Read Kaqchikel 1 Rey 18 Bible Online

1 Rey 18 - Kaqchikel bible

1 Rey 18

¹Toq q'axineq chik k'a ri q'ij, chupan ri rox juna', ri Jehová xch'on chik rik'in ri Elías y xubij chire: Kabiyin y tabek'utu-awi' chuwech ri Acab, y yin kan xtinben chi xtipe job chuwech re ruwach'ulew, xcha'.

²K'ari' ri Elías xbe richin niberuk'utu-ri' chuwech ri Acab. Y ri wayjal ri chiri' pa Samaria kan janila k'ayew rubanon.

³Y ri chiri' pa Samaria k'o k'a jun achin aj-raqen pa kiwi' konojel ri yesamej pa rachoch ri rey, y ri achin ri' rubini'an Abdías, y rija' kan nuya' k'a ruq'ij ri Jehová. Rokik ri Jezabel ruchapon kikamisaxik konojel q'alajirisey ruch'abel ri Jehová, ri Abdías xerumol k'a e wok'al chike rije', y xerewaj kan pa ka'i' jul, kawineq lajuj pa jujun tzobaj ri xuben chike, y xerutzuq k'a konojel. Y ri rey Acab xroyoj k'a ri Abdías,

⁴

⁵y xubij chire: Jo', tibeqatz'eta' chupan chijun ruwach'ulew akuchi ek'o-wi ri ralaxbal taq ya' y akuchi ek'o ri ch'uti'n raqen taq ya'. Rik'in juba' xa niqil q'os kichin ri kiej y ri bur richin man yeken ta roma wayjal, roma wi man xtiqaben ta keri', xa kan man jun chik qakiej xtik'ase' kan, xcha'.

⁶Y keri' rije' xkich'er k'a ri ruwach'ulew chikiwech richin chi kan pa ronojel tinamit ye'apon-wi. Ri Acab xbe kan pa jun bey, y ri Abdías juk'an chik bey xbe-wi kan.

⁷Y toq ri Abdías xbe ri akuchi k'o chi xbe-wi rija', jari' toq xbekik'ulu-pe-ki' rik'in ri Elías. Y ri Abdías kan xretamaj ruwech ri Elías y kan jari' xuqasaj-qa-ri' k'a pan ulew chuwech y xubij chire: ¿Ja rat ri' ri at wajaw Elías?, xcha'.

⁸Y ri Elías xubij: Ja' ja yin. Wakami kabiyin, y tabebij chire ri awajaw ri rey chi yin Elías ink'o wawe', xcha' chire.

⁹Jak'a ri Abdías xubij chire: ¿Achike k'a numakun yin ri in asamajel richin yinajech pa ruq'a' ri Acab richin yirukamisaj?

¹⁰Chuwech k'a ri k'aslik Jehová ri qa-Dios ninbij-wi chi konojel ri ruwach'ulew y q'atoy taq tzij ri akuchi rutaqon-wi akanoxik ri wajaw, konojel kibin-pe chi man atk'o ta chiri'. Y toq keri' nikibij-pe rije', ri Acab kan xuben chike chi nikijikiba' ri kitzij chi man atk'o ta chupan ri kiruwach'ulew.

¹¹Y wakami rat nabij chuwe chi yibe rik'in ri wajaw y ninbenbij chire chi rat atk'o wawe'.

¹²Rik'in juba' xa xtik'uluwachitej chi toq yin yibe, ri ru-espíritu ri Jehová xa xkaruk'uaj chik el juk'an, akuchi ri man wetaman ta yin. Y wi yin ninbenya' rutzijol chire ri Acab y rija' xa man yaril ta chik re wawe', jari' k'a toq rija' xkirukamisaj yin, y kan man ruk'amon ta k'a chi keri' nibanatej wik'in roma yin xa kan k'a in ala' na toq nuya'on-pe ruq'ij ri Jehová.

¹³¿Man awak'axan ta k'a ri xinben yin chi toq ri Jezabel xerukamisaj ri e rusamajela' ri Jehová?, yin xenwewaj e wok'al q'alajirisey ruch'abel rija'; xench'er pa ka'i' tzobaj y xenwewaj pa ka'i' jul, y xentzuq chiri'.

¹⁴¿Y wakami rat nabij chuwe chi yibe rik'in ri wajaw y ninbenbij chire chi rat atk'o wawe'? Xa kan xkirukamisaj k'a, xcha' ri Abdías.

¹⁵Y ri Elías xubij chire: Chuwech k'a ri k'aslik Jehová k'iytisanel richin ronojel, ri achoq chuwech ink'o-wi, ninbij chawe chi kan ja re wakami xtink'ut-wi' chuwech ri Acab, xcha' ri Elías.

¹⁶K'ari' ri Abdías xberuk'ulu-ri' rik'in ri Acab, y xuya' rutzijol chire chi xberuk'ulu-pe ri Elías.

