Read Kaqchikel 1 Rey 19 Bible Online

1 Rey 19 - Kaqchikel bible

1 Rey 19

¹Ri Acab xutzijoj k'a chire ri Jezabel ri rixjayil, ronojel ri xuben ri Elías chike konojel ri achi'a' ri xesamajin kichin ri Baal toq xerukamisaj chi espada.

²Y kan jari' toq ri Jezabel xuteq-el jun uk'uey rutzijol rik'in ri Elías richin nubij chire: Ri dios e wichin yin kan xtikiya' k'a ruk'ayewal pa nuwi' y kan xkinkikamisaj, wi ke taq wa chua'q man at nukamisan ta, achi'el xaben rat chike ri achi'a' ri xesamajin kichin ri Baal, xcha-el.

³Toq ri Elías xrak'axaj keri', kan xuxibij-ri' y xanimej-el richin xukol-el ri ruk'aslen. Y toq xapon pa tinamit Beerseba ri k'o pa ruwach'ulew Judá, chiri' xuya-wi kan ri rusamajel.

⁴Y ri Elías xbe pa tz'iran ruwach'ulew ri k'o pa xokon, y jun q'ij k'a ri xbiyin. Y kan janila k'a kosineq, xbetz'uye' chuxe' jun ti che' achi'el q'echa' rubanik, y xpe ri ch'obonik rik'in chi más ta utz niken y roma ri' xubij: Jehová, yin man ninkoch' ta chik; más utz tawelesaj ri nuk'aslen, roma yin man más ta in utz chikiwech ri wati't-numama', xcha'.

⁵Y xkotz'e-qa chuxe' ri che' y xbe-qa chi waran. Y xok'ulun-qa jun ángel rik'in, xuyikiya' y xubij chire chi tiyakatej richin nutej ruway.

⁶K'ari' rija' k'ulan xtzu'un y jari' toq xutz'et chi chunaqaj ri ruch'akat-ruwi', k'o kan jun kaxlan-wey ponon ri k'o kan pa ruwi' ri racheq-q'aq' y jun xára ya'. K'ari' xwa-xuk'ya' y xwer chik qa jun bey.

⁷Y ri ángel richin ri Jehová xpe chik rik'in pa ruka'n mul, xuyikiya' y xubij chire: Kayakatej y kawa', roma k'a janila k'iy bey k'o chawij, xcha'.

⁸Y keri' rija' xyakatej y xwa-xuk'ya'; y kan xk'oje' chik el ruchuq'a' roma ri wa'in ri'. Ri rubinen xuk'uaj k'a kawineq q'ij y kawineq aq'a', y keri' xapon k'a pa juyu' Horeb, ri juyu' richin ri Dios.

⁹Y toq k'o chik chiri', xukanoj jun jul, y chiri' xuq'axaj-wi ri aq'a'. Y jari' toq ri Jehová xch'on rik'in y xuk'utuj chire achike nuben chiri'.

¹⁰Y ri Elías xubij chire: Jehová Dios k'iytisanel richin ronojel: Yin kan at nutzeqeliben k'a pe y man jun bey at nuya'on kan. Jak'a ri nuwinaq israelita xa xkich'er kan ki' chire ri ajikibel-tzij. Xekiwulaj-el ri porobel akuchi niya'ox-wi aq'ij rat, y rik'in espada xekikamisaj ri e q'alajirisey ach'abel. Xaxe chik k'a yin ri xikolotej kan, y wakami yinkikanoj richin nikelesaj chuqa' ri nuk'aslen yin, xcha'.

¹¹Ri Jehová xubij chire chi rija' xtiq'ax-el chiri' y chi ri Elías tel-pe chupan ri jul y tipa'e' chuchi'. Y ri Jehová xuchop niq'ax chiri' y xuteq-pe jun nimalej kaq'iq' y ri kaq'iq' ri' xerusiloj ri juyu' y kan xepax ri abej chuwech ri Jehová, jak'a ri Jehová man beneq ta chupan ri kaq'iq' ri'. Y chirij ri kaq'iq' xpe jun nimalej silonel, jak'a ri Jehová maneq chupan ri silonel ri'.

