Read Kaqchikel 2 Rey 20 Bible Online

2 Rey 20 - Kaqchikel bible

2 Rey 20

¹Chupan k'a ri q'ij ri' ri Ezequías xuchop k'a jun nimalej yabil y kan niken yan. Y xapon k'a rik'in rija' ri Isaías ri q'alajirisey ruch'abel ri Dios y xubij chire: Ri Jehová nubij chi tachojmirisaj kan ronojel ri pan awachoch, roma kan xkaken. Xa man xkak'achoj ta chik, xcha'.

²Jak'a ri Ezequías kotz'ol pa ruch'at, xtzu'un-apo chuwa-xan, xch'on rik'in ri Jehová y xubij:

³Jehová, nink'utuj utzil chawe; toqaqa chi'ak'u'x ri achike rubanik ri rubanon-pe ri nuk'aslen chawech y kan qitzij rik'in ronojel wánima nubanon ri abin chuwe, y chuqa' kan ja ri niqa' chawech ri nubanon, xcha'. Chirij ri' kan janila xoq'.

⁴Ri Isaías beneq, y toq man jani tapon pa nik'aj ruwa-jay, jari' toq ri Jehová xch'on chik pe rik'in y xubij chire:

⁵Katzolin, y kere' tabij chire ri Ezequías: Rat at rey pa ruwi' ri nutinamit. Y yin in a-Dios rat, y ri ru-Dios chuqa' ri David ri ánima amama'. Xinwak'axaj ri ach'owen, y xintz'et ri ruya'al runaq'-awech. Wakami k'a xkatink'achojirisaj richin keri' pa rox q'ij xkabe-el pa wachoch richin naya' nuq'ij.

⁶Xtinya' chik k'a wolajuj juna' ak'aslen. Xkatinkol rat y re tinamit chuwech ri rey richin Asiria. Yin kan xtinto' re nutinamit roma kan ninwajo' y roma chuqa' ri wajowabal pa ruwi' ri David ri nusamajel, xcha' ri Jehová.

⁷K'ari' ri Isaías xubij chike ri rusamajela' ri Ezequías chi tikibana' juba' ke'en wíkix. Y rije' kan xkiben, y xkik'en k'a pe y xkiya' chuwech ri itzel ch'a'k richin nik'achoj-el.

⁸K'ari' ri Ezequías xuk'utuj chire ri Isaías jun retal richin nutz'et chi ri Jehová nuk'achojirisaj-el, richin chi pa rox q'ij nitikir nibe pa rachoch ri Jehová.

⁹Y ri Isaías xubij chire: Ja retal re' ri xtuya' ri Jehová richin kan xtibanatej. ¿Nawajo' chi ri muj nibiyin chuwech ri lajuj grada,*f8* o nawajo' richin nitzolin chirij ri lajuj grada?, xcha'.

¹⁰Y ri Ezequías xubij chire chi man k'ayew ta chi ri muj nibiyin chuwech, jak'a man tikirel ta richin nitzolin chirij.

¹¹K'ari' ri Isaías xuk'utuj ruto'onik ri Jehová, y ri Jehová xuben chi ri muj xtzolin chirij lajuj grada.

¹²Chupan k'a ri q'ij ri' ri rey richin ri Babilonia ja ri Merodac-baladán ruk'ajol ri Baladán. Y rija' xrak'axaj chi ri Ezequías janila yawa', y roma ri' xeruteq-el aj-raqen. Y rije' xkik'uaj wuj y sipanik chire ri Ezequías.

¹³Y ri Ezequías, kan xeruk'ul k'a apo y xuk'ut chikiwech ri jay yakonabel richin ri rubeyomel. Xuk'ut k'a ronojel ri saqipueq, ri q'anapueq, ri jubulej taq aq'om y ri aceite jebel ch'ajch'oj. Chuqa' xuk'ut chikiwech ri jay ri akuchi yeyak-wi ri kamisabel. Y kan man jun k'a ri k'o chupan ri rachoch ri man ta xuk'ut chikiwech. Chuqa' xuk'ut ronojel ri k'o pa rajawaren.

¹⁴Chirij ri' ri q'alajirisey ruch'abel ri Dios xberutz'eta' ri Ezequías y xuk'utuj chire: ¿Akuchi k'a e peteneq-wi ri achi'a' ri xepe awik'in y chike ri xkibij chawe?, xcha'. Y ri Ezequías xubij chi e peteneq pa jun ruwach'ulew janila nej; nel chi tzij chi e peteneq k'a pa Babilonia.

¹⁵Y ri Isaías xuk'utuj chik chire: ¿Achike xkitz'et kan chupan ri awachoch?, xcha'. Y ri Ezequías xubij chire chi xkitz'et kan ronojel, y kan man jun k'a chire ri rubeyomel ri man ta xuk'ut chikiwech.

¹⁶K'ari' ri Isaías xubij chire: Tawak'axaj k'a ri ruch'abel ri Jehová:

¹⁷Xtapon k'a ri q'ij toq ronojel ri k'o chupan ri awachoch, y ronojel k'a ri kibeyomel kan ri ate-atata' k'a re wakami; ronojel re' xtuk'uex-el pa Babilonia, y kan man jun k'a xtik'oje' kan.

¹⁸Y chuqa' ri awijatzul xke'uk'uex-el pa Babilonia, y xtiban chike chi man ye'alk'ualan ta chik. Xke'ok k'a samajela' chupan ri rachoch ri rey ri chiri', xcha'.

¹⁹K'ari' ri Ezequías, xubij chire ri Isaías: Ri ruch'abel ri Jehová ri xabij janila jebel. Kan xtik'oje' uxlanibel-k'u'x y man jun xtibanatej rokik k'o nuk'aslen yin, xcha'.

²⁰Ri ch'aqa' chik rucholajen ri ruk'aslen ri Ezequías y ri uchuq'a' ri xk'oje' pa ruq'a', y ri achike rubanik xuben-q'anej jun yakbel-ya' y ri rubey ya' richin napon ri ya' pa tinamit, ronojel re' tz'ibatel kan chupan ri wuj richin ri kibanobal ri rey richin Judá.

²¹Y toq xken ri Ezequías xmuq akuchi e muqun-wi ri rute-rutata'. Y ja ri Manasés ri ruk'ajol xok kan rey pa ruk'exel.