Read Kaqchikel 2 Rey 5 Bible Online

2 Rey 5 - Kaqchikel bible

2 Rey 5

¹K'o k'a jun achin aj-raqen pa kiwi' ri aj-labal richin ri ruwach'ulew Siria. Y ri achin ri' rubini'an Naamán; rija' janila nim ruq'ij chuwech ri rey richin Siria, y kan ruya'on pa nabey chikiwech ri ch'aqa' chik aj-raqen. Ri Naamán kan maneq xibinri'il chuwech, y kan xukusex k'a roma ri Jehová richin xukol ri Siria. Jak'a rija' xa k'o jun yabil chirij ri kan nutaluj-ri'.

²Chiri' pa Siria xe'el k'a pe achi'a' pa taq tzobaj ri e richin oyowal richin yebekik'ama' winaqi' pan Israel. Y k'o k'a jun q'ij xkik'uaj-el jun xten, y re xten re' xbeyuqe' pa samaj rik'in ri rixjayil ri Naamán.

³Y k'o k'a jun q'ij re xten re' xubij chire ri rajaw: Wi ta ri Naamán nuk'utuj ta utzil chire ri q'alajirisey ruch'abel ri Dios ri k'o chila' pa ruwach'ulew Samaria, rija' xtuk'achojirisaj chