Read Kaqchikel 1 Rey 22 Bible Online

1 Rey 22 - Kaqchikel bible

1 Rey 22

¹Oxi' k'a juna' xik'o ri man jun labal ri nikiben ri aj-Siria kik'in ri israelita.

²Y chupan ri rox juna' ri', ri Josafat rey richin ri Judá xberuq'ejela' ri Acab.

³Chupan ri q'ij ri', ri Acab xubij chike ri e aj-samaj richin rija': ¿Iwetaman chi ri Ramot ri k'o pa Galaad kan qichin roj, jak'a roj kan man jun qabanon richin qelesan ta kan pa ruq'a' ri rey richin Siria?, xcha'.

⁴Y keri' ri Acab xuk'utuj chire ri Josafat chi wi nrajo' chi junan ta nibekibana' oyowal pa ruwi' ri Ramot ri k'o pa Galaad. Y ri Josafat xubij chire ri Acab: Ri wichin yin awichin rat; ri nuwinaq yin e awinaq rat; y ri nukiej yin chuqa' e akiej rat, xcha'.

⁵Chuqa' xubij: Tiqak'ulubej na ri Jehová achike nubij rija' chiqe, xcha'.

⁶Y k'ari' ri Acab xerumol konojel ri e q'alajirisey ruch'abel ri ki-dios, y xkimol k'a ki' e 400 achi'a', y xuk'utuj chike: ¿Utz kami chi yibe richin ninbenbana' oyowal pa ruwi' ri Ramot ri k'o pa Galaad, o xa ninmalij-qa?, xcha'. Y rije' xkibij chire chi utz nibe roma ri kajaw kan xtujech pa ruq'a'.

⁷Jak'a ri Josafat xuk'utuj chi wi maneq ta kami jun q'alajirisey ruch'abel ri Jehová chiri' richin nikik'ulubej.

⁸Y ri Acab xubij chire ri Josafat: K'a k'o na kan jun achin rubini'an Micaías ruk'ajol ri Imlá ri achoq ik'in niqak'ulubej-wi achike nubij ri Jehová, jak'a yin kan itzel nina' chire roma man jun bey nuk'en ta pe utzilej taq rutzijol chuwe, xcha'. Y ri Josafat xubij chire ri Acab chi man tich'on itzel chirij ri achin ri'.

⁹Y keri' ri Acab xroyoj jun chike ri rusamajela', y xubij chire chi tiberuk'ama' ri Micaías ruk'ajol ri Imlá.

¹⁰Y ri Acab y ri Josafat rey richin Judá e tz'uyul chiri' pa kich'akat y kikusan ri kitziaq richin rey, chiri' pa jun era ri k'o-apo chuwech ri ruchi' ri tinamit Samaria, y konojel k'a ri q'alajirisey ruch'abel ri ki-dios ri ek'o kik'in ye'ajin nikik'ul ri achi'el achik'.

¹¹Y jun k'a chike rije' ri rubini'an Sedequías, ruk'ajol ri Quenaaná, e rubanon ka'i-oxi' ruwachibel uk'a' rik'in q'eqapueq, y rija' xuq'alajirisaj k'a: Kere' nubij ri Jehová: Rik'in k'a re uk'a' re' xke'ikoq'ila-wi ri aj-Siria achi'el nitoq'on jun wákix, k'a toq xkek'is na pan iq'a', xcha' chike.

¹²Y ri ch'aqa' chik e q'alajirisey ruch'abel ri ki-dios junan ri kich'abel y nikibij chi kan utz-wi chi yebe pa Ramot richin nibekibana' oyowal, y kan ja ri Acab ri xtich'akon, roma ri Jehová kan xkerujech pa ruq'a' rija' ri aj-Siria.

¹³Y toq xapon ri oyonel rik'in ri Micaías, xubij chire: Konojel ri e q'alajirisey ruch'abel ri qa-Dios junan ri ch'abel nikibij chire ri rey, chi ja rija' xtibech'akon. Wakami k'a ri ach'abel rat kan ta k'a achi'el ri kich'abel rije', xcha'.

