Read Kaqchikel 1 Rey 13 Bible Online

1 Rey 13 - Kaqchikel bible

1 Rey 13

¹Y k'o k'a jun achin q'alajirisey ruch'abel ri Dios aj pa Judá ri xapon pa Betel roma kan taqon-el roma ri Jehová. Y ri Jeroboam pa'el k'a rik'in ri porobel richin nuporoj pom.

²Jari' toq ri achin ri' rik'in ronojel ruchuq'a' xch'on pa rubi' ri Jehová y xubij: ¡Porobel! Ri Jehová kan nubij chi pan awi' rat xkesuj-wi ri e sacerdote ri yeporon pom pa ruwi' re juyu' re'. Y pan awi' chuqa' rat xkeporox-wi ri kibaqil ri winaqi'. Kan jak'a ri ak'ual ri xtalex pa rachoch kan ri rey David, jari' ri xtibanon y ri ak'ual ri' xtubini'aj Josías, xcha'.

³Y kan chupan k'a ri q'ij ri' ri achin ri' xubij: Jare' ri nima'q taq rubanobal ri Dios richin retal ri rubin-pe chuwe chi nibanatej: Wakami la porobel kan xtiwuluwu' k'a y la chaj la k'o pa ruwi' xtikiratej, xcha'.

⁴Toq ri rey Jeroboam xrak'axaj ri xubij ri achin ri' pa ruwi' ri porobel ri k'o chiri' pa Betel, jari' toq k'a chiri' rik'in ri porobel xuk'ut rik'in ri ruq'a', y xubij: ¡Tichapa' la achin la'!, xcha'. Y kan jari' toq ri ruq'a' ri achoq ik'in xuk'ut-wi ri achin richin ri Dios kan che-che' xuben kan y man xtikir ta chik xuqasaj-qa.

⁵Y chupan k'a ri ramaj ri' ri porobel xwuluwu-qa, y ri chaj ri k'o pa ruwi' xkiratej. Y ronojel re' xbanatej richin retal, achi'el ri rubin ri Jehová roma ri q'alajirisey ruch'abel.

⁶K'ari' ri rey Jeroboam xubij chire ri q'alajirisey ruch'abel ri Dios: Nink'utuj utzil chawe chi kach'on rik'in ri Jehová woma yin, y tak'utuj utzil chire chi re nuq'a' xtisilon ta chik, xcha'. Y ri achin ri' kan xch'on rik'in ri Jehová pa ruwi' ri rey, y ri ruq'a' kan xsilon chik achi'el ri rubanon kan.

⁷K'ari' ri rey xubij chire: Jo' chuwij pa wachoch richin yabewa' wik'in, y xtinya' jun sipanik chawe, xcha'.

⁸Jak'a ri achin xubij chire ri rey: Stape' xtaya' chuwe ri nik'aj abeyomel ri k'o pan awachoch, yin man yibe ta chawij, ni man xkiwa-xkinuk'ya' ta chupan re tinamit re',

⁹roma toq xch'on-pe ri Jehová wik'in, kan xubij chuwe chi man yiwa-yinuk'ya' ta wawe', ni man yitzolin ta chupan ri bey ri akuchi in peteneq-wi, xcha' chire ri rey.

¹⁰Y ri achin ri' man xtzolin ta chik chupan ri bey ri xbe-wi toq xapon pa Betel.

¹¹Y chiri' pa Betel k'o k'a jun chik q'alajirisey ruch'abel ri Dios ri janila chik ri'j. Y ri ruk'ajol xkitzijoj k'a chire ronojel ri xbanatej chupan ri q'ij ri' chiri' pa Betel roma ri achin richin ri Dios. Y chuqa' xkitzijoj chire ri ch'abel ri xubij kan chire ri rey.

¹²Y ri kitata' xuk'utuj achike bey xbe-wi ri achin ri'. Y ri e ruk'ajol xkik'ut k'a chuwech ri bey ri akuchi xbe-wi kan re achin richin ri Dios ri peteneq pa Judá.

¹³Y ri ti ri'j achin xubij chike ri ruk'ajol chi tikichojmirisaj ri xalma chirij ri rubur, y rije' kan xkichojmirisaj-el, y rija' xch'oke-el chirij y xbe.

¹⁴Y xutzeqelibej k'a el ri achin richin ri Dios ri peteneq pa Judá y xberila' tz'uyul chuxe' jun paten-che', y xuk'utuj chire chi wi ja rija' ri achin richin ri Dios ri peteneq pa Judá. Y ri achin ri' xubij chi ja rija'.

¹⁵K'ari' ri ti ri'j achin xubij chire: Jo' chuwij pa wachoch richin nabetija' away wik'in, xcha' chire.

¹⁶Jak'a ri achin aj-Judá xubij chi man nitzolin ta chik richin nibe chirij pa rachoch, ni man xtiwa-xtuk'ya' ta rik'in rija', ni ta chupan ri tinamit ri',

¹⁷roma ri Dios rubin-pe chire chi man jun tutej chiri', ni man titzolin chupan ri bey ri akuchi peteneq-wi.

