Read Kaqchikel 2 Rey 25 Bible Online

2 Rey 25 - Kaqchikel bible

2 Rey 25

¹Chupan ri juna' beleje' richin ri q'atbel-tzij richin ri rey Sedequías, chupan ri lajuj q'ij richin ri ik' lajuj, jari' toq ri Nabucodonosor rey richin Babilonia xyakatej chik pe chikij ri aj-Jerusalem, e rachibilan-pe konojel aj-labal. Y rije' xkisutij-rij ri tinamit. Xek'oje-qa chiri' chirij ri tinamit y xekibanala-q'anej tz'aq richin nikito-ki'.

²Y xsutix k'a rij ri tinamit, k'a xapon na ri juna' julajuj richin ri q'atbel-tzij richin ri rey Sedequías.

³Chupan ri q'ij beleje' richin ri rukaj ik' chire ri juna' ri', xkichop k'a nikiq'axaj jun nimalej wayjal chupan ri tinamit, y kan maneq chik wey richin nikitej ri winaqi'.

⁴Chupan ri q'ij ri' ri aj-Babilonia xkiben jun jul chupan ri tz'aq richin ye'ok chupan ri tinamit. Roma ri' ri Sedequías y konojel ri aj-labal xe'animej-el ri aq'a' ri' stape' ri aj-Babilonia kisutin-rij ri tz'aq. Ri Sedequías y ri achi'a' xe'ik'o-el ke taq ri' akuchi k'o-wi ruchi' ri ruqejoj ri rey, ri k'o chukojol ri ka'i' tz'aq. Rije' xkichop-el bey richin xebe pa relebel-q'ij chire ri raqen-ya' Jordán.

⁵Jak'a ri aj-labal aj-Babilonia, xekinabej y xekitzeqelibej-el. Kan xkichop k'a ri Sedequías ri chiri' pa taq'aj richin ri tinamit Jericó, jak'a ri aj-labal ri e richin rija' xa xe'animej.

⁶Toq kichapon chik k'a ri Sedequías, xkik'uaj k'a rik'in ri Nabucodonosor chiri' pa tinamit Riblá richin nubij chire ri achike nuk'uluwachij.

⁷Ri aj-Babilonia xebekik'ama-pe ri ruk'ajol ri Sedequías, y kan ja ri chuwech rija' xekikamisaj. K'ari' xekelesaj ri ka'i' runaq' taq ruwech ri Sedequías y xkixim rik'in cadena banon rik'in q'eqapueq, y xkik'uaj k'a pa Babilonia.

⁸Y toq xapon ri ruwuq q'ij richin ri ro' ik', chire ri juna' belejlajuj richin ri q'atbel-tzij richin ri Nabucodonosor, jari' toq ri Nebuzaradán, ri aj-raqen pa kiwi' ri chajinela' richin ri rey, xoqaqa pa tinamit Jerusalem.

⁹Y rija' xuya' k'a ruq'aq'al ri rachoch ri Jehová, ri rachoch ri rey, ronojel jay ri kichin ri e tata'al y ronojel ri jay ri k'o pa Jerusalem.

¹⁰Y ri Nebuzaradán xuteq rubixik chike ri aj-labal aj-Babilonia richin tikiwulaj ri tz'aq ri k'o chirij ri tinamit.

¹¹Y k'ari' xeruk'uaj k'a el ri winaqi' ri k'a ek'o na kan chiri' pa Jerusalem, chuqa' ri winaqi' ri junan kiwech xkiben kik'in ri aj-Babilonia y ri ch'aqa' chik winaqi' aj-Judá.

¹²Jak'a ri Nebuzaradán k'a xeruya' na kan jujun winaqi' aj chiri' ri man jun ok k'o kik'in, richin chi ja rije' ri yesamajin ri ulew ri tikon uva chuwech y nikisamajij ch'aqa' chik ulew.

¹³Y ri aj-Babilonia xekipaxij kan ri pilar ri e banon rik'in q'enq'oj-pueq ri ek'o chiri' pa rachoch ri Jehová, ri ruch'okolibal y ri nimalej yakbel-ya' ri banon rik'in q'enq'oj-pueq ri k'o chiri' pa rachoch ri Jehová. Y xkik'uaj-el pa Babilonia.

¹⁴Xekik'uaj chuqa' ri k'ojelibel ri achi'el apaste kibanik, ri tukbel, ri qupibel rutza'n-q'aq', ri pajbel, y ri ch'aqa' chik samajibel; y ronojel re' e banon rik'in q'enq'oj-pueq.

¹⁵Ri aj-raqen kichin ri chajinela' richin ri Nabucodonosor xuk'uaj-el ri porobel-pom y ri k'ojelibel ri e banon rik'in q'anapueq y saqipueq.

