Read Kaqchikel 1 Rey 21 Bible Online

1 Rey 21 - Kaqchikel bible

1 Rey 21

¹Chirij k'a ronojel re', k'o chik k'a jun ri xbanatej pa ruwi' jun ulew ri tikon uva chuwech ri richin ri Nabot aj-Jezreel. Ri ulew ri' k'o k'a pa tinamit Jezreel chuxikin-apo ri jun chik rachoch ri rey Acab ri k'o pa Samaria.

²Ri Acab xch'on k'a rik'in ri Nabot y xubij chire: Taya' la aqejoj chuwe richin nintik-qa juba' wichaj chuwech, roma naqaj k'o chire ri wachoch yin. Yin xtinya' pa ruk'exel chawe, jun ulew ri más utz ri chuqa' tikon uva chuwech. O wi niqa' chawech, ninloq' y yin xtinya' ri rajel, xcha' chire.

³Y ri Nabot xubij chire ri Acab: Man ta xtrajo' ri Jehová chi ninya' kan re ulew re' chawe, roma kan jare' ri wichinan kan pa kiq'a' ri nte-nata', xcha'.

⁴Y keri' ri Acab xbe chirachoch; janila nibison y yakatajineq janila royowal, roma ri ruch'abel ri Nabot toq xubij chi man nuya' ta kan ri ulew ri', roma ri ulew ri' xa jari' ri richinan kan pa kiq'a' ri rute-rutata'. Xkotz'e-qa pa ruch'at y xtzu'un-apo chuwa-xan y man xrajo' ta xwa'.

⁵Y ri Jezabel ri rixjayil xapon k'a rik'in y xuk'utuj chire achike roma janila niq'axon ri ránima y man nrajo' ta niwa'.

⁶Rija' xubij: Yin xich'on rik'in ri Nabot aj-Jezreel, richin xinbij chire chi tuk'ayij chuwe ri rulew ri rutikon uva chuwech, o wi niqa' chuwech, yin ninya' chire jun ulew ri tikon uva chuwech pa ruk'exel. Man rik'in ri', rija' xubij chi man nuya' ta chuwe, xcha' ri Acab.

⁷Ri Jezabel xubij chire: ¿Rat ri at rey richin Israel y man yatikir ta nachojmirisaj re'? Kayakatej k'a, kawa' y kakikot, roma kan ja yin xkijacho chawe ri rulew ri Nabot ri aj-Jezreel, xcha'.

⁸Y ri Jezabel xerutz'ibala' k'a wuj pa rubi' ri Acab y xuya-el retal rik'in ri rulipq'a' ri Acab, y xerutaqala-el chike ri achi'a' ri k'o kiq'ij chupan ri tinamit Jezreel.

⁹Y ri wuj ri xeruteq kere' nubij: Titaluj rutzijol chike konojel ri winaqi' chi k'o jun q'ij richin man yixwa' ta, y tibij chike chi chupan ri q'ij ri', niben jun molojri'il y niya' ri Nabot chikiwech ri winaqi'.

¹⁰Y ke'iya-apo chuwech ri Nabot e ka'i' achi'a' e banoy taq etzelal richin chi nikibij chi rija' xch'on itzel chirij ri Dios, y chirij ri rey. Chirij ri' tiwelesaj-el ri Nabot, y k'ari' tik'aqa' chi abej richin niken, xcha-el chupan ri wuj.

¹¹Y ri achi'a' ri k'o kiq'ij, y ri e aj-raqen richin ri tinamit kan xkinimaj k'a rutzij ri Jezabel, achi'el ri xutz'ibaj-el chupan ri wuj ri rutaqon-el chike.

¹²Rije' xkitaluj k'a rutzijol chike konojel winaqi' y man xewa' ta k'a y toq xkimol-ki' xkiya' ri Nabot chikiwech konojel ri winaqi'.

¹³Xepe k'a ri e ka'i' achi'a' ri e banoy taq etzelal y xetz'uye' k'a chuwech ri Nabot y xkibij chi ri Nabot xuyoq' rubi' ri Dios y xuyoq' ri rey. Y keri' ri winaqi' xkelesaj-el ri Nabot chiri' pa tinamit, y xkik'eq k'a chi abej richin xken.

¹⁴K'ari' xkiteq rutzijol rik'in ri Jezabel y xkibij chi ri Nabot xk'aq yan chi abej y xken yan.