¹⁴Jak'a ri Micaías xubij: Chuwech k'a ri k'aslik Jehová, ninbij chi achike xtubij ri Jehová chuwe, jari' ri xtinbij yin, xcha' chire ri oyonel richin.

¹⁵Ri Micaías kan xbe k'a, y toq xapon rik'in ri Acab, rija' xuk'utuj chire ri Micaías chi wi utz nuchop oyowal pa ruwi' ri Ramot, o xa numalij-qa. Y ri Micaías xubij chire: Kabiyin; tabebana' oyowal, roma kan jujik-wi chi kan ja rat ri xkach'akon, roma ri Jehová kan xtujech pan aq'a' rat, xcha'.

¹⁶Y ri Acab xubij chik chire: ¡Janipe' mul nubin chik chawe chi toq rat yach'on wik'in pa rubi' ri Jehová, kan tabij k'a ri qitzij chuwe!, xcha'.

¹⁷K'ari' rija' xubij chire ri Acab: Yin nintz'et chi konojel ri winaqi' israelita kitalun-ki' pa ruwi' taq juyu', achi'el taq karne'l ri maneq kiyuq'unel. Y ri Jehová nubij k'a chi konojel re winaqi' re' xa maneq kajaw. Roma ri' taya' q'ij chike chi chikijujunal ketzolin chi taq kachoch rik'in uxlanibel-k'u'x, xcha' ri Micaías.

¹⁸K'ari' ri Acab xubij-apo chire ri Josafat: ¡Peja, xinbij chawe chi rija' kan man jun bey nuk'en ta pe utzilej taq rutzijol chuwe, xa kan xaxe ri itzel rutzijol nuk'en-pe chuwe!, xcha'.

¹⁹Y ri Micaías xch'on chik y xubij: Wakami k'a, tawak'axaj k'a ri nubij ri Jehová. Yin kan xintz'et ri Jehová tz'uyul pa rutz'uyubal richin q'atbel-tzij, y ek'o-apo ri ángel rik'in y kan man e ajlatel ta; ek'o pa rijkiq'a' y pa rajxokon.

²⁰Y ri Jehová xuk'utuj chike ri ángel: ¿Achike ta chiwe rix nitikir nibebanon chire ri Acab chi niberubana' oyowal pa ruwi' ri Ramot ri k'o pa Galaad, y nibe xaxe richin nibeken kan?, xcha'. Y konojel ri ángel xech'owiyaj k'a chikiwech, y jun wi nikibij ri ch'aqa', y jun wi chik ri nikibij ri ch'aqa' chik.

²¹Y kan jari' xbepapo' jun espíritu chuwech ri Jehová y xubij chire chi rija' nitikir niberubana' ri samaj ri'. Y ri Jehová xuk'utuj chire achike rubanik xtuben.

²²Y ri espíritu ri' xubij: Yin xkibe y xkinok jun espíritu richin tz'ukuj-tzij, y xtinben chike ri achi'a' ri e q'alajirisanela' richin xtikitz'uk-tzij. Y ri Jehová xubij chire chi tibe y tiberubana' roma kan nitikir nuben chire ri Acab chi nibe y niken kan.

²³Y keri' ri Jehová xuya' q'ij chi jun itzel espíritu xok pa kichi' re q'alajirisanela' re', richin xkitz'uk-tzij chuwech, roma ri Jehová kan rubin chik chi k'o xtiberuk'uluwachij.

²⁴K'ari' xjel-apo ri Sedequías ruk'ajol ri Quenaaná rik'in ri Micaías y xuya' jun q'a' chupalej, y xubij chire: ¿Achi'el toq xel-el ri espíritu richin ri Jehová wik'in yin, y xa awik'in chik rat nich'on-wi?, xcha'.

²⁵Y ri Micaías xubij chire: Xtibeq'ax chawech k'a ja ri q'ij toq xtabeq'oq'oj-awi' pa jun jay richin xtabewewaj-awi', xcha'.

