Read Kaqchikel 2 Rey 15 Bible Online

2 Rey 15 - Kaqchikel bible

2 Rey 15

¹Toq k'a k'es na ri Jeroboam ruk'ajol ri Joás, y chupan ri juna' juwineq wuqu' chire ri ruq'atbal-tzij, jari' toq xok kan rey ri Azarías ruk'ajol ri Amasías.

²Y ri Azarías k'o k'a wuqlajuj rujuna' toq xuchop nuq'et-tzij, y kawineq kablajuj juna' xuq'et-tzij pa ruwi' ri Judá chiri' pa Jerusalem. Y ri rute' rubini'an Jecolías, aj-Jerusalem.

³Y ri Azarías kan ja ri utz ri xuben chuwech ri Jehová. Kan xuben k'a ronojel achi'el xuben ri Amasías.

⁴Man rik'in ri', man xe'elesex ta ri akuchi nikiya' kiq'ij ri wachibel pa ruwi' taq juyu' roma ri winaqi' k'a nikisuj na kamelabel chiri'. Chuqa' k'a nikiporoj na pom chiri'.

⁵Jak'a ri Jehová xuya' jun yabil chirij ri rey, ri nutaluj-ri'. Y kan xk'oje' k'a chirij k'a xken na, y roma ri' kan xya'ox k'a pa jun jay ruyon. Y ja ri Jotam ri ruk'ajol ri xk'oje' pa ruwi' ri q'atbel-tzij.

⁶Ri ch'aqa' chik rubanobal ri Azarías y ronojel ri xuben kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin ri Judá.

⁷Toq xken k'a ri Azarías, xkimuq k'a akuchi e muqun-wi ri rute-rutata' ri chiri' pa rutinamit kan ri rey David. Y ja ri Jotam ri ruk'ajol xk'oje' kan pa ruk'exel.

⁸Toq k'a k'es na ri Azarías, y chupan ri juna' juwineq waqxaqlajuj chire ri ruq'atbal-tzij, jari' toq xok kan rey ri Zacarías ruk'ajol ri Jeroboam, y xaxe wuqu' ik' ri xuq'et-tzij chiri' pa ruwach'ulew Israel.

⁹Y kan xuben k'a ri itzel chuwech ri Jehová Dios, achi'el xkiben ri rute-rutata'; y kan man xujech'ej ta ri' chire ri mak ri xuben ri Jeroboam ri ruk'ajol kan ri Nabat, toq xuben chike ri aj-Israel richin xemakun.

¹⁰K'ari' ri Salum ruk'ajol ri Jabés xyakatej chirij ri Zacarías y kan chikiwech ri winaqi' xusok y kan xukamisaj. Y ja rija' xk'oje' kan pa ruk'exel.

¹¹Ronojel ri xuben ri Zacarías kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

¹²Y re' kan xbanatej achi'el rubin ri Jehová chire ri Jehú, toq xubij: Xaxe ri rukaj sol kichin ri ak'ajol xke'apon pa q'atbel-tzij richin Israel, xcha'. Y kan keri' xbanatej.

¹³Toq k'a k'es na ri Ozías,*f5* y chupan ri juna' juwineq belejlajuj chire ri ruq'atbal-tzij, ri Salum ruk'ajol ri Jabés xok kan rey. Y xaxe jun ik' ri xuq'et-tzij pa ruwi' ri Israel, chiri' pa Samaria.

¹⁴Y ri Menahem ruk'ajol ri Gadí xel-el chiri' pa tinamit Tirsá y xbe-el pa Samaria richin xusok kan ri Salum. Xukamisaj y ja rija' xk'oje' kan pa ruk'exel richin niq'aton-tzij.

¹⁵Ronojel ri xuben ri Salum y ronojel ri xuch'ob richin xuben rik'in ri Menahem, kan tz'ibatel kan chupan ri wuj akuchi xtz'ibex-wi ronojel ri kibanobal ri rey richin Israel.

¹⁶K'ari' ri Menahem, xuben oyowal kik'in ri aj-Tífsah, xuch'ek k'a y xerukamisaj konojel ri winaqi', y kan xujeq kipan konojel ixoqi' ri koyoben alanik. K'ari' xrelesaj-pe chuwi-kiq'a' ronojel ri k'o rejqalen. Kan keri' chuqa' xuben kik'in konojel ri tinamit ri ek'o chunaqaj y k'a napon ri pa Tirsá. Keri' xuben roma kan man xkajo' ta k'a richin xok rey pa kiwi'.

¹⁷Toq ri Azarías k'a k'es na, y chupan ri juna' juwineq belejlajuj chire ri ruq'atbal-tzij pa Judá, jari' toq xok kan rey ri Menahem ruk'ajol ri Gadí, y xuq'et-tzij lajuj juna' pa ruwi' ri Israel chiri' pa Samaria.

¹⁸Rija' chuqa' xuben ri itzel taq banobel chuwech ri Jehová. Chijun ruk'aslen man xujech'ej ta kan ri' chire ri mak ri xuben ri Jeroboam ri ruk'ajol kan ri Nabat, toq xuben chike ri aj-Israel richin xemakun.

¹⁹K'ari' ri Pul*f6* rey richin Asiria xyakatej k'a chirij ri ruwach'ulew Israel. Jak'a ri Pul xubij chire ri Menahem chi nik'oje' chupan ri q'atbel-tzij wi nuya' 660 quintal saqipueq chire.

