Read Kaqchikel 1 Rey 20 Bible Online

1 Rey 20 - Kaqchikel bible

1 Rey 20

¹K'ari' ri Ben-hadad rey richin Siria, xerumol konojel ri aj-labal, y rija' ek'o k'a e juwineq kablajuj rey ri yeto'on richin, y re rey re' kan ek'o k'a k'iy ki-kiej y k'iy ki-carruaje. Xebe k'a el y xbekisutij-rij ri tinamit Samaria y xkiben k'a oyowal rik'in.

²Y ri Ben-hadad xeruteq k'a uk'uey rutzijol pa tinamit, rik'in ri Acab rey richin Israel, y xubij-el chire:

³Kere' rubin-pe ri rey Ben-hadad: Ri saqipueq, ri q'anapueq e wichin chik yin, y chuqa' ri awixjayilal y ri awalk'ual ri más e jebel e wichin chik yin, nicha' ri rey, xecha'.

⁴Y ri rey richin Israel kere' xubij chike ri uk'uey rutzijol: Kan keri', achi'el ri nabij rat rey wajaw, yin in awichin k'a rat y ronojel ri k'o wik'in, xcha' ri Acab chike ri uk'uey rutzijol.

⁵Y toq ri samajela' ri' xe'apon rik'in ri Ben-hadad, rija' xa xeruteq chik jun bey rik'in ri Acab y xbekibij chire: Ri saqipueq y ri q'anapueq, ri awixjayilal y ri awalk'ual kan xke'aya' chuwe.

⁶Ri ke taq wa chua'q xkenteq-el ri nusamajela'. Y rije' xtibekinik'oj ri awachoch, y ri kachoch ri aj-raqen ri ek'o awik'in. Xtikichop k'a pe ronojel ri k'o rejqalen y xtikik'en-pe, xcha-el.

⁷K'ari' ri rey Acab xerumol konojel ri achi'a' ri k'o kiq'ij richin chijun ruwach'ulew Israel, y xubij chike: Rix nitz'et chi re achin re' xa kan xaxe k'a ri etzelal ri nrajo' nuben chuwe, stape' yin xinbij yan chire richin yenya' el ri wixjayilal, ri walk'ual y ri nubeyomel chire, xcha' chike.

⁸Konojel k'a ri achi'a' ri' y konojel ri winaqi' xkibij chire chi man tiniman chire, ni man keruya-el chire ri xeruk'utuj.

⁹K'ari' ri Acab xeroyoj ri e uk'uey rutzijol richin ri Ben-hadad y xuteq-el rubixik chire: Yin ri in asamajel xtinben ri abin-pe pa nabey, jak'a ri xabij-pe pa ruka'n mul, man yitikir ta ninben, xcha-el. Y ri uk'uey rutzijol kan xbekibij k'a chire ri Ben-hadad.

¹⁰Y ri Ben-hadad xuteq chik rubixik chire ri rey Acab: Yin xkenk'en k'a pe janila chi achi'a' richin chi nikiwulaj ri atinamit; y kan man jun chik k'a xtik'oje' kan, ni poqolaj richin ta chi nikimoq'ej-el ri achi'a' ri'. Wi yin man xtinben ta keri', ri nu-dios xa kan xtikiya' k'a ruk'ayewal pa nuwi' yin y pa ruwi' ri nutinamit achi'el ri xinwajo' xinben chiwe rix, xcha-el chike.

¹¹Y ri rey richin Israel xubij chike ri e uk'uey rutzijol: Tibij k'a chire ri i-rey chi man tunimirisaj yan ri', roma xa k'ari' nuxim ri rukamisabal chirij y man achi'el ta ri jun ri nukir kan ri rukamisabal roma xtzolej yan pe pan oyowal, xcha'.

¹²Y ri rey Ben-hadad xrak'axaj ri xbekibij ri e uk'uey rutzijol, rokik rija' xa niqumun junan kik'in ri ch'aqa' chik rey ri e rachibilan chiri' akuchi ek'o-wi-qa. Jari' toq ri Ben-hadad xubij chike ri aj-raqen pa kiwi' ri aj-labal chi tikichojmirisaj-ki' y keyakatej-el. Y ri achi'a' ri' kan keri' k'a xkiben.