¹⁶Ri ka'i' pilar, ri nimalej yakbel-ya', ri ch'okolibel ri e rubanon kan ri rey Salomón richin ri rachoch ri Jehová, ri aj-Babilonia kan man xetikir ta k'a xketaj ronojel ri q'enq'oj-pueq ri'.

¹⁷Ri kipalen chikijujunal ri pilar kaji' jaj rik'in nik'aj; y ri pa ruwi' ya'on jun retz'aba'l ri banon rik'in q'enq'oj-pueq. Ri kipalen ri retz'aba'l jun jaj rik'in ka'i' q'a'aj. Kik'uan chuqa' wiqobel chikij ri achi'el ya'l y re wiqobel re' kik'uan chuqa' taq ketz'aba'l ri achi'el granada kibanik y e banon rik'in q'enq'oj-pueq. Ri pilar kan junan k'a kibanik chi e ka'i'.

¹⁸Ri aj-raqen kichin ri chajinela' aj-Babilonia xkichop y xekik'uaj-el ri Seraías ri nimalej sacerdote, ri Sofonías jun chik sacerdote y ri e oxi' chik chajinela' richin ruchi' ri rachoch ri Dios.

¹⁹Y chikikojol ri winaqi' ri ek'o pa tinamit Jerusalem xkik'uaj-el ri aj-raqen pa kiwi' ri aj-labal, e wo'o' achi'a' ri yepixaban richin ri rey, ri aj-tz'ib ri nitz'iban kibi' ri aj-labal y chuqa' e oxk'al achi'a' ri k'o kiq'ij chupan ri tinamit Jerusalem.

²⁰Ja rije' ri xeruk'uaj-el ri Nebuzaradán richin xeberujacha' pa ruq'a' ri Nabucodonosor ri k'o kan pa tinamit Riblá.

²¹Y ri Nabucodonosor xerukamisaj chiri' pa Riblá pa ruwach'ulew Hamat. Keri' toq xe'elesex-el ri ch'aqa' chik aj-Judá pa kiruwach'ulew.

²²Y ri Nabucodonosor xuya' kan ri Guedalías richin xok q'atoy-tzij pa ruwi' ri ruwach'ulew Judá. Y rija' ruk'ajol ri Ahicam y rumam ri Safán.

²³Jak'a ri e kaji' aj-raqen pa kiwi' ri aj-labal aj-Judá xkak'axaj chi ri Guedalías xok kan q'atoy-tzij pa kiwi'. Rije' xebe k'a rik'in chiri' pa tinamit Mispá. Rije' kibini'an Ismael ruk'ajol ri Netanías rumam kan ri Elisamá y rijatzul kan ri David, ri Johanán ruk'ajol ri Careáh, ri Seraías ruk'ajol ri Tanhúmet aj-Netofá y ri Jaazanías aj-Maacá. Y ri Guedalías kan xuya' rutzij chikiwech rije' y ri aj-labal ri ek'o pa kiq'a' y xubij chike: Man tixibij-iwi' chikiwech ri aj-raqen aj-Babilonia. Kixk'oje' wawe' chupan re qaruwach'ulew y kan tibana' k'a achike nrajo' ri Nabucodonosor, richin utz xkixk'ulun, xcha'. Jak'a chupan ri ruwuq ik' ri Ismael e rachibilan e lajuj achi'a' xebe y xbekikamisaj ri Guedalías. Chuqa' xekikamisaj kan ri achi'a' aj-Judá y ri aj-Babilonia ri ek'o chiri' rik'in rija' pa Mispá.

²⁶Roma ri' konojel ri winaqi' richin ri tinamit, y ri aj-raqen ri ek'o pa kiwi' ri aj-labal, xe'animej-el y xebe k'a pan Egipto, roma xkik'en kikiy ri aj-Babilonia.

²⁷Y toq xapon yan k'a juwineq wuqlajuj juna' chi tuk'uex-el ri Joaquín ri rey richin Judá, ja juna' ri' toq ri Evil-merodac xok-q'anej rey ri chiri' pa Babilonia. Rija' xuya' k'a el q'ij chire ri Joaquín richin xel-el ri akuchi tz'apen-wi. Y re' xbanatej chupan ri q'ij juwineq wuqu' richin ri ik' kablajuj chire ri juna' ri'.

²⁸Y rija' kan janila jebel xuben rik'in ri Joaquín. Kan xuben chire chi más nim ruq'ij chikiwech ri ch'aqa' chik rey ri e uk'uan-el pa Babilonia.

²⁹Y keri' ri Joaquín man xukusaj ta chik tzieq ri nikikusaj ri samajela' e yuqul pa samaj. Xa ja ri rutziaq rija' ri xukusaj, y kan rik'in k'a ri rey xwa-wi chupan chijun ruk'aslen.

³⁰Y q'ij-q'ij xya'ox ri janipe' ri nik'atzin chire roma ri rey, y kan keri' xuben chire jampe' xk'ase-el.