²⁰Richin chi nutoj ri saqipueq chire ri rey richin Asiria, ri Menahem xubij chi konojel ri beyoma' k'o chi nikiya' ri k'o chi nikitoj chire ri rey. Ri winaqi' ri' k'o chi nikitoj más juba' jun libra saqipueq. Keri' ri rey richin Asiria xtzolin pa rutinamit, y man xk'oje' ta qa más chiri' pan Israel.

²¹Ri ch'aqa' chik rucholajen chire ri ruk'aslen ri Menahem y ronojel ri xeruben, tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

²²Chirij ri Menahem, ri xq'aton kan tzij pa ruk'exel ja ri Pecahías ri ruk'ajol.

²³Toq k'a k'es na ri Azarías, y chupan ri juna' wolajuj chire ri ruq'atbal-tzij, jari' toq xok kan rey ri Pecahías ruk'ajol ri Menahem. Y ka'i' juna' xuq'et-tzij pa ruwi' ri ruwach'ulew Israel chiri' pa Samaria.

²⁴Jak'a ri rubanobal janila itzel xuben chuwech ri Jehová, roma rija' chuqa' kan xuben ri mak achi'el xuben ri Jeroboam ri ruk'ajol kan ri Nabat toq xuben chike ri aj-Israel richin xemakun.

²⁵Jak'a k'o jun aj-raqen pa kiwi' ri rusamajela', y rija' rubini'an Pécah ruk'ajol ri Remalías. Rija' e rachibilan ri Argob, ri Arie, y e kawineq lajuj achi'a' aj-Galaad ri xeyakatej chirij richin xkikamisaj chiri' pa Samaria chupan ri rachoch rija'. Y ja ri Pécah ri xk'oje' kan pa ruk'exel richin xuq'et-tzij.

²⁶Ri ch'aqa' chik rucholajen ri ruk'aslen ri Pecahías y ronojel ri xuben, kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Israel.

²⁷Toq k'a k'es na ri Azarías, y chupan ri juna' kawineq kablajuj chire ri ruq'atbal-tzij, jari' toq xok kan rey ri Pécah ruk'ajol ri Remalías. Y xuq'et-tzij kawineq juna' pa ruwi' ri Israel chiri' pa Samaria.

²⁸Chuqa' rija' kan xuben ri man utz ta chuwech ri Jehová, roma kan man xuch'er ta ri' chire ri mak ri xuben ri Jeroboam ruk'ajol ri Nabat, toq xuben chike ri aj-Israel richin xemakun.

²⁹Toq k'a niq'aton na tzij ri Pécah pa ruwi' ri Israel, jari' toq xpe ri Pul rey richin Asiria, y xeruch'ek ri tinamit Iión, ri Abel-bet-maacá, ri Janóah, ri Quedes, ri Hasor, ri Galaad, ri Galilea y chijun ri ruruwach'ulew ri Neftalí. Y ri winaqi' ri ek'o chiri' kan xeruk'uaj-el pan Asiria.

³⁰Chirij ri' ri Oseas ruk'ajol ri Elá xyakatej chirij ri Pécah ruk'ajol ri Remalías. Xukamisaj, y ja rija' ri xk'oje' kan pa ruk'exel richin xuq'et-tzij. Y re' xbanatej chupan ri juna' juwineq chire ri q'atbel-tzij richin ri Jotam ruk'ajol ri Azarías.

³¹Ronojel k'a ri rubanobal ri Pécah tz'ibatel k'a kan chupan ri wuj ri akuchi xtz'ibex-wi ronojel ri kibanobal ri rey richin Israel.

³²Toq k'a k'es na ri Pécah, y chupan ri ruka'n juna' chire ri ruq'atbal-tzij, jari' toq xok kan rey ri Jotam ruk'ajol ri Azarías rey richin Judá.

³³K'o k'a juwineq wo'o' rujuna' toq xuchop nuq'et-tzij, y xuq'et-tzij waqlajuj juna' pa ruwi' ri Judá chiri' pa Jerusalem. Y ri rute' rubini'an Jerusá rumi'al ri Sadoc.

³⁴Y kan ja ri utz ri xuben chuwech ri Jehová. Kan xuben k'a ronojel achi'el xuben ri Azarías ri rutata'.

³⁵Man rik'in ri', man xrelesaj ta el ri akuchi nikiya-wi kiq'ij ri wachibel pa ruwi' taq juyu' roma ri winaqi' k'a nikisuj na kamelabel chiri' y chuqa' nikiporoj pom. Jak'a rija' xpaban chik q'anej ri ruchi' ri rachoch ri Jehová ri k'o pa jotol chire ri ruwa-jay.

³⁶Y ronojel k'a ri xuben ri Jotam, kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Judá.

³⁷Y toq k'a k'es na ri Jotam, ri Jehová xuteq ri Resín rey richin Siria y ri Pécah ruk'ajol ri Remalías richin xeyakatej chikij ri aj-Judá.

³⁸Toq xken ri Jotam, xmuq akuchi e muqun-wi ri rute-rutata' chupan ri rutinamit kan ri rey David. Y ri xkanej kan pa ruk'exel ja ri Acaz ri ruk'ajol.