¹³Jari' toq jun q'alajirisey ruch'abel ri Dios xch'on rik'in ri Acab y xubij chire: Kere' rubin-pe ri Jehová: Stape' rat ye'atz'et e janila chi etzelanel awichin, jak'a yin xkenjech pan aq'a' re wakami. Xtinben kere' richin nawetamaj chi ja yin Jehová, nicha' ri Jehová, xcha' chire.

¹⁴Y ri Acab xuk'utuj chire achoq pa ruq'a' k'a xkerujech-wi. Y ri q'alajirisey ruch'abel ri Dios xubij: Ri Jehová rubin k'a pe chi xkerujech pa kiq'a' ri samajela' ri yeto'on kichin ri e tata'al kichin ri kokoj taq ruwach'ulew richin Israel. Y ri Acab xuk'utuj k'a chi achike ri xtitikeriban-q'anej ri oyowal ri'. Y ri q'alajirisey ruch'abel ri Dios xubij: Ja rat ri xkatikeriban-q'anej, xcha' chire.

¹⁵Y keri', ri rey Acab xerumol ri to'onela' kichin ri tata'al, y ri kajlabal ek'o k'a e 232 konojel. K'ari' xerumol konojel ri aj-labal, y ri kajlabal ek'o k'a e 7,000 konojel.

¹⁶Y rije' xe'el k'a el pa tinamit Samaria pa nik'aj-q'ij; y ri Ben-hadad y ri e juwineq kablajuj rey ri e peteneq rik'in xa xeq'aber-qa chiri' akuchi ek'o-wi-qa.

¹⁷Jari' toq ri to'onela' kichin ri e tata'al xebe nabey. Y jun chike ri chajinela' richin ri Ben-hadad xberubij chire chi ek'o aj-labal ri eleneq-pe pa Samaria ri e peteneq.

¹⁸Y ri Ben-hadad xubij: Xabachike k'a ri kich'obonik e peteneq, kan ke'ik'ama-pe chuwe keri' e k'es: Wi e peteneq rik'in uxlanibel-k'u'x o richin nokibana' labal qik'in, xcha'.

¹⁹Y toq ri to'onela' kichin ri e tata'al xe'ik'o-el richin yebe pan oyowal, k'a chikij chik rije' xe'el-el ri aj-labal aj-Israel.

²⁰Y rije' kan xekikamisaj k'a ri etzelanel kichin, y ri ch'aqa' chik aj-Siria xe'animej k'a y xetzeqelibex-el koma ri aj-Israel. Jak'a ri rey Ben-hadad xanimej-el chirij jun kiej e rachibilan-el ka'i-oxi' aj-labal ri yech'oke' chirij kiej.

²¹Y ri Acab ri rey richin Israel xel chuqa-el y xberubana' oyowal kik'in ri aj-Siria y xeruch'ek, y xeruchop-pe ri kikiej y ri ki-carruaje.

²²Chirij ri' ri q'alajirisey ruch'abel ri Dios xapon chik jun bey rik'in ri rey Acab y xubij chire: Ke'amolo' ch'aqa' chik kachibil ri aj-labal richin chi k'o kuchuq'a'. Y tatz'eta' achike ri naben roma pa jun apo juna' ri rey richin Siria xtipe chik richin norubana' oyowal awik'in, xcha'.

²³Y chiri' pa ruwach'ulew Siria, ri e aj-samaj richin ri rey Ben-hadad xkibij chire chi ri ki-Dios ri aj-Israel e dios richin juyu', y jari' ri xbanon chi rije' más kuchuq'a' chikiwech ri winaqi' richin Siria. Jak'a wi ri aj-Siria nikiben ta oyowal kik'in ri aj-Israel pa jun taq'aj, kan jujik-wi chi ja ri aj-Siria ri xkech'akon.

