Read Kaqchikel 1 Rey 4 Bible Online

1 Rey 4 - Kaqchikel bible

1 Rey 4

¹Ri Salomón xok k'a kan rey richin chijun ruwach'ulew Israel.

²Jare' ri aj-raqen ri xek'oje' kan chupan ri ruq'atbal-tzij: Ri Azarías ruk'ajol ri sacerdote Sadoc,

³ri Elihóref y ri Ahías ri e ruk'ajol ri jun achin rubini'an Sisá, jare' ri e ka'i' rutz'ibanela'. Ri Josafat ruk'ajol ri Ahilud ja rija' ri nichajin ri wuj richin ri yebanatej chupan ri ruwach'ulew.

⁴Ri Benaías ruk'ajol ri Joiadá ja rija' aj-raqen kichin ri aj-labal. Ri Sadoc y ri Abiatar ja rije' ri e sacerdote.

⁵Ri Azarías y ri Zabud ri e ruk'ajol ri Natán xek'oje' chuqa' chupan ri q'atbel-tzij richin ri Salomón. Ri Azarías xok aj-raqen kichin ri q'atoy taq tzij y ri Zabud ja rija' ri xk'oje' más naqaj chire ri rey, y xok rupixabanel.

⁶Ri Ahisar jari' ri xk'oje' pa kiwi' konojel samajela' pa rachoch ri rey. Ri Adoniram ruk'ajol ri Abdá ja rija' ri k'o pa ruwi' ri k'o chi nikitoj chire ri rey.

⁷Y ri Salomón xeruya' k'a e kablajuj q'atoy taq tzij pa ruwi' chijun ri ruwach'ulew Israel. Chuqa' ja rije' ri ye'ilin richin ri rey y ri e aj pa rachoch. Roma rije' e kablajuj, chikijujunal ri q'atoy taq tzij ri' k'o chi nikik'uaj ri nik'atzin richin nikitej ri rey y ri e aj pa rachoch chupan ri jun ik'.

⁸Ja e kablajuj achi'a' re' ri yeq'aton-tzij pa ruwi' kablajuj nima'q taq ruwach'ulew. Ri Ben-hur ja rija' ri k'o pa ruwi' ri ruwach'ulew richin ri Efraín, chiri' chuwi' taq juyu'.

⁹Ri Ben-déquer ja rija' ri k'o pa ruwi' ri ruwach'ulew akuchi ek'o-wi ri tinamit Macás, Saalbim, Bet-semes, Elón y Bet-hanán.

¹⁰Ri Ben-hésed ja rija' ri k'o pa ruwi' ri ruwach'ulew akuchi ek'o-wi ri tinamit Arubot, Socó y chijun ruwach'ulew Héfer.

¹¹Ri Ben-abinadab ja rija' ri k'o pa ruwi' ri ruwach'ulew ri akuchi k'o-wi ri tinamit Dor; y ri rixjayil rija' ja ri Tafat, ri rumi'al ri rey Salomón.

¹²Ri Baaná ruk'ajol ri Ahilud ja rija' ri k'o pa ruwi' ri ruwach'ulew ri nitiker-pe pa relebel-q'ij rik'in ri tinamit Bet-seán, Saretán y ri Abel-meholá, chijun ri taq'aj richin Jezreel chukojol ri tinamit Meguido y Taanac, y napon k'a pa tinamit Jocmeam ri k'o pa qajbel-q'ij.

¹³Ri Ben-guéber ja rija' ri k'o pa ruwi' ri ruwach'ulew akuchi k'o-wi ri tinamit Ramot richin Galaad y ri kokoj taq kitinamit ri xek'oje' pa ruq'a' ri Jaír ruk'ajol kan ri Manasés. Chuqa' pa ruq'a' rija' k'o-wi ri ruwach'ulew Argob ri k'o pa ruwach'ulew Basán, akuchi ek'o-wi oxk'al e nima'q taq tinamit ri ya'on tz'aq chikij y ya'on rutz'apebal-ruchi' y e ya'on ch'ich' chirij ri banon rik'in q'enq'oj-pueq.

¹⁴Ri Ahinadad ruk'ajol ri Idó ja rija' ri k'o pa ruwi' ri ruwach'ulew akuchi k'o-wi ri tinamit Mahanaim.

¹⁵Ri Ahimaas ja rija' ri k'o pa ruwi' ri ruwach'ulew Neftalí, y rija' xk'ule' rik'in ri Basemat rumi'al ri rey Salomón.

¹⁶Ri Baaná ruk'ajol ri Husai ja rija' ri k'o pa ruwi' ri ruwach'ulew Aser y chuqa' pa ruwi' ri tinamit Alot.

¹⁷Ri Josafat ruk'ajol ri Parúah ja rija' ri k'o pa ruwi' ri ruwach'ulew Isacar.

¹⁸Ri Simí ruk'ajol ri Elá ja rija' ri k'o pa ruwi' ri ruwach'ulew Benjamín.

¹⁹Ri Guéber ruk'ajol ri Urí ja rija' ri xk'oje' pa ruwi' ri ruwach'ulew Galaad. Ojer kan ri ruwach'ulew ri' xk'oje' pa ruq'a' ri Sihón ri rey kichin ri amorreo, y ri Og rey richin ri Basán. Y pa ruwi' ronojel re' k'o chuqa' jun ri aj-raqen pa ruwi' ri ruwach'ulew Judá.