¹⁵Y ri Jezabel kan xaxe toq xrak'axaj chi ri Nabot xk'aq chi abej y chi xken yan, jari' toq xubij chire ri Acab: Wakami kabiyin pa Jezreel roma awichin chik rat ri qejoj ri tikon uva chuwech ri richin kan ri Nabot, ri man xrajo' ta xuk'ayij chawe. Wakami rija' xa maneq chik, roma xa xken yan, xcha'.

¹⁶Y toq xrak'axaj ri Acab chi ri Nabot kamineq chik, xbe y xberuchapa' kan ri qejoj ri tikon uva chuwech ri richin kan ri Nabot.

¹⁷K'ari' ri Jehová xch'on rik'in ri Elías ri aj-Tisbé y xubij chire:

¹⁸Kabiyin y tabek'ulu-qa awi' rik'in ri Acab rey richin Israel ri niq'aton-tzij pa Samaria. Rija' re wakami yan k'o chiri' ri pa ruqejoj kan ri Nabot; xapon k'a chiri' richin nok kan richin rija'.

¹⁹Y kere' tabij chire: Kere' rubin-pe ri Jehová chuwe: Rat xakamisan richin ri Nabot, y chuqa' xamej kan ri ruqejoj. Wakami k'a, akuchi xkireq' tz'i' ri rukik'el ri Nabot, chiri' chuqa' xtikireq' tz'i' ri akik'el rat, xcha' ri Jehová chuwe, xcha' ri Elías.

²⁰Y ri Acab xubij chire ri Elías: ¿Y kan xino'awila' chik re wawe' rat etzelanel wichin?, xcha'. Y ri Elías xubij chire: Ja' xatonwila' chik, roma rat kan ajachon awi' chubanik ri etzelal chuwech ri Jehová.

²¹Roma ri' ri Jehová Dios rubin-pe: Yin xtinteq-pe ruk'ayewal pan awi', y kan xkenk'is k'a el jumul konojel achi'a' ri aj pan awachoch y ri asamajela' ri e yuqul pa samaj. Kan xkatinwelesaj k'a el jumul pa tinamit Israel.

²²Xtinben k'a chawe achi'el xinben chike ri aj pa rachoch ri Jeroboam ruk'ajol ri Nabat y ri Baasá ruk'ajol ri Ahías, roma rat kan xaben chuwe richin xyakatej woyowal, y roma chuqa' ja rat xabanon chire ri tinamit Israel richin xmakun chinuwech. Kere' rubin-pe ri Jehová Dios, xcha' ri Elías.

²³Y ri Elías xubij chik: Chuqa' ri Jehová xch'on chirij ri Jezabel y rubin-pe: Ri tz'i' xtikitej ri ruch'akul ri Jezabel chupan ri ulew ri ichinan kan chiri' pa Jezreel.

²⁴Xabachike chike ri awijatzul rat Acab ri xtiken pa tinamit, ja ri tz'i' ri xtitijo ri ruch'akul; y ri xtiken pa juyu', ja ri k'ucha' ri xketijo ri ruch'akul, nicha' ri Jehová, xcha' ri Elías.

²⁵Kan qitzij na wi chi man jun chik xbanon achi'el ri xuben ri Acab, ri kan xujech-ri' chubanik ri etzelal chuwech ri Jehová, y ja ri Jezabel ri rixjayil ri xbanon chire richin xmakun chuwech ri Jehová.

²⁶Ri Acab kan janila k'a itzel ri rubanobal chuwech ri Jehová, roma kan xuya' kiq'ij ri kiwachibel ri ch'aqa' chik dios, achi'el xkiben konojel ri winaqi' amorreo, ri xe'elesex-el chikiwech ri israelita roma ri Jehová.

²⁷Toq ri Acab xrak'axaj ri ch'abel ri xubij ri Elías, xuretz ri rutziaq chirij y xukusaj jun tzieq richin bis y kan man xwa' ta, y kan rik'in ri rutziaq ri' nikotz'e-qa; xuqasaj-ri' y kan janila k'a nibison ri nitzu'un.

²⁸Ri Jehová Dios xch'on chik pe jun bey rik'in ri Elías y xubij chire:

²⁹¿Atz'eton chi ri Acab janila xuqasaj-ri' chinuwech yin? Y roma k'a janila xuqasaj-ri' chinuwech, man xtinya' ta ri ruk'ayewal pa ruwi' re q'ij re'; k'a toq xtiq'aton na kan tzij ri ruk'ajol, k'ari' xtinya-pe ri ruk'ayewal pa ruwi' ri rachoch, xcha' ri Jehová.