Read Kaqchikel 1 Rey 14 Bible Online

1 Rey 14 - Kaqchikel bible

1 Rey 14

¹Ri Jeroboam k'o k'a jun ti ruk'ajol ri rubini'an Abías, y chupan ri q'ij ri' ri ak'ual xk'uluwachij k'a jun yabil.

²Y ri Jeroboam xubij chire ri rixjayil: Yin ninwajo' chi rat yabe k'a pa tinamit Siló, y yabe k'a rik'in ri Ahías ri q'alajirisey ruch'abel ri Dios, ri xbin chuwe chi ja yin xkinok rey pa ruwi' re tinamit re'. Jak'a richin man netamex ta awech chi at wixjayil yin, tajala-el awech.

³Tak'uaj-el chire lajuj kaxlan-wey, y jun chik kaxlan-wey ri más nim, y chuqa' tak'uaj-el jun xára kab ri nikiya' ri taq chikopi'. Kabiyin k'a chila' rik'in ri Ahías, y rija' xtubij-pe chawe achike xtiberuk'uluwachij ri ti qalk'ual, xcha'.

⁴Y ri rixjayil ri Jeroboam kan keri' xuben: Xbe k'a pa Siló chirachoch ri Ahías, y ri Ahías xa kan moy chik roma k'o chik k'iy rujuna'.

⁵Ri Jehová kan xubij yan k'a chire ri Ahías chi ri rixjayil ri Jeroboam xtapon rik'in richin niberuk'ulubej ri achike xtiberuk'uluwachij ri ti ral, roma re ak'ual re' janila yawa'. Ri Jehová xubij k'a chire ri Ahías ri k'o chi xtubij-el chire ri ixoq, y chi rija' rujalon-el ruwech xtapon rik'in.

⁶Toq ri Ahías xrak'axaj ri raqen ri rixjayil ri Jeroboam, y xok-ok chuchi' ri jay, jari' toq ri Ahías xubij: Rat ri at rixjayil ri Jeroboam, katok-pe. ¿Achike roma xajel-pe awech? Wakami yin xa k'ayew rutzijol ri xtinya-el chawe.

⁷Kabiyin y tabebij chire ri Jeroboam ri nubij ri Jehová ri qa-Dios richin Israel. Kere' k'a ri nubij: Yin xatincha' chikikojol ri nuwinaq richin xatok rey pa ruwi' ri nutinamit Israel.

⁸Yin xinwelesaj k'a el ri ajawaren chuwi-kiq'a' ri aj pa rachoch kan ri David, richin xinya' chawe rat. Jak'a rat man xaben ta achi'el xuben ri David ri nusamajel; rija' kan xutaqej ri nupixa' y xirutzeqelibej rik'in ronojel ránima, y ri rubanobal kan choj xuben chinuwech.

⁹Jak'a rat, xa kan janila k'a itzel ri abanalon-pe chikiwech konojel janipe' ri xeq'ax yan el chupan ri ajawaren. Rat xaya' kan awij chinuwech, y roma ri' xayek janila woyowal. Kan xe'abanala-qa kiwachibel ch'aqa' chik dios ri e banon rik'in q'eqapueq ri ya'erisan pa q'aq'.

¹⁰Roma k'a ronojel re' xtinya-pe ruk'ayewal pan iwi' rix ri ix aj pa rachoch ri Jeroboam; xkenk'is k'a konojel achi'a' ri e aj pan awachoch, y kan man jun k'a xtitotej kan, stape' yuqul o man yuqul ta pa samaj. Y keri' xkixinmes-el jumul chi'iwonojel, achi'el toq nimes-el q'ayis kichin ri chikopi'.

¹¹Xabachike chike ri aj pan awachoch ri xtiken chupan ri tinamit, xketij koma ri tz'i', y ri xkeken pa juyu' xketij koma aj-xik' taq chikopi'; roma keri' rubin ri Jehová.

¹²Y jak'a rat kayakatej y kabiyin pan awachoch. Y toq xkatapon chupan ri tinamit, jari' toq xtiken-qa ri awal ti ala'.

¹³Y konojel k'a ri winaqi' richin Israel xtikibisoj y xtikimuq rik'in oq'ej roma xa kan xaxe rija' ri xtimuq chire ri rijatzul ri Jeroboam. Y re' roma chikikojol ri e aj pa rachoch ri Jeroboam, kan xaxe k'a ri Abías ri utz juba' rubanon chuwech ri Jehová Dios richin Israel.

¹⁴Chirij re' ri Jehová kan xtucha' jun ru-rey richin nuya' pa ruwi' ri rutinamit Israel; y re rey re' xkeberuk'isa' ri aj pan awachoch toq xtapon ri q'ij.

¹⁵Ri Jehová xtuyikikej ri tinamit Israel achi'el nuk'uluwachij ri aj ri ek'o chuchi' raqen taq ya' toq nisilon ri ya'. Y xkeruk'uq-el jumul chuwech re utzilej ruwach'ulew ri xuya' chike ri iwati't-imama'. Y rix xkixrutalula-el k'a juk'an chik chire ri raqen-ya' Éufrates, roma xe'ipaba-q'anej ri paban-che' richin xiya' ruq'ij ri dios ixoq Astarté, y rik'in ri' xiyek royowal ri Jehová.