²⁶K'ari' ri Acab xubij chi tichap-el ri Micaías, y tuk'uex-el chuwech ri Joás ri ruk'ajol rija', y chuwech ri Amón, ri q'atoy-tzij richin ri tinamit.

²⁷Y xubij-el chi tibix chike rije' chi tikitz'apej pa jay ri achin ri', y tichajix jebel richin man nanimej, y xaxe juba' wey y juba' ya' tiya'ox chire k'a toq xtitzolin na pe rija'.

²⁸Y ri Micaías xubij chire: Wi rat xkatzolin-pe rik'in uxlanibel-k'u'x, man ja ta k'a ri Jehová ri xbin chuwe ri xinbij chawe ri', xcha'. Y ri Micaías chuqa' xubij chike ri winaqi': Rix kan xiwak'axaj k'a ri xinbij chire ri Acab, xcha'.

²⁹Y keri' ri Acab rey richin Israel junan rik'in ri Josafat rey richin Judá xebe pan oyowal chiri' pa Ramot ri k'o pa Galaad.

³⁰Y ri Acab xubij chire ri Josafat: Yin xtinjel-el nuwech y xkinok-apo chupan ri oyowal, jak'a rat takusaj ri atziaq richin rey, xcha'. Y keri' ri Acab kan xujel k'a el ruwech y xbe pan oyowal.

³¹Ri rey richin Siria kan rubin wi k'a el chike ri e juwineq kablajuj aj-raqen ri ye'uk'uan ri carruaje chi man nikiben ta oyowal kik'in xabachike; xa kan xaxe rik'in ri rey richin Israel.

³²Y keri' k'a toq ri aj-raqen kichin ri e uk'uayon ri carruaje xkitz'et ri Josafat, xkich'ob chi ja rija' ri rey richin Israel, y xepe chirij richin nikiben oyowal rik'in, jak'a ri Josafat xsik'in richin nito'ox.

³³Toq ri aj-raqen ri e uk'uayon ri carruaje xkitz'et chi xa man ja ta rija' ri rey richin Israel man xkoqotaj ta chik.

³⁴Y k'o k'a jun chike ri aj-labal aj-Siria ri xuk'eq jun ch'ab choj keri', y xumej ri Acab rey richin Israel. Ri ch'ab kan choj xok ri akuchi rutunun-wi-ri' ri rutobal, y k'ari' ri Acab xubij chire ri uk'uayon ri carruaje: Tapiskolij-awi' chi'anin richin yinawelesaj-el wawe' roma xa xisokotej yan, xcha'.

³⁵Y chijun k'a ri q'ij ri' kan janila nim ri oyowal ri xbanatej, y ri Acab kan chiri' k'a chupan ri ru-carruaje xpa'e-wi chikiwech ri aj-Siria, y ri rukik'el xbiyin k'a chupan ri ru-carruaje; y chupan k'a ri tiqaq'ij ri' xken-qa.

³⁶Jari' toq xel k'a rutzijol chiri' akuchi ek'o-wi-qa ri aj-labal aj-Israel, chi chikijujunal ketzolej pa taq kitinamit y pa taq kachoch.

³⁷Y keri' ri Acab xken y xk'amer-pe pa Samaria; y chiri' k'a xmuq-wi.

³⁸Xkich'ej k'a ri ru-carruaje chiri' pa Samaria akuchi k'o-wi jun yakbel-ya'; y xa chiri' chuqa' ye'atin-wi ri ixoqi' ri itzel kik'aslen. Xe'apon k'a ri tz'i' y xkireq' ri kik' ri k'a k'o kan; y kan xbanatej k'a achi'el rubin ri Jehová.

³⁹Y ronojel ri ch'aqa' chik ri xebanatej chupan ri q'atbel-tzij richin ri Acab e tz'ibatel kan ronojel chupan ri Wuj Ri Cholan Nich'on pa kiwi' ri rey richin ri Israel. Chiri' chuqa' e tz'ibatel-wi kan ronojel ri samaj richin ri jay ri xuben, ri xuya' ruwiqobal ri e banon rik'in rey tix, y chuqa' ri tz'aq ri xeruben richin xerusutij-kij ri tinamit.