²⁴Y xkibij chuqa': Kan ke'awelesaj k'a el konojel ri rey ri yeto'on awichin, y pa kik'exel rije' ke'aya' kan achi'a' aj-raqen kichin ri aj-labal.

²⁵Y rat ke'amolo' chik ch'aqa' aj-labal, ri kik'exel janipe' ri xetzaq kan pan oyowal. Chuqa' ke'amolo' ch'aqa' chik kiej y carruaje, kik'exel ri kiej y ri carruaje ri xechap kan pan oyowal, y keri' kan xqojtikir kik'in ri aj-Israel pa jun taq'aj. Tatz'eta' na pe chi kan jujik-wi chi ja roj ri xqojch'akon, xecha'. Y ri Ben-hadad kan xuben k'a achi'el ri xbix chire.

²⁶Y toq q'axineq chik k'a jun juna', ri rey Ben-hadad xerumol k'a konojel ri aj-labal aj-Siria ri ek'o rik'in, y k'ari' xbe-el pa tinamit Afec richin niberubana' oyowal kik'in ri aj-Israel.

²⁷Keri' chuqa' ri aj-labal aj-Israel xkimol-ki', y xe'ajlex y xya'ox-el kiway. Man xkoyobej ta na chi ye'apon ri etzelanel kichin, jak'a xa xe'el-el chikik'ulik. Y toq xe'apon akuchi ek'o-wi-qa ri aj-Siria, xkitz'et chi ri aj-Israel xa e achi'el ok ka'i' tzobaj taq tzuntzun, jak'a ri aj-Siria kan kitz'apen ruwech ri ruwach'ulew roma janila e k'iy.

²⁸Xpe k'a jun achin richin ri Dios rik'in ri Acab rey richin Israel y xubij chire: Kere' nubij ri Jehová: Roma ri aj-Siria nikibij chi yin xa in Jehová Dios richin ri juyu', y man in Dios ta richin ri taq'aj ri ek'o kojol taq juyu', roma ri' yin xkenjech re janila chi winaqi' re' pan aq'a', y rat xtawetamaj chi ja yin Jehová, nicha' ri Dios, xcha'.

²⁹Wuqu' k'a q'ij xek'oje' chiri' nikitzula-ki', y k'a ja chupan ri wuqu' q'ij xchapatej ri oyowal. Ri achi'a' israelita e richin oyowal, ri q'ij ri', xekikamisaj k'a e 100,000 aj-labal aj-Siria ri e beneq chikaqen.

³⁰Jak'a ri ch'aqa' chik aj-labal aj-Siria xe'animej y xebe k'a pa tinamit Afec. Y ri chiri' xa xbewuluwu-pe chikij ri tz'aq ri rusutin-rij ri tinamit, y xeken k'a ri e 27,000 aj-labal ri kikolon-el ki'. Ri rey Ben-hadad chuqa' xanimej-el y xapon chupan ri tinamit ri', y xok pa jun jay y xberewaj-ri' chiri'.

³¹K'ari' ri aj-samaj richin ri Ben-hadad xkibij chire: Roj qak'axan-pe chi ri e rey re wawe' pan Israel janila e joyowanel. Qakusaj k'a el ri qatziaq richin bis y tiqaya' el jun kolo' chiqaqul, y jo' rik'in ri rey Acab, rik'in juba' xa yojrukol kan y man yojrukamisaj ta, xecha' chire.

³²Y ri e aj-samaj richin ri rey xkikusaj k'a el ri kitziaq richin bis y xkiya' k'a el kolo' chikiqul y xebe k'a rik'in ri Acab ri rey richin Israel y xkibij chire: Ri asamajel Ben-hadad nubij-pe chi takuyu' rumak y taya' kan ruk'aslen, xecha'. Y ri Acab xuk'utuj wi k'a k'es na rija', y xubij chi ri Ben-hadad xa kan achi'el jun rach'alal.

