Read Kaqchikel 2 Rey 22 Bible Online

2 Rey 22 - Kaqchikel bible

2 Rey 22

¹Ri Josías k'o k'a waqxaqi' rujuna' toq xok kan rey, y juwineq julajuj juna' xuq'et-tzij pa ruwi' ri Judá chiri' pa Jerusalem. Ri rute' rubini'an Jedidá y rumi'al ri Adaías aj-Boscat.

²Ri Josías kan xuben k'a ri utz chuwech ri Dios. Kan man xuya' ta k'a kan ri Jehová, achi'el xuben ri rey David.

³Chupan ri juna' waqxaqlajuj chire ri q'atbel-tzij richin ri rey Josías, rija' xroyoj ri aj-tz'ib. Y ri aj-tz'ib rubini'an Safán ruk'ajol ri Asalías y rumam kan ri Mesulam. Y ri Josías xuteq-el pa rachoch ri Jehová, y xubij-el chire:

⁴Kabiyin rik'in ri nimalej sacerdote Hilquías, y tabij chire chi tumolo' ruchi' ri méro ri kik'uan-apo ri winaqi' pa rachoch ri Jehová ri molon kan koma ri e chajiy ri ruchi' ri jay.

⁵Y tuya' pa kiq'a' ri achi'a' ri e cha'on richin ek'o pa ruwi' ri samaj richin ri rachoch ri Jehová. Y ja rije' ketojo ri yesamajin ri ch'aratajineq chire ri jay.

⁶Ri ajanela', ri aj-tz'aq y chuqa' ri yeloq'on che' y ri abej.

⁷Y man nik'atzin ta richin nitz'et chuwi-kiq'a' ri méro ri jachon pa kiq'a' roma kan e chojmilej taq winaqi', xcha'.

⁸K'ari' ri Hilquías ri nimalej sacerdote xubij chire ri Safán ri aj-tz'ib chi xril ri wuj richin ri rupixa' ri Jehová chiri' pa rachoch ri Dios. Y ri Hilquías xujech chire ri wuj ri', y ri Safán xusik'ij.

⁹K'ari' ri Safán xberubij chire ri rey y xubij: Ri aj-raqen xebekik'ama-pe ri méro ri k'o kan pa rachoch ri Jehová y xkijech pa kiq'a' ri aj-raqen ri ek'o pa ruwi' ri samaj richin ri rachoch ri Dios richin nikichojmirisaj.

¹⁰Chuqa' ri Hilquías xujech-pe jun wuj chuwe, xcha'. Y ri Safán xusik'ij chuwech ri rey.

¹¹Y toq ri Josías xrak'axaj ri nubij ri wuj richin ri pixa', xuretz ri rutziaq chirij roma bis.

¹²K'ari' xuteq rubixik chi tikimolo-ki' ri Hilquías ri nimalej sacerdote, ri Ahicam ri ruk'ajol ri Safán, ri Acbor ruk'ajol ri Micaías, ri Safán aj-tz'ib y ri Asaías ri jun aj-samaj richin ri rey. Y ri Josías xubij chike:

¹³Kixbiyin richin nibek'ulubej ri Jehová pa nuwi' yin y pa kiwi' konojel winaqi' richin ri tinamit Judá, chirij ri ch'abel ri e tz'ibatel kan chupan ri wuj ri xilitej. Jujik chi ri Jehová yakatajineq royowal chiqij roma ri qate-qatata' man xeniman ta chire ri wuj ri', richin xkiben ta ronojel achi'el nubij ri tz'ibatel kan, xcha'.

¹⁴Y k'o k'a jun ixoq q'alajirisey ruch'abel ri Dios rubini'an Huldá, rixjayil ri Salum ruk'ajol ri Ticvá y rumam ri Harhás. Ri Salum ja rija' ri chajiy richin akuchi niyak-wi ri tzieq kichin ri sacerdote. Y ri Huldá k'o k'a rachoch chiri' ri akuchi nibix Ruka'n Tanaj chire richin ri tinamit Jerusalem. Ri e wo'o' achi'a' xebe rik'in, y toq xe'apon,

¹⁵rija' xubij k'a pe chike chi ri Jehová xubij chi tikibij chire ri Josías:

¹⁶Kere' nubij ri Jehová: Yin xtink'en-pe jun ruk'ayewal pa kiwi' konojel ri aj-Judá y ri kiruwach'ulew, kan achi'el nubij ronojel ri tz'ibatel kan chupan ri wuj ri xasik'ij rat.

¹⁷Rije' kan xinkimalij kan y xkiporoj pom chikiwech ri jujun chik dios. Chuqa' xkiya' kiq'ij ri wachibel ri xekibanala'. Roma ri' kan xyakatej k'a woyowal pa ruwi' re tinamit re', y ri woyowal man xtik'is ta qa choj keri'.

¹⁸Jak'a rat Josías, tawak'axaj ri xtinben.

¹⁹Ri awánima xok ch'uch'uj y xaqasaj-awi' chinuwech toq xawak'axaj ri nubij ri wuj chirij re tinamit re' y chikij ri winaqi' ri ek'o chupan. Rat kan janila xabison toq xawak'axaj chi kan man jun chik wineq xtik'oje' kan y ri ruwach'ulew kan xtik'is. Kan xaretz ri atziaq chawij y xatoq' chinuwech, y yin kan xatinwak'axaj.

²⁰Roma ri' man xtink'en ta pe ri ruk'ayewal rokik rat at k'es. Xkaken k'a rik'in uxlanibel-k'u'x y xkamuq kik'in ri awati't-amama'; keri' nubij ri Jehová xcha'. Y ri e wo'o' achi'a' ri' xbekibij k'a chire ri rey ri xbix-el chike.