Read Kaqchikel 2 Rey 19 Bible Online

2 Rey 19 - Kaqchikel bible

2 Rey 19

¹Toq ri rey Ezequías xrak'axaj re', xuretz ri rutziaq y xukusaj tzieq richin bis y xbe pa rachoch ri Jehová.

²Y xubij k'a chike ri Eliaquim, ri Sebná y ri e sacerdote, richin xkikusaj kitziaq richin bis. K'ari' xeruteq-el rik'in ri q'alajirisey ruch'abel ri Dios rubini'an Isaías ruk'ajol ri Amós.

³Y rije' xkibij k'a chire ri Isaías: Ri Ezequías xubij chi re q'ij re' q'ij richin bis, ruk'ayewal y k'ix pa qawi'. Xa man jun chik yojtikir niqaben. Roj xa oj achi'el chik jun ixoq ri nralaj yan jun ak'ual y xa nik'is ruchuq'a'.

⁴Tabana' utzil kach'on k'a rik'in ri Jehová pa qawi' ri juba' chik ri ojk'o kan. Rik'in juba' ri Jehová ri qa-Dios xrak'axaj ri ch'abel ri xerubila' ri aj-raqen pa kiwi' ri aj-labal aj-Asiria, ri itzel xch'on chirij ri k'aslik Dios. Y ja ta ri Jehová xtiya'on- pe ruk'ayewal pa ruwi', xecha'.

⁵Toq xe'apon rik'in ri Isaías,

⁶rija' xubij chike: Tibij chire ri Ezequías chi ri Jehová nubij chi man tixibij-iwi' roma ri itzel taq ch'abel ri xkibij ri aj-raqen richin ri rey richin Asiria.

⁷Roma ri Dios kan xtuben chi napon jun itzel rutzijol rik'in ri rey ri', y xa xtitzolin-el pa ruruwach'ulew. Y chiri' ri Dios xtuben chire chi xtikamisex chi espada, xcha' ri Isaías.

⁸Toq ri aj-raqen pa kiwi' ri aj-labal xretamaj chi ri Senaquerib xumalij kan ri tinamit Laquis, richin niberubana' oyowal kik'in ri aj-Libná, rija' chuqa' xumalij kan ri Jerusalem y xapon akuchi k'o-wi ri rey.

⁹Chuqa' ri Senaquerib xuk'ul jun rutzijol chi ri Tirhaca rey richin Etiopía yakatajineq-pe chirij richin norubana' oyowal rik'in. K'ari' xtzolin y xeruteq ch'aqa' chik aj-raqen rik'in ri rey Ezequías y xubij:

¹⁰Rat akuquban ak'u'x rik'in a-Dios. Jak'a man yaq'olotej rik'in ri ruch'abel rija' toq nubij chi ri Jerusalem man xtijach ta pa nuq'a'.

¹¹Rat awak'axan jebel ri kik'uluwachin-el ri rey richin ri ch'aqa' chik ruwach'ulew ri e yakatajineq-pe chiqij. ¿Y rat kan nach'ob richin xkatikir xtakol awi'?

¹²¿Xetikir kami xekikol ri ki-dios ri tzobaj winaqi' richin ri ruwach'ulew ri xekik'is ri wati't-numama'? Ja tinamit re' ri xek'is: Ri Gozán, ri Harán, ri Résef y chuqa' ri winaqi' ri ek'o pa ruwach'ulew Bet-edén pa tinamit Telasar.

¹³¿Achike ta k'a xetikir xkiben ri rey kichin ri ruwach'ulew Hamat, ri Arpad, ri Sefarvaim, ri Hená y ri Ivá?, xcha'.

¹⁴Ri rey Ezequías xuk'ul k'a ri wuj ri uk'uan-apo koma ri achi'a' ri e taqon-el, y toq xutz'et yan ri nubij, jari' toq xbe-el pa rachoch ri Jehová y xurik' ri wuj chuwech ri Jehová.

¹⁵K'ari' xch'on rik'in ri Jehová y xubij: Jehová Dios richin Israel, ri atk'o chikikojol ri querubín; ja rat xabanon ri kaj y ri ruwach'ulew, y ja rat ri yaq'aton-tzij pa ruwi' chijun ruwach'ulew.

¹⁶Taya' k'a axikin Jehová y tawak'axaj ri ninbij. Tajaqa' ri awech y kinatzu'. Tawak'axaj ri ch'abel ri rutaqon-pe rubixik ri Senaquerib, toq nubij chupan ri wuj chi yaretzelaj rat ri at k'aslik Dios.

¹⁷Kan qitzij na wi, Jehová, chi ri rey richin Asiria kan xekik'is ri tzobaj winaqi' richin ri ruwach'ulew y ri kulew.

¹⁸Y kan xekik'eq pa q'aq' ri ki-dios ri e banon rik'in che' y abej, y xa achi'a' ri e banayon. Y konojel ri dios ri' kan xekik'is.

¹⁹Wakami k'a, Jehová ri at qa-Dios, tabana' utzil qojakolo' pa kiq'a' rije', richin chi niketamaj konojel ri q'atbel taq tzij richin re ruwach'ulew chi xaxe rat Jehová, kan xaxe rat ri at Dios, xcha'.

²⁰Chirij ri' ri Isaías xuteq rubixik chire ri Ezequías y xubij chire: Ri Jehová ri qa-Dios nubij chi xrak'axaj ri xabij rat chire chirij ri Senaquerib rey richin ri Asiria.