¹⁸Jak'a ri ti ri'j q'alajirisey ruch'abel ri Dios ri xapon rik'in, xa xutz'uk-tzij chuwech y xubij chire: Yin chuqa' in q'alajirisey ruch'abel ri Dios achi'el rat. K'o k'a jun ángel richin ri Dios ri xch'on wik'in y xubij chuwe chi yatink'uaj-el pa wachoch richin yabewa-yatuk'ya' wik'in, xcha' ri ti ri'j achin.

¹⁹K'ari' ri achin aj-Judá xbe pa rachoch ri ti achin richin xwa-xuk'ya'.

²⁰Toq rije' e tz'uyul chik richin ri wa'in, jari' toq ri Jehová xch'on rik'in ri ti ri'j achin ri xbanon chire chi xtzolin.

²¹Rija' kan rik'in k'a ronojel ruchuq'a' xch'on rik'in ri achin richin ri Dios ri peteneq pa Judá y xubij chire: Kere' nubij ri Jehová: Roma kan man xanimaj ta ri xinbij chawe yin Jehová,

²²y xa xatzolin-pe richin yawa-yatuk'ya' chupan re tinamit re' akuchi xinbij chawe richin man jun tatej, wakami k'a ri ach'akul man xtapon ta chik akuchi e muqul-wi ri ate-atata', xcha' ri Jehová chuwe, xcha' ri achin ti ri'j.

²³Toq ri achin aj-Judá xkolaj, jari' toq ri ti ri'j achin xuya' ri ruxalma jun ti bur richin nich'oke-el ri achin aj-Judá chirij,

²⁴richin keri' nuchop-el bey. Y toq ruchapon chik k'a el bey, xbe-el pe jun koj chirij y xukamisaj, y ri ruch'akul chiri' xpune-wi kan. Y ri kamineq xk'oje' kan chikikojol ri ti bur y ri koj.

²⁵Y chiri' xeq'ax-el ka'i-oxi' achi'a', y xkitz'et kan ri ruch'akul ri achin punul kan chiri' pa bey, y ri koj k'a k'o na apo rik'in. Y toq xe'apon k'a chupan ri tinamit akuchi k'o-wi ri ti ri'j q'alajirisey ruch'abel ri Dios xbekitzijoj chire ri xkitz'et kan.

²⁶Toq ri ti ri'j achin xrak'axaj re', jari' toq xubij: Ri' jari' ri achin richin ri Jehová aj-Judá, ri man xunimaj ta rutzij ri Jehová. Roma ri' ri Jehová xuya' q'ij richin xel-pe jun koj chirij richin xuxil y xukamisaj achi'el xbix chire roma ri Jehová, xcha'.

²⁷K'ari' xubij chike ri ruk'ajol chi tikiya' ruxalma jun chik ti bur richin nuk'uaj-el, y rije' kan keri' xkiben.

²⁸K'ari' rija' xbe y xberila' na ri ch'akulaj punul kan pa bey, chikikojol ri ti bur y ri koj; y ri koj xa man xutej ta ri ch'akulaj ri' ni man jun rubanon chire ri ti bur.

²⁹K'ari' ri ti ri'j achin xberusik'a-pe ri ruch'akul ri achin richin ri Dios ri aj-Judá richin xuya-pe chirij ri ti bur, y xuk'en-pe pa Betel richin xroq'ej y xumuq.

³⁰Y xumuq k'a chupan jun muqbel ri kan richin wi rija', y k'ari' ri ralk'ual y rija' xkoq'ej k'a janila, y xkibila' k'a ¡Wach'alal yin! ¡Wach'alal yin!, xecha'.

³¹Toq xbemuq yan kan ri achin richin ri Dios, jari' toq ri ti ri'j achin xch'on kik'in ri ruk'ajol y xubij chike: Toq yin xkiken, xkinimuq junan rik'in rija', y ri nubaqil xtuxlan chuxikin ri rubaqil rija',

³²roma ri xuq'alajirisaj rija' chirij ri porobel wawe' pa Betel, y ri porobel ri ek'o chuwi' taq juyu', ri xbix chire roma ri Jehová, kan qitzij xtik'ulun, xcha'.

³³Man rik'in ri', ri Jeroboam man xuch'er ta kan ri' rik'in ri itzelej bey ri ruk'uan; xa kan xerukanoj más sacerdote chikikojol ri winaqi' richin nikiya' ruq'ij ri ki-dios pa ruwi' taq juyu'. Ri achike xrajo' rija' richin xerukusaj kan sacerdote, jari' ri xesamajin ri chiri'.

³⁴Y jare' ri xkimakuj ri Jeroboam y ri aj pa rachoch. Y roma ri' xetzaq y xek'is-el pa ruwi' re ruwach'ulew.