¹⁷Chirij ri' ri Acab xberutz'eta' ri Elías y xubij chire: ¿Ja rat ri' ri yasachon kik'u'x ri qawinaq israelita?, xcha'.

¹⁸Y ri Elías xubij: Yin man nusachon ta kik'u'x ri qawinaq israelita: Ja rat y ri ek'o pa rachoch ri atata'. Rix xa xiya' k'a kan ri rupixa' ri Jehová richin xe'itzeqelibej ri Baal.

¹⁹Tataqa' k'a rubixik chike ri winaqi' aj-Israel chi tikimolo-ki' wik'in yin ri chiri' pa ruwi' ri juyu' Carmelo, y chuqa' chi tikimolo-ki' ri e 450 achi'a' ri yesamajin kichin ri Baal, y ri e 400 achi'a' ri yesamajin kichin ri Asera, ri yetzuq roma ri Jezabel, xcha' ri Elías.

²⁰Keri' ri Acab xuteq k'a rubixik chupan chijun ruwach'ulew, y xerumol k'a konojel winaqi' y ri achi'a' ri yesamajin kichin ri Baal, ri chiri' pa ruwi' ri juyu' Carmelo.

²¹Y toq ri winaqi' ek'o chik chiri', jari' toq ri Elías xubij chike: ¿K'a janipe' k'a xkixtane' rix richin chaq kaka' ik'u'x? Wi ja ri Jehová jari' ri Dios titzeqelibej k'a rija'. Y wi ja ri Baal, kixbiyin k'a chikij rije', xcha' chike. Y ri winaqi' kan man jun k'a xkibij chire.

²²Chirij ri' xubij chik chike: Xaxe chik yin ink'o kan chike ri e q'alajirisey ruch'abel ri Jehová. Jak'a ri achi'a' ri yesamajin kichin ri Baal ek'o e 450.

²³Wakami k'a ke'ik'ama-pe ka'i' achij wákix; jun kichin ri achi'a' ri yesamajin kichin ri Baal, y ri jun chik wichin yin. Rije' xtikik'ajij k'a ri wákix ri kichin rije', y xtikiya' pa ruwi' ri si' pa ruwi' ri porobel, jak'a man nikiya' ta ruq'aq'al. Y yin chuqa' xtinchojmirisaj ri jun wákix, y xtinya' k'a pa ruwi' ri si' pa ruwi' ri porobel, jak'a man xtinya' ta chuqa' ruq'aq'al.

²⁴K'ari' rije' ri yesamajin kichin ri Baal xtikik'utuj to'onik chike ri ki-dios, y yin chuqa' xtink'utuj to'onik chire ri Jehová. Y ri Dios ri xtitaqon-pe q'aq' pa ruwi' ri porobel, jari' ri qitzij Dios, xcha' ri Elías. Y konojel ri winaqi' xkibij chi kan utz ri xubij.

²⁵K'ari' ri Elías xubij chike ri achi'a' ri yesamajin kichin ri Baal chi tikichapa' jun kiwákix, y tikichojmirisaj rije' nabey, roma ja rije' ri más e k'iy; y tikik'utuj k'a to'onik chike ri ki-dios, jak'a man nikiya' ta ruq'aq'al.

²⁶Ri achi'a' ri' xkikamisaj k'a ri kiwákix y xkichojmirisaj pa ruwi' ri porobel, y k'ari' xkichop nikik'utuj to'onik chike ri Baal. Xkichop k'a ri ch'owen ri' nimaq'a' yan, y nikibila' k'a: ¡Baal kach'on-pe chiqe! Yecha'. Jak'a man jun nich'on-pe chike. Y rije' kan yeropilan k'a chirij ri porobel ri kibanon-q'anej. Y keri' nikiben xapon ri nik'aj-q'ij.

²⁷Jari' toq ri Elías niyojoben-apo chikij y xubij chike: Kixsik'in kow, roma rija' kan dios-wi, rik'in juba' xa xbechulun kan, o k'o jun rusamaj nuben, o xa xbebiyaj, o rik'in juba' xa niwer y k'o chi nik'asoj, xcha' ri Elías chike.

²⁸Y keri' rije' kan janila yesik'in, nikisokola' k'a ki' rik'in qupibel y rik'in kokoj taq kum, roma kan keri' wi nikiben; kan k'a ja na ri nibiyin kikik'el.

²⁹Xq'ax k'a ri nik'aj-q'ij y rije' chaq k'a janila yesik'in richin yech'on pa kibi' ri ki-dios, y keri' nikiben, k'a xapon na ri tiqaq'ij toq nisuj ri kamelabel chiri' pa rachoch ri Jehová, y man xk'ulubex ta pe ri kich'abel, kan man jun xch'on-pe kik'in, y ni man xe'ak'axex ta.