¹²Y chirij ri silonel, xqaqa-pe jun koyopa', jak'a ri Jehová maneq chupan ri koyopa' ri'. Y chirij ri koyopa' ri' xbewalel-pe jun ti kaq'iq'.

¹³Toq ri Elías xrak'axaj re' xutz'apej ruwech rik'in jun ko'ol raqen rutziaq, xel-el y xbepa'e' chuchi' ri jul. K'ari' ri Jehová Dios xch'on chik pe rik'in y xubij chire: ¿Achike naben wawe' rat Elías?, xcha'.

¹⁴Y ri Elías xubij chire: Jehová Dios k'iytisanel richin ronojel: Yin kan at nutzeqeliben k'a pe y man jun bey at nuya'on kan. Jak'a ri nuwinaq israelita xa xkich'er kan ki' chire ri ajikibel-tzij. Xekiwulaj-el ri porobel akuchi niya'ox-wi aq'ij rat, y rik'in espada xekikamisaj ri e q'alajirisey ach'abel. Xaxe chik k'a yin ri xikolotej kan, y wakami yinkikanoj richin nikelesaj chuqa' ri nuk'aslen yin, xcha'.

¹⁵Y ri Jehová xubij chire ri Elías: Katzolej y tachapa-el ri bey richin ri tz'iran ruwach'ulew ri nibe pa tinamit Damasco. Y toq xkatapon, naqasaj aceite pa ruwi' ri Hazael richin nok kan rey richin ri Siria.

¹⁶Y chuqa' naqasaj aceite pa ruwi' ri jun achin rubini'an Jehú rumam ri Nimsí richin nok kan rey pa ruwi' ri Israel. Y ri jun achin rubini'an Eliseo ruk'ajol ri Safat aj-Abel-meholá, xtaqasaj aceite pa ruwi' richin nok kan q'alajirisey nuch'abel pan ak'exel rat.

¹⁷Kere' k'a xtibanatej kik'in ri winaqi' ri xkiya' kiq'ij ri Baal: Ri Hazael xkeruteq pa kamik chi espada; y janipe' ri xke'animej, k'a pa ruq'a' ri Jehú xketzaq-wi; y wi k'o ta jun ri xtikolotej kan pa ruq'a' ri Jehú, xtiqaqa pa ruq'a' ri Eliseo.

¹⁸Jak'a yin kan e nuch'aron kan e 7,000 winaqi' aj-Israel ri man xexuke' ta chikiwech ri Baal ni man xkitz'ubaj ta, xcha' ri Jehová.

¹⁹Toq ri Elías tzolejineq-pe chiri', jari' toq xberila-el ri Eliseo ruk'ajol ri Safat ri nisamej pa jun ulew. Chuwech rija' e ik'owineq-el kablajuj k'ulaj bóyix, y ja rija' uk'uayon ri ruk'isibel k'ulaj bóyix. Y ri Elías kan choj xbe k'a rik'in richin xuya' ri ko'ol raqen rutziaq chirij.

²⁰Y ri Eliseo kan jari' xuya' kan ri rusamaj kik'in ri bóyix, y jari' junanin xbe chirij ri Elías, y xubij chi tuya' q'ij chire richin nibech'on kan chike ri rute-rutata', y k'ari' xtutzeqelibej-el. Y ri Elías xubij: Kabiyin k'a, yin man yatinq'et ta, xcha'.

²¹Y keri' ri Eliseo xuya' kan ri Elías y xtzolin. Xeberuk'ama-pe ri k'ulaj bóyix ri kan e richin rija' y xerukamisaj, y ri che' ri samajibel ri achoq ik'in yetun-wi ri bóyix, jari' ri xukusaj richin xuchaq'arisaj ri ti'ij y jari' ri xuya' chike ri winaqi' ri xeroyoj, y rije' kan xewa' k'a. K'ari' ri Eliseo xbe chirij ri Elías richin nusamajij.