³³Y ri achi'a' ri' toq xkak'axaj ri ch'abel ri xubij ri Acab, kan jun utzilej retal xkak'axaj rije' y roma ri' xkibij chire: Ja', jari' ri Ben-hadad ri awach'alal y k'a k'es na, xecha'. Y ri Acab xubij chike chi tibekik'ama' ri Ben-hadad. Y toq xapon rik'in ri Acab, kan xujotoba-q'anej rik'in chupan ri ru-carruaje.

³⁴Jari' toq ri Ben-hadad xubij chire ri Acab chi xkerutzolij ri tinamit ri e rumajon kan ri rutata' rija' chire ri rutata' ri Acab. Y ri Ben-hadad xuya' q'ij chire ri Acab chi kerubana' jay richin k'ayij pa tinamit Damasco achi'el xuben ri rutata' rija' ri chiri' pa Samaria. Y ri Acab xubij chire chi wi keri', rija' kan xtuya' k'a el q'ij chire richin nitzolej pa Damasco. Y keri' ri Acab xuben k'a jun jikibel-tzij rik'in ri Ben-hadad, y xuya-el q'ij chire richin xbe.

³⁵K'o k'a jun achin kachibil ri jun molaj achi'a' e q'alajirisey ruch'abel ri Dios. Rija' xubij k'a chire ri jun chike ri e rachibil chi tusoko' roma keri' rubin ri Dios. Stape' keri' rubin ri Dios, ri rachibil man xrajo' ta xusok.

³⁶Y ri q'alajirisey ruch'abel ri Dios kere' xubij chire ri rachibil: Roma man xanimaj ta rutzij ri Jehová, kan xaxe xtach'er kan awi' wik'in, xtak'ul jun koj y xkarukamisaj, xcha'. Y toq xkich'er kan ki' rik'in ri rachibil jari' toq xbe'el-pe jun koj chirij y xukamisaj.

³⁷Y ri q'alajirisey ruch'abel ri Dios xberila-pe jun chik achin y xubij chire chi tubana' utzil tusoko'. Y ri achin ri' xa jun xuya' chire y xusok kan.

³⁸K'ari' ri q'alajirisey ruch'abel ri Dios xbe y xbepa'e' chuchi' ri bey richin nroyobej ri rey. Rija' xumatzej k'a el ruwech rik'in jun tzieq richin man netamex ta ruwech.

³⁹Y toq ri Acab xq'ax-el keri', ri achin ri q'alajirisey ruch'abel ri Dios, rik'in ruchuq'a' xch'on-apo chire y xubij: Yin ink'o k'a chupan ri oyowal chikikojol ri qawinaq aj-Israel, y k'o jun ri xjel-apo wik'in ri ruchapon-el jun achin, y xubij chuwe: Tachajij re achin re'. Wi xtanimej chawech, kan ja ri ak'aslen rat xtok pa ruk'exel, o xtatoj oxk'al wolajuj libra saqipueq chuwe, xcha' chuwe.

⁴⁰Rokik yin yibe kela-yibe kela' ninben pan oyowal, ri achin ri' xsacho-el ri', xcha' chire ri Acab. Y ri Acab xubij chire: Kan ja rat k'a xkakamisex pa ruk'exel, roma kan ja rat xabin, xcha'.

⁴¹Y ri q'alajirisey ruch'abel ri Dios kan jari' xrelesaj-el ri tzieq ri achoq ik'in rumatzen-wi el ruwech, y jari' toq ri Acab xretamaj ruwech chi xa jun chike ri q'alajirisey ruch'abel ri Dios.

⁴²Y ri achin ri' xubij chire ri Acab: Kere' nubij ri Jehová: Rat kan xaya-el q'ij chire ri Ben-hadad richin xbe, stape' yin kan nubin chik chi kan k'o chi nikamisex. Wakami k'a, kan ja ri ak'aslen rat xtaya' pa ruk'exel ri ruk'aslen rija', y ri atinamit pa ruk'exel ri rutinamit rija', nicha' ri Jehová, xcha'.

⁴³K'ari' ri Acab rey richin Israel xbe pa rachoch ri chiri' pa Samaria, rik'in janila bis y yakatajineq royowal.