Read Kaqchikel 1 Rey 17 Bible Online

1 Rey 17 - Kaqchikel bible

1 Rey 17

¹Y k'o k'a jun q'ij k'o jun q'alajirisey ruch'abel ri Dios ri xch'on rik'in ri rey Acab. Y ri q'alajirisanel ri' rubini'an Elías, y rija' aj-Tisbé, ri k'o pa ruwach'ulew Galaad. Y ri Elías xubij chire: Chuwech ri k'aslik Jehová Dios richin Israel, ri achoq chuwech in pa'el wi yin, ninbij chawe chi man xtiqaqa ta job ni raxq'ab pa ruwi' re ruwach'ulew Israel, k'a ja toq xtinbij na yin, xcha'.

²K'ari' ri Jehová xch'on k'a rik'in ri Elías y xubij chire:

³Taya' kan re tinamit re', y kabiyin la juk'an chik ruchi' ri raqen-ya' Jordán, y tabewewaj-awi' ri chiri' chuchi' ri ti ch'uti'n raqen-ya' Querit.

⁴Chiri' chuchi' ri ch'uti'n raqen-ya' k'o ya' richin xtaqum; y yin xkenteq-el ri qo'ch awik'in richin yatkilij chiri', xcha'.

⁵Y ri Elías kan xbe k'a, y xuben achi'el xubij ri Jehová chire. Xbe k'a richin xbek'oje' chiri' chuchi' ri ch'uti'n raqen-ya' chiri' pa Querit ri k'o-apo la juk'an chire ri raqen-ya' Jordán, y xk'oje' k'a chiri'.

⁶Y ri qo'ch nikik'en-pe wey y ti'ij richin nimaq'a' y chuqa' keri' nikiben ronojel tiqaq'ij; y nuk'ya' k'a chiri' chuchi' ri ch'uti'n raqen-ya'.

⁷Y toq q'axineq chik janila k'iy q'ij, ri ch'uti'n raqen-ya' xchaqi'j roma kan man jun k'a job rubanon chiri' pa ruwach'ulew ri'.

⁸K'ari' ri Jehová xch'on chik k'a rik'in ri Elías y xubij chire chi

⁹ja yan ri' tibe pa tinamit Sarepta ri k'o pa ruwach'ulew Sidón, y chiri' tik'oje-wi, roma rija' rubin chik chire jun malka'n ixoq chi ja rija' ri nilin richin.

¹⁰Y keri' ri Elías xbe k'a pa Sarepta, y toq xapon chuchi' ri tinamit, jari' toq xutz'et jun malka'n ixoq ri k'o chiri' numol rusi'. Y ri Elías xroyoj-apo y xubij chire: Nink'utuj utzil chawe richin tak'ama-pe juba' nuya' richin ninqum, xcha'.

¹¹Y ri ixoq kan nibe yan k'a chuk'amik ri ya' toq ri Eliás xch'on chik y xubij: Chuqa' nink'utuj utzil chawe chi wi xa k'o ta kaxlan-wey awik'in, tak'ama-pe juba' wichin, xcha'.

¹²Y ri ixoq xubij: Chuwech k'a ri Jehová ri k'aslik a-Dios ninbij chi maneq kaxlan-wey wik'in, xaxe jun moq' k'ej ri k'o kan chupan ri bojo'y, y ti juba' ti aceite ri k'o kan chupan ri xára. Y wakami ninmol juba' ti nusi' richin ninchaq'arisaj jun kaxlan-wey qichin chi oj ka'i' rik'in ri ti wal. Xtiqatej k'a ri jun ti kaxlan-wey ri' y chirij ri' xqojken roma wayjal, xcha'.

¹³K'ari' ri Elías xubij chire: Man taxibij-awi'. Ri ach'obon richin naben, kan utz richin naben, xaxe k'a ri ninwajo' yin chi tabana-pe ri wichin yin nabey y nak'en-pe chuwe, y k'ari' xtaben ri awichin rat y richin ri ti awal,

¹⁴roma ri Jehová ri nu-Dios richin Israel nubij chi ri k'ej ri k'o chupan ri abojo'y, kan man xtik'is ta, ni ri aceite ri k'o chupan ri axára chuqa' man xtik'is ta; k'a toq xtiqaqa na ri job pa ruwi' ri ruwach'ulew, k'ari' xtik'is, keri' xubij ri Jehová chuwe, xcha' ri Elías.

¹⁵K'ari' ri ixoq xbe y xuben achi'el xbix-el chire roma ri Elías; xwa' k'a ronojel q'ij ri Elías, ri ixoq, y ri ti ral.

¹⁶Y ri k'ej ri k'o chupan ri bojo'y man xk'is ta, ni ri aceite ri k'o chupan ri xára, achi'el ri xbix chire ri Elías roma ri Jehová.

¹⁷Y toq q'axineq chik k'a ka'i-oxi' ik', jari' toq ri ti ral ri malka'n ixoq ri' xyawej, y jun yabil janila k'ayew ri xchapo richin, kan janila k'a xnimatej y xken.

¹⁸Y ri ixoq ri' xubij chire ri Elías: ¿Achike xinmakuj yin chawech, rat ri at rusamajel ri a-Dios? ¿At peteneq wik'in chunataxik ronojel ri itzel nubanobal, y roma ri' xken ri ti wal?, xcha'.

¹⁹K'ari' ri Elías xubij chi tuya' ri ti ral chire. Ri te'ej ruli'en k'a ri ak'ual, y ri Elías xuch'elej-el y xuk'uaj-q'anej pa jay ri okineq ruwarabel, y xuliba-qa pa ruch'at.

²⁰Y rik'in k'a ronojel uchuq'a' xch'on rik'in ri Jehová y xubij chire: ¡Jehová Dios wichin yin! ¿Achike roma xak'en-pe bis pa rachoch re ixoq re akuchi wuxqanen-wi-wi', y xaben richin xken ri ti ral?, xcha'.

²¹Y ri Elías kan xjupe' k'a qa oxi' mul chirij ri ak'ual, y xubij chire ri Jehová: ¡Jehová Dios wichin yin! Nink'utuj utzil chawe richin taya' chik ruk'aslen re ak'ual re', xcha'.

²²Y ri Jehová kan xrak'axaj k'a ri ruch'abel ri Elías, y ri ak'ual xtzolin-pe ri ránima rik'in y xk'astej chik.

²³K'ari' ri Elías xuyek-q'anej ri ak'ual y xuk'uaj-qa pa jay ri pa xulan-qa, y xberuya' chire ri rute' y xubij chire: Ja ti awal re', wakami k'es chik, xcha'.

²⁴K'ari' ri ixoq xubij chire ri Elías: Wakami niq'ax chinuwech chi rat kan at jun achin richin ri Dios, y kan ja ri qitzij ruch'abel ri Jehová ri nanataj, xcha'.