Read Kaqchikel 2 Rey 10 Bible Online

2 Rey 10 - Kaqchikel bible

2 Rey 10

¹Chiri' pa tinamit Samaria k'a ek'o k'a kan e oxk'al lajuj rijatzul ri ánima Acab. Y roma ri' ri Jehú xerutz'ibaj wuj, y xeruteq pa Samaria chike ri achi'a' ri k'o kiq'ij chiri' pa Jezreel y chike ri yechajin y yetijon kichin ri e rijatzul kan ri Acab, y xubij-el chike:

²Pan iq'a' rix ek'o-wi ri janila chi aj-labal ri yech'oke' chirij kiej, janila chi carruaje y kamisabel, y chuqa' ri itinamit kan tz'apen-rij chi tz'aq. Keri' chuqa' pan iq'a' rix ek'o-wi kan ri e rijatzul kan ri Acab. Roma ri', kan xaxe k'a xtapon re wuj re' iwik'in rix,

³ticha' k'a jun chike ri ruk'ajol ri iwajaw ri kan ruk'amon chi niya' kan pa rutz'uyubal ri rey. Keri' kan tibana' k'a oyowal wik'in yin pa ruwi' ri ajawaren, xcha-el.

⁴Jak'a rije' janila xkik'en rukiy y xkibij: Wi ri e ka'i' rey man xetikir ta rik'in ri Jehú, ¿achi'el toq xqojtikir roj rik'in?, xecha-qa.

⁵K'ari' ri samajel ri k'o pa ruwi' ri jay richin q'atbel-tzij, ri aj-raqen pa ruwi' ri tinamit, ri achi'a' ri k'o kiq'ij, ri yechajin y ri yetijon kichin ri e aj pa rachoch ri Acab; konojel rije' xkiteq rubixik chire ri Jehú, y xkibij-el: Roj kan oj asamajel rat rey; y xtiqaben k'a ronojel ri xtabij chiqe; jak'a roj man xtiqacha' ta qa jun chik rey. Roma ri', kan tabana' k'a ri achike niqa' chawech rat, xecha-el.

⁶K'ari' ri Jehú xutz'ibaj chik jun wuj y xubij-el: Wi rix kan qitzij chi ixk'o wik'in yin y niwajo' ninimaj nutzij, kan tibana' k'a re ninbij chiwe, chi ke taq wa chua'q nik'en-pe chuwe wawe' pa Jezreel, ri kijolon ri e rijatzul kan ri iwajaw, xecha-el. Y ri e oxk'al lajuj achi'a' ri e rijatzul kan ri rey, ek'o k'a pa kiq'a' ri achi'a' ri k'o kiq'ij richin ri tinamit Samaria richin yetijon kichin.

⁷Toq xapon k'a ri wuj kik'in, xekichop k'a ri e oxk'al lajuj winaqi' ri e rijatzul kan ri rey Acab, y xekikamisaj konojel. Chirij ri' xkiya' k'a el ri jolomaj pa taq chakech y xkiteq-el pa Jezreel.

⁸Toq xbebix chire chi jari' xk'amer-pe chire ronojel ri jolomaj, rija' xubij chi tich'ar pa ka'i' y keya'ox kan chuchi' ri tinamit, y chiri' yek'oje' kan chijun aq'a'.

⁹Toq seqer-q'anej, jari' toq xel-pe ri Jehú, y xpa'e' chikiwech ri winaqi' richin ri tinamit, y xubij: Yin xiyakatej chirij ri wajaw y kan xinkamisaj. Y rix kan maneq imak chire re'; jak'a ¿Achike xekamisan kichin konojel re'?

¹⁰Tiwetamaj k'a chi ri xubij ri Jehová pa ruwi' ri rachoch ri Acab kan k'o chi xtibanatej ronojel. Wakami ri Jehová kan xuben-wi ri rubin chi nuben, ri xuq'alajirisaj chire ri Elías ri rusamajel, xcha'.

