri rox q'ij ri', ri Jeroboam y konojel ri winaqi' xe'apon k'a rik'in ri rey Roboam kan achi'el ri rubin-el chike chi ke'apon pa rox q'ij.

¹³Ri rey Roboam kan janila kow k'a xch'on chike ri winaqi', y xa man xuya' ta ruxikin chire ri xkibij ri achi'a' ri k'o kina'oj.

¹⁴Rija' xa ja ri xkibij ri alaboni' chire, xa jari' xutzeqelibej y xubij chike ri winaqi': Ri nata' xuya' al ejqa'n chiwij, jak'a yin kan xtinben chi janila ralal ri ejqa'n ri'. Rija' xixruch'ey rik'in tz'um, jak'a yin xkixinch'ey rik'in tz'um ri k'o k'ix ch'ich' chutza'n, xcha' chike.

¹⁵Keri' ri rey xa man xerak'axaj ta ri winaqi'. Jak'a ri Jehová xya'on q'ij chi keri' xbanatej, richin keri' nibanatej ronojel achi'el xubij ri Jehová chire ri Ahías ri aj-Siló toq xch'on rik'in ri Jeroboam.

¹⁶Toq ri winaqi' ri e richin Israel xkitz'et chi ri rey man nrajo' ta yerak'axaj, jari' toq rije' xkibij chire: Roj xa oj man jun rik'in ri David, ni man jun xtiqichinaj rik'in rija' ri xa ruk'ajol ri Isaí. Roj ri aj-Israel, jo' pa taq qachoch y ri David kan tutzu' k'a pa ruwi' ri rachoch xecha'. Y keri', konojel k'a ri aj-Israel xetzolin chi taq kachoch.

¹⁷Jak'a ri aj-Israel ri k'o kachoch pa taq tinamit ri chiri' pa Judá, k'a xq'aton na tzij ri Roboam pa kiwi'.

¹⁸K'o k'a jun achin ri rubini'an Adoram, ja rija' ri pa'el pa ruwi' ri kan k'o chi nikitoj chire ri rey. Y toq ri rey Roboam xuteq-el kik'in ri israelita ri ek'o pa xaman richin niberuk'ulu' ri kan k'o chi nikitoj chire ri rey, jari' toq ri winaqi' xa xkikamisaj chi abej. Y toq ri rey xrak'axaj re' xberuchapa-pe ri ru-carruaje y xanimej-el k'a pa Jerusalem.

¹⁹Y keri' toq xyakatej ri Israel chikij ri aj pa rachoch kan ri David, y keri' rubanon pe k'a re q'ij re'.

²⁰Y toq ri ch'aqa' chik tzobaj tinamit Israel xkak'axaj chi ri Jeroboam xtzolin-pe, konojel ri winaqi' xkimol-ki' richin nikiben rey chire pa ruwi' ri ruwach'ulew Israel; y kan xaxe chik k'a ri tzobaj richin ri Judá ri xtzeqeliben richin ri Roboam, ri rijatzul kan ri Salomón.

²¹Y toq ri Roboam xapon ri chiri' pa tinamit Jerusalem, rija' kan jari' xuteq koyoxik ri achi'a' richin ri tzobaj richin Judá y Benjamín. Chikikojol konojel ri', xerucha' k'a e 180,000 aj-labal, richin nibekibana' oyowal kik'in ri lajuj chik tzobaj israelita, y keri' nitzolin ta chik chijun ri ajawaren pa ruq'a' ri Roboam, ruk'ajol kan ri Salomón.

²²Ri Jehová xch'on-pe rik'in jun q'alajirisey ruch'abel, ri rubini'an Semaías, y xubij chire:

²³Kabech'on rik'in ri Roboam ri rey richin Judá, kik'in konojel ri ruwinaq, y ri winaqi' aj-Benjamín, y ri ch'aqa' chik winaqi' ri ek'o chiri' y tabij chike:

²⁴Ri Jehová nubij chi man yixbe ta richin nibebana' oyowal kik'in ri qach'alal ri e rijatzul kan ri Israel. Más utz kixtzolin chi'ijujunal chi'iwachoch, roma kan ja ri Jehová ri xya'on q'ij chi keri' xbanatej, kacha' chike, xcha' ri Jehová chire ri Semaías. Toq ri winaqi' xkak'axaj ronojel re', rije' kan xkinimaj k'a ri ruch'abel ri Dios y xetzolej k'a chi taq kachoch.

²⁵K'ari' ri Jeroboam xupaba' chik q'anej ri tinamit Siquem ri chiri' chuwi' taq juyu' richin Efraín y chiri' xk'oje-wi-qa. Y chirij ri' xupaba' chik q'anej ri tinamit Penuel.

²⁶Y ri Jeroboam xuch'ob-qa pa ránima: Re q'atbel-tzij re k'o pa nuq'a', rik'in juba' xa xtitzolin chik pa kiq'a' ri aj pa rachoch kan ri rey David.

²⁷Wi ri nuwinaq xkebe pa Jerusalem richin nibekisuju' kamelabel pa rachoch ri Jehová, ri kánima xa xtitzolin chik rik'in ri Roboam rey richin Judá, y yin xkinkikamisaj kan y xketzolin chik rik'in ri rey, xcha-qa.

²⁸Y toq ruk'utun chik k'a runa'oj, ri rey xa xeruben k'a kiwachibel ka'i' nima-alaj achij wákix, ri banon rik'in q'anapueq. Y rija' xubij k'a chike ri ruwinaq israelita: Man chik k'a xkixbe ta chik q'anej pa Jerusalem pa rachoch ri Dios richin nibeya' ruq'ij. Xa jare' ek'o wawe' ri dios ri xe'elesan-pe ri qati't-qamama' pa ruwach'ulew Egipto, xcha' chike.

²⁹K'ari' xberuya' kan jun pa xokon chiri' pa tinamit Betel, y ri jun chik xberuya' kan pa xaman chiri' pa tinamit Dan.

³⁰Y jare' xbanon chike ri winaqi' richin xemakun roma nibekiya' kiq'ij ri dios k'a chiri'.

³¹Xeruben k'a q'anej rachoch akuchi yekiya-wi kiq'ij ri ki-dios pa ruwi' taq juyu', y man jun bey xe'ukusex ri e rijatzul kan ri Leví richin sacerdote.

³²Chuqa' xutikeriba-q'anej jun nimaq'ij ri kan k'o chi niban ronojel wolajuj q'ij richin ri ik' waqxaqi', achi'el toq ri aj-Judá yenimaq'ijun, y nikiya' ruq'ij ri Jehová. Kan ja rija' ri xsuju ri kamelabel, y re' xuben pa Betel chuwech ri nima-alaj achij wákix ri rubanon-q'anej. Chuqa' xeruya' sacerdote chiri' ri akuchi niya-wi kiq'ij ri ch'aqa' chik dios ri pa ruwi' taq juyu'.

³³Kere' k'a xuben ri Jeroboam chupan ri wolajuj q'ij richin ri ik' waqxaqi': Kan ja rija' ri xsuju kamelabel ri chiri' pa Betel. Kan xutz'uk k'a q'anej ri nimaq'ij ri xpe pa ránima rija', y xjote-q'anej rik'in ri porobel richin xuporoj pom.