³⁰K'ari' ri Elías xubij chike konojel ri winaqi' chi kejel-apo rik'in. Y konojel k'a ri winaqi' xejel-apo rik'in, y rija' xuchojmirisaj-q'anej ri porobel richin ri Jehová ri wulatejineq kan.

³¹Xrukusaj k'a kablajuj abej achi'el ri kajlabal ri tzobaj ri e ruk'ajol kan ri Jacob, ri chuqa' rubini'an Israel roma ri Jehová xujel ri rubi'.

³²Xupaba' k'a q'anej chuwech ri Jehová ri porobel rik'in ri abej ri'. K'ari' xuben jun jul pan ulew chuchi' ri porobel, y ri jul ri' nibe juwineq lajuj litro ya' chupan.

³³Xuchojmirisaj-q'anej ri si' y xuk'ajij ri wákix, y k'ari' xuya-q'anej pa ruwi' ri si'.

³⁴Y xubij chi tibekik'ama-qa kaji' kuku' ya', y tikikaq'uj kan pa ruwi' ri chikop richin nich'eqe' ronojel ri si', y keri' tikibana' oxi' mul. Y rije' kan keri' xkiben.

³⁵Ri ya' kan nibiyin k'a chuchi' ri porobel, y ri jul kan xnoj k'a chire ri ya'.

³⁶Toq xek'achoj chire ronojel re', jari' toq ri Elías ri q'alajirisey ruch'abel ri Dios xpa'e' chikiwech ri winaqi', xch'on, y xubij: Jehová Dios richin ri Abraham, ri Isaac y ri Jacob: Tak'utu' k'a awi' wakami chi kan ja rat ri at qa-Dios richin Israel, y chi yin in asamajel rat y chi yin xinben ronojel re', achi'el ri abin chuwe.

³⁷Kinawak'axaj, Jehová, kinawak'axaj; richin keri' tiketamaj re winaqi' re' chi kan ja rat ri at Jehová Dios, y tabana' chike chi xtitzolej-pe ri kánima awik'in rat, xcha'.

³⁸Y kan jari' ri q'aq' richin ri Jehová xqaqa-pe chila' chikaj, y ri q'aq' ri' xuk'is ri chikop y ri si', ri abej, ri ulew ri akuchi k'o-wi ri porobel, y kan xuk'is ronojel ri ya' ri k'o chupan ri jul.

³⁹Y toq xkitz'et konojel ri winaqi' ri', kan kexukuk xeqaqa pan ulew y rik'in ronojel kuchuq'a' xkibij: ¡Ri Jehová jari' ri Dios! ¡Ri Jehová jari' ri Dios!, xecha'.

⁴⁰K'ari' ri Elías xubij chike: Ke'ichapa' ri achi'a' ri yesamajin kichin ri Baal, y man jun chike rije' tanimej chiwech. Y ri winaqi' xekichop k'a ri achi'a' ri', y xkitzeqelibej ri Elías k'a chuchi' ri ch'uti'n raqen-ya' Quisón, y chiri' xuqupij ri kiqul y xeken.

⁴¹K'ari' ri Elías xubij chire ri Acab: Kabiyin richin yabewa-yatuk'ya', roma kan niq'ajan chik ruch'abel jun nimalej job, xcha'.

⁴²Rokik ri Acab xwa-xuk'ya', ri Elías xjote-el pa ruwi' ri juyu' Carmelo, y xxuke-qa pan ulew richin xch'on rik'in ri Jehová, y ri rujolon xapon k'a chukojol ri ruch'ek.

⁴³Y ri Elías xubij chire ri rusamajel chi tijote-el pa ruwi' ri juyu', y titzu'un pa ruchojmilal ri palou. Y ri rusamajel keri' xuben, y toq xtzolej xubij chi man jun sutz' k'o. Y ri Elías wuqu' k'a mul xuteq ri rusamajel richin nibetzu'un kan.

⁴⁴Chupan ri ruwuq mul ri rusamajel xubij: Yin nintz'et jun ko'ol sutz' achi'el ruq'a' jun wineq ri jotol-pe pa ruwi' ri palou, xcha'. Y ri Elías xubij chire chi tibe richin niberubij chire ri Acab chi tuchojmirisaj ri ru-carruaje y titzolin chi'anin, roma man xa tuq'et-qa job pa bey.

⁴⁵Jari' toq ri kaj xq'equmer-pe roma ri sutz', y janila kaq'iq' xpe. Y xpe k'a jun nimalej job, y ri Acab xbe chupan ri ru-carruaje richin xbe pa tinamit Jezreel.

⁴⁶Y ri Jehová xuya-el ruchuq'a' ri Elías y xuchojmirisaj-el-ri' richin xanin-el, y xapon nabey chuwech ri Acab pa Jezreel.