¹¹Keri' ri Jehú xerukamisaj k'a konojel ri k'a ek'o kan chire ri rijatzul kan ri Acab ri ek'o pa tinamit Jezreel, y chuqa' konojel ri tata'al, konojel ri e kachibil, keri' chuqa' ri e sacerdote ri xesamajin richin; kan man jun k'a xk'oje' kan chike.

¹²Chirij ri' ri Jehú xbe pa Samaria. Jak'a toq beneq pa bey xapon pa Bet-equed ri akuchi ri yuq'unela' nikisokaj-wi ri kisumal ri kikarne'l.

¹³Y chiri' xuk'ul-ri' kik'in jun tzobaj achi'a', y xuk'utuj chike e achike k'a rije'. Y rije' xkibij: Roj oj rach'alal ri Ocozías rey richin Judá, y wakami oj peteneq richin ye'oqaq'ejela' kan ri e ralk'ual ri rey Joram, y ri e ral ri Jezabel, xecha'.

¹⁴K'ari' ri Jehú xubij chike ri rusamajela': Ke'ichapa' konojel kela' chi e k'es, xcha'. Y toq e kichapon chik, xekik'uaj chunaqaj ri pozo richin ri Bet-equed, y chiri' xekikamisaj-wi. Ri kajlabal ri achi'a' ri' e kawineq ka'i' konojel, y kan man jun k'a chike rije' ri xkiya' kan ruk'aslen.

¹⁵Y toq ri Jehú xel-el chiri', xuk'ul-ri' rik'in ri Jonadab ruk'ajol ri Recab. Y toq xuq'ejela' yan, ri Jehú xubij chire: ¿Kan choj ri awánima wik'in, achi'el ri wánima yin awik'in?, xcha'. Y ri Jonadab xubij chi kan keri'. K'ari' ri Jehú xubij chi tuya' ri ruq'a' chire. Y ri Jonadab kan xuya' k'a ri ruq'a' chire ri Jehú richin xbe rik'in pa ru-carruaje.

¹⁶Y ri Jehú xubij chire: Wakami yabe wik'in richin xtatz'et chi yin rik'in ronojel wánima ninwajo' ri Jehová, xcha'. Y keri' junan k'a xebe chupan ri ru-carruaje.

¹⁷Y kan xaxe k'a toq ri Jehú xapon pa Samaria, xerukamisaj k'a konojel ri e rijatzul kan ri Acab ri k'a ek'o kan chiri'. Kan xeruk'is k'a konojel achi'el ri rubin ri Jehová chire ri Elías, ri q'alajirisey ri ruch'abel.

¹⁸K'ari' ri Jehú xerumol chijun ri tinamit y xubij chike: Ri Acab xusamajij juba' ri dios Baal, jak'a yin kan más xtinsamajij.

¹⁹Wakami k'a, ke'iwoyoj-pe konojel ri achi'a' ri yesamajin richin ri Baal, y chuqa' ri e ru-sacerdote; y man jun k'a chike rije' ri man ta xtipe, roma k'o jun nimalej kamelabel ri xtinbensuju' chire ri Baal. Achike k'a ri man xtipe ta, kan xtikamisex k'a, xcha'. Ri Jehú xa rik'in k'a q'oloj xubij ronojel re', xaxe roma nrajo' chi yeruk'is konojel ri nikiya' ruq'ij ri Baal.

²⁰K'ari' ri Jehú xuch'er jun q'ij richin molojri'il richin niya'ox ruq'ij ri Baal.

²¹Y xuteq k'a koyoxik chijun ruwach'ulew Israel; y kan xe'apon k'a konojel ri rusamajela' ri Baal. Kan man jun k'a xk'oje' kan chi man ta xapon. Y xe'ok k'a apo chupan ri rachoch ri Baal, y kan xnoj k'a chijun ri rachoch.

²²K'ari' ri Jehú xch'on rik'in ri aj-raqen ri niyako ri tzieq ri nikikusaj ri rusamajela' ri Baal, y xubij chire chi trelesaj-pe ri tzieq ri'. Y rija' xrelesaj k'a pe ri tzieq.