²⁰Ri aj-Judá y ri aj-Israel kan e janila k'a chi winaqi', ri kajlabal kan achi'el chik k'a ri sanayi' ri k'o chuchi' ri palou. Rije' kan jebel k'a ri k'aslen kik'uan roma jebel yewa' y ye'uk'ya', y kan janila k'a kikoten k'o kik'in.

²¹Ri ruwach'ulew ri k'o pa ruq'a' ri rey Salomón nitiker k'a pe pa relebel-q'ij chuchi' ri raqen-ya' Éufrates y napon k'a pa qajbel-q'ij rik'in ri kiruwach'ulew ri aj-Filistea, y ri pa xokon, k'a rik'in ri ruwach'ulew Egipto. Y konojel ri winaqi' richin re ruwach'ulew re' kan xkiya' kan ri k'o chi nikitoj chire ri Salomón, y chuqa' kan xkilij rija' chijun ruk'aslen.

²²Y ri nik'atzin k'a chire ri Salomón ronojel q'ij richin nikitej jare': Más juba' wok'al quintal k'ej chayun, jubama 150 quintal k'ej ri man chayun ta,

²³lajuj wákix ri e tiojirisan chuwa-jay, e juwineq wákix ri e yuq'un pa taq juyu' y e wok'al kokoj taq awej. Pa ruwi' ri' nik'atzin nikiya-apo ri jalajoj kiwech masat, y ri aj-xik' taq chikopi' ri jebel e tiojirisan.

²⁴Ri Salomón xq'aton-tzij pa ruwi' ri ruwach'ulew ri nitiker-pe pa qajbel-q'ij chire ri tinamit Tífsah ri k'o chuchi' ri raqen-ya' Éufrates, y napon k'a pa tinamit Gaza. Ja rija' xq'aton-tzij pa kiwi' konojel ri rey ri ek'o chiri', y kik'in k'a konojel re' xk'oje' uxlanibel-k'u'x.

²⁵Chijun ruk'aslen ri rey Salomón, ri winaqi' aj-Judá, y ri aj-Israel kan kuqul k'a kik'u'x xek'oje' k'a pa taq kachoch, roma man jun chik xnaqon kichin. Y kan keri' k'a xkiben chijun ruwach'ulew, nitiker-pe pa Dan y napon k'a pa Beerseba.

²⁶Y rik'in rija', xek'oje' 4,000 kachabal kiej, kichin ri kiej ri yejik'o-el ri carruaje. Y ek'o chuqa' e 12,000 achi'a' ri yech'oke' chirij kiej.

²⁷Y ri kablajuj aj-raqen, jari' ri yek'amo-pe ronojel ri nitij pa rachoch ri rey Salomón, y ronojel k'a k'o pa ruk'iyal. Chi ik' chi ik' xa jun ri nik'amon-pe chike.

²⁸Chuqa' nikik'en-pe cebada y q'os kichin konojel ri kiej y nikik'uaj k'a akuchi k'atzinel-wi.

²⁹Y ri Dios kan xuya' xusipaj k'a runa'oj ri rey Salomón, chuqa' xuya' nima'q taq etamabel chire, y kan janila nim ri ránima xubanala' kik'in ri winaqi', y man ajlatel ta achi'el ri sanayi' ri k'o chuchi' ri palou.

³⁰Kan janila k'a nim ri na'oj richin ri rey Salomón, kan xik'o chikiwech ri na'oj kichin ri winaqi' ri aj pa relebel-q'ij, y ri winaqi' aj-Egipto.

³¹Y kan xok k'a jun achin aj-na'oj, y kan man jun chik achin achi'el rija'; kan más k'a retamabal chuwech ri aj-na'oj rubini'an Etán ri rijatzul kan ri Zeráh, y chuqa' kan más retamabal chikiwech ri e oxi' ruk'ajol ri Mahol ri kibini'an Hemán, Calcol y Dardá. Ri rutzijol ri retamabal ri Salomón kan xapon chuqa' kik'in konojel ri winaqi' richin ri ch'aqa' chik ruwach'ulew ri ek'o chunaqaj.

³²Xerunuk', y xubij 3,000 etamabel-tzij, y xuben 5,000 bix.

³³Chuqa' rik'in ri retamabal kan xtijon k'a pa kiwi' jalajoj kiwech che'; ri tiox-che' ri richin ri Líbano y chuqa' pa ruwi' ri hisopo, ri jun q'ayis ri nik'iy-pe chuwech tz'aq. Chuqa' xtijon pa kiwi' ri chikopi' ri ek'o pa k'echelaj, pa kiwi' ri aj-xik' taq chikopi', pa kiwi' ri chikopi' ri e jepejeq y ri nikiqirirej-ki', y chuqa' pa kiwi' ri ker.

³⁴Konojel q'atoy taq tzij richin ri ch'aqa' chik ruwach'ulew ri akuchi apowineq-wi rutzijol ri Salomón chi janila runa'oj, xepe rik'in richin nokak'axaj-el ri etamabel ri'.