¹⁶Roma ri' ri Jehová xtumalij kan ri Israel roma ri rumak ri xuben ri Jeroboam, y roma chuqa' kan xuben chi xemakun konojel winaqi' richin Israel, xcha' ri Ahías.

¹⁷K'ari' ri rixjayil ri Jeroboam xyakatej k'a el y xuchop bey y xapon k'a pa tinamit Tirsá, y nok yan k'a apo pa ruchi-jay, jari' toq ri ti ala' xken-qa.

¹⁸Konojel k'a ri winaqi' aj-Israel xkimuq k'a el ri ti ala' y konojel kan janila k'a xkibisoj. Kan xbanatej k'a achi'el rubin ri Jehová chire ri rusamajel Ahías, ri q'alajirisey ruch'abel ri Dios.

¹⁹Ri ch'aqa' chik rubanobal ri Jeroboam, achi'el ri oyowal ri xeruben y ri rubanik ri ruq'atbal-tzij; ronojel re' e tz'ibatel kan chupan ri Wuj Ri Cholan Nich'on pa kiwi' ri rey.

²⁰Ri Jeroboam juwineq ka'i' juna' xq'aton-tzij pa ruwi' ri Israel, y k'ari' xuxlan-el y ri xk'oje' kan pa ruk'exel ja ri ruk'ajol rubini'an Nadab.

²¹Jak'a chupan ri tinamit Jerusalem ri cha'on kan roma ri Dios chikikojol ri tzobaj richin ri Israel richin chi chiri' niya'ox-wi ruq'ij rija', chupan ri tinamit ri', ja ri Roboam ri ruk'ajol kan ri Salomón jari' ri rey. Toq xok kan rey pa ruwi' ri ruwach'ulew Judá k'o k'a kawineq jun rujuna', y xq'aton k'a tzij wuqlajuj juna'. Ri rute' rija' rubini'an Naamá aj-Amón.

²²Ri winaqi' aj-Judá xa kan xkiben chuqa' ri etzelal, y roma ri' kan janila xkiyek royowal ri Jehová. Rije' kan más k'a xemakun chikiwech ri kati't-kimama'.

²³Rije' xekipaba-q'anej ri akuchi nikiya-wi ruq'ij ri wachibel ri pa ruwi' taq juyu', y chuqa' xekipaba-q'anej abej y che' richin nikiya' kiq'ij ri ki-dios. Re' xeban pa ronojel ruwi' taq juyu' y chuxe' taq che' ri jebel kimujal.

²⁴Chiri' pa Judá ek'o k'iy achi'a' ri kijachon-ki' chubanik ri itzel k'aslen richin xkiya' kiq'ij ri ki-dios. Rije' xekik'amala-apo ri itzel taq kibanobal ri ch'aqa' chik winaqi' ri xek'oje' chiri' ojer, y roma ri banobel ri' ri Jehová xerelesaj-el chuwech ri ruwach'ulew ri' toq xe'apon ri israelita chiri'.

²⁵Chupan ri ro' juna' richin ri q'atbel-tzij richin ri rey Roboam, jari' toq ri Sisac rey richin Egipto xberubana-q'anej oyowal rik'in ri chiri' pa Jerusalem.

²⁶Ri aj-labal richin Egipto xkik'uaj-el ronojel ri beyomel richin ri rachoch ri Jehová, y chuqa' ronojel ri beyomel richin ri rachoch ri rey. Chuqa' xekik'uaj k'a el ri tobel ri e banon rik'in q'anapueq ri rubanon kan ri rey Salomón.

²⁷Y roma ri' ri rey Roboam xeruben kik'exel ri tobel ri xe'uk'uex-el; xeruben k'a rik'in q'enq'oj-pueq, y richin xechajix xerujech pa kiq'a' ri aj-raqen ri yechajin richin ri rachoch rija'.

²⁸Y kan xaxe k'a toq ri rey nibe pa rachoch ri Jehová, jari' toq ri achi'a' ri chajinela' ri chiri' yekikusaj k'a ri tobel ri', y xeri' xa yebekiyaka' chik kan pa kik'ojelibal.

²⁹Y ri ch'aqa' chik banobel ri xerubanala' ri rey Roboam e tz'ibatel kan chupan ri Wuj Ri Cholan Nich'on pa kiwi' ri rey.

³⁰Y chijun k'a ri kik'aslen ri Roboam y ri Jeroboam, kan jantape' xk'oje' oyowalen chikikojol.

³¹Xuxlan k'a ri Roboam y xmuq akuchi e muqul-wi ri rute-rutata' pa rutinamit kan ri rey David, y ri rute' ri Roboam rubini'an Naamá aj-Amón. Y ri xk'oje' kan pa ruk'exel ja ri ruk'ajol ri rubini'an Abiam.