²³Y xok-apo ri Jehú y ri Jonadab ruk'ajol ri Recab chupan ri rachoch ri Baal. K'ari' ri Jehú xubij chike ri e ya'ol ruq'ij ri Baal ri ek'o chiri': Titz'eta' jebel chi man jun rusamajel ri Jehová tik'oje' wawe' chiqakojol roj; yin ninwajo' chi re wawe' kan xaxe ta ri rusamajela' ri Baal ri yojk'oje', xcha'.

²⁴Y toq konojel ek'o chik chiri' richin nikisuj kamelabel y chikop ri niporox chijun chuwech ri Baal, jari' toq ri Jehú xeruya' chuwa-jay e jumuch' aj-labal, y xubij chike: Kan ke'ikamisaj k'a konojel, y achike k'a chiwe rix ri xtuya' q'ij chi k'o jun nanimej, kan xtiken k'a pa ruk'exel ri nanimej, xcha'.

²⁵Y toq ri Jehú xk'achoj yan richin xusuj ri chikop chuwech ri Baal, jari' toq xch'on kik'in ri ek'o kan chuwa-jay, y kik'in ri aj-raqen pa kiwi', y xubij: Kixok-apo y ke'ikamisaj konojel; y man jun k'a chike rije' tanimej, xcha'. Keri' xekikamisaj chi espada konojel, y xekelesaj-pe chiri'. Chirij ri' xebe ri akuchi kan ch'aron richin niya'ox-wi ruq'ij ri Baal ri chiri' pa rachoch.

²⁶Y xekelesaj k'a el ri wachibel e paban-q'anej chiri' pa rachoch ri Baal, y xekiporoj.

²⁷Y xkiwulaj k'a ri wachibel paban-q'anej richin ri Baal, y xkiwulaj kan ri rachoch. Ri chiri' re wakami xok richin chulubel.

²⁸Keri' xuben ri Jehú toq xrelesaj-el ri Baal chiri' pan Israel.

²⁹Man rik'in ri', ri Jehú man xuch'er ta kan ri' chire ri mak achi'el xuben ri Jeroboam ri ruk'ajol ri Nabat, toq xuben chike ri aj-Israel richin xemakun roma k'a xeruya' na kan ri ka'i' nima-alaj achij wákix ri banon rik'in q'anapueq ri ek'o chiri' pa tinamit Betel y pa Dan.

³⁰Roma ri' ri Jehová xubij chire ri Jehú: Roma kan xaben ri choj chinuwech yin, y xaben ronojel ri achi'el ri k'o pa wánima yin rik'in ri rijatzul ri Acab, roma ri' ri awalk'ual kan xkeq'aton-tzij wawe' pan Israel k'a xtapon na ri rukaj sol richin ri awijatzul.

³¹Jak'a ri Jehú man xutaqej ta rik'in ronojel ránima ri rupixa' ri Jehová Dios, y kan man xuch'er ta kan ri' chire ri mak ri xuben ri Jeroboam toq xuben chike ri aj-Israel richin xemakun.

³²Chupan ri q'ij ri' ri Jehová xuchop nrelesaj ri ruwach'ulew Israel roma ri Hazael rey richin Siria.

³³Ri Hazael xuchop ronojel ruwach'ulew ri k'o pa relebel-q'ij chire ri raqen-ya' Jordán, nitiker-pe pa tinamit Aroer ri k'o chuchi' ri raqen-ya' Arnón, y xapon k'a pa Galaad y pa Basán. Re ruwach'ulew re' xkichinaj kan ri Gad, ri Rubén y ri nik'aj tzobaj richin ri Manasés.

³⁴Ri ch'aqa' chik rubanobal ri Jehú y ronojel ri xuben, tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

³⁵Y ri Jehú xken y xbemuq k'a kan ri akuchi e muqun-wi ri rute-rutata'. Y ri xkanej kan pa ruk'exel richin niq'aton-tzij ja ri Joacaz ri ruk'ajol.

³⁶Ri Jehú xq'aton-tzij juwineq waqxaqi' juna' pa ruwi' ri Israel ri chiri' pa Samaria.