²¹Ja ch'abel re' ri xubij rija' pa ruwi' ri rey ri': Ri winaqi' aj-Sión xkebeyojoben chawij; Ri aj-Jerusalem xkebetze'en chawij toq rat xkatanimej.

²²¿Achoq chirij kami xayoq'on-wi y kan xaqasaj ruq'ij? ¿Achoq chirij k'a ri kow xach'on-wi y xatzu' rik'in nimirisanen? Re' kan chuwij yin ri in Loq'olej Dios ri xaben-wi. Xaben chuwij yin ri in ki-Dios ri aj-Israel.

²³Xe'ateq aj-raqen richin xech'on itzel chuwij. Xabij-el chike: Yin xitikir xijote' pa ruwi' taq juyu' roma janila nu-carruaje ek'o. Xijote' k'a chuwa taq juyu' Líbano. Xinapon k'a pa k'echelaj ri akuchi man jun apowineq, y chiri' xenwil nima'q molaj taq che' ri jebel kibanon. Xinqasaj ri más nima'q taq tiox-che', y ri jebelej taq k'isis.

²⁴E nuk'oton chuqa' ya' pa ch'aqa' chik ruwach'ulew y chiri' xinqum nuya'. Xabakuchi ri xibe-wi pan Egipto, xenchaqirisaj ri raqen taq ya', xacha-el.

²⁵Jak'a yin Jehová Dios ninbij chawe: ¿Man jun bey k'a awak'axan rat Senaquerib chi ja yin in biyon ri ojer kan chi yek'uluwachitej achi'el re wakami? Yin xibanon chi rat xe'awulaj ri tinamit ri e tz'apen-kij chi tz'aq.

²⁶Ri winaqi' ri ek'o chiri', kan xk'is kuchuq'a', kan janila k'a kixibin-ki' y sachineq kik'u'x. Rije' kan xkiben achi'el ri q'ayis ri k'o pa juyu', achi'el ri q'ayis ri ye'el-pe pa ruwi' taq jay: Xa yewotz'otz'ir-qa roma ri kaq'iq' ri nipe pa relebel-q'ij, y xa man yek'iy ta chik.

²⁷Yin wetaman k'a ronojel ri naben rat. Chuqa' kan wetaman chi yakatajineq janila awoyowal chuwij.

²⁸Y roma ri awoyowal y ri animirisanen; roma ri' kan xtinbenya' k'a jun ch'ich' pan atza'n, chuqa' jun pan achi' richin xkaqaqa pa nuq'a'. Y keri' xtinben chawe Senaquerib chi xkatzolin chik ri akuchi at peteneq-wi, xcha' ri Jehová.

²⁹Ri Isaías xubij chik chire ri Ezequías: Re' jare' jun retal chawe rat ri achike xtibebanatej: Re juna' re' y ri ruka'n juna' apo, rix xtitej trigo ri choj keri' nel-pe. Jak'a pa rox juna' yixbetikonej. Jari' toq yixtikir nitik-qa ruwech ri iwulew rik'in uva, y xtitej ri ruwech.

³⁰Ri winaqi' aj-Judá ri xekolotej kan, kan xkek'iyer k'a achi'el juwi-uva. Rije' xke'ok achi'el jun juwi-uva ri jebel ruchapon ri ruxe' ri ulew. Y kan pa ruk'iyal ri ruwech ri xtuya'.

³¹Roma yin Jehová ri k'iytisanel richin ronojel xtinben chi jujun chike ri aj-Jerusalem xkek'ase'. Xtinben chike ri aj-Sión chi xkekolotej kan.

³²Roma ri' yin kere' ri ninbij chirij ri Senaquerib: Rija' man xtitikir ta xtok chupan ri tinamit Jerusalem; ni ta jun ko'ol raqen ch'ab xtuk'eq ta pe. Man jun k'a xtoqaqa naqaj rukusan-pe rutobal richin oyowal, ni man jun nuben ta q'anej jun tz'aq ri nukusaj richin nuto-ri'.

³³Ri Senaquerib kan xtitzolin k'a achi'el toq xok-pe, y man xtok ta chupan ri tinamit. Ja yin Jehová ri yibin.

³⁴Yin xtinto' re tinamit re' richin xtinkol roma ninwajo-qa-wi' yin y roma chuqa' ri wajowabal pa ruwi' ri David ri nusamajel. Keri' nubij ri Jehová, xcha' ri Isaías.

³⁵Chupan ri aq'a' ri' ri Jehová xuteq jun ángel richin xerukamisaj e 185,000 achi'a' aj-Asiria ri ek'o-qa chiri'. Y toq xseqer-pe, konojel e punupuxineq chik ke taq ri'.

³⁶Jari' toq ri Senaquerib rey richin Asiria xa xuchop-el bey richin xtzolin-el, y xbek'oje' pa tinamit Nínive.

³⁷Y k'o k'a jun q'ij rija' xbe pa rachoch ri Nisroc ri ru-dios richin nuya' ruq'ij. Jari' toq ri e ruk'ajol kibini'an Adramélec y ri Sarézer xe'apon y xkikamisaj kan chi espada. K'ari' xe'animej y xebe pa ruwach'ulew Ararat. Y ri xk'oje' kan pa ruk'exel ja ri Esarhadón ri ruk'ajol.