⁴⁰Toq xmuq yan ri Acab, ri xk'oje' kan pa ruk'exel ja ri ruk'ajol ri rubini'an Ocozías.

⁴¹Toq ri Acab k'a k'es na, y chupan ri rukaj juna' richin ri ruq'atbal-tzij pa ruwi' ri Israel, jari' toq xok kan rey ri Josafat, ri chiri' pa Judá.

⁴²Ri Josafat juwineq wolajuj k'a rujuna' toq xok kan rey, y juwineq wo'o' k'a juna' xq'aton-tzij pa Jerusalem. Ri rute' rubini'an Azubá rumi'al ri Silhí.

⁴³Y kan xutaqej k'a ri rupixa' ri Asá ri rutata' y kan man xujech'ej ta kan ri'; kan utz k'a xuben chuwech ri Jehová. Man rik'in ri', ri winaqi' xa k'a xkisuj na kamelabel y k'a xkiporoj na pom pa ruwi' taq juyu'. Ri winaqi' kan k'a xe'apon na chiri' roma ri porobel ri' man xe'elesex ta kan.

⁴⁴Y ri Josafat xuben jun jikibel-tzij richin uxlanibel-k'u'x rik'in ri rey richin Israel.

⁴⁵Y ronojel ri ch'aqa' chik ri xeruben ri Josafat chupan ri ruq'atbal-tzij, ri rusamaj y ri nima'q taq rubanobal, ri labal ri xeruben; ronojel re' e tz'ibatel kan chupan ri Wuj Ri Cholan Nich'on pa kiwi' ri rey e richin Judá.

⁴⁶Rija' xeruk'is k'a el chupan ri ruwach'ulew ri achi'a' ri kijachon-ki' chubanik itzel k'aslen richin xkiya' kiq'ij ri ki-dios, ri k'a ek'o na kan ri man xtikir ta xerelesaj kan ri Asá ri rutata'.

⁴⁷Chupan ri q'ij ri', maneq rey pa ruwach'ulew Edom, y pa ruk'exel rey xa jun k'a q'atoy-tzij ri ruya'on ri Josafat chiri'.

⁴⁸Chuqa' ri Josafat xeruben barco achi'el ri yeban pa tinamit Tarsis, richin yebe pan Ofir richin nibekik'ama' q'anapueq; jak'a xa man xetikir ta xebe roma xa xeyojtej ri chiri' pa tinamit Esión-guéber.

⁴⁹Y toq xbanatej re', jari' toq ri Ocozías, ruk'ajol kan ri Acab xubij k'a chire ri Josafat chi tuya' q'ij chi ri rusamajela' rija' yebe kik'in ri rusamajela' ri Josafat chupan ri barco, jak'a ri Josafat man xrajo' ta.

⁵⁰Xken k'a ri Josafat y xmuq pa rutinamit kan ri David; y pa ruk'exel rija' xk'oje' kan ri ruk'ajol rubini'an Joram.

⁵¹Toq ri Josafat k'a k'es na, y chupan ri juna' wuqlajuj richin ri ruq'atbal-tzij pa ruwi' ri Judá, jari' toq xok kan rey ri Ocozías ruk'ajol ri Acab, ri chiri' pan Israel pa tinamit Samaria. Y xa ka'i' k'a juna' xuq'et-tzij pa ruwi' ri Israel.

⁵²Xa man utz ta k'a xuben chuwech ri Jehová; xa xuben achi'el xkiben ri rute-rutata', y chuqa' xuben achi'el ri Jeroboam, ri ruk'ajol ri Nabat, ri xbanon chi xemakun ri tinamit Israel,

⁵³roma kan xusamajij y xuya' kiq'ij ri Baal, y roma ri' kan xuben chi xyakatej royowal ri Jehová Dios richin Israel, achi'el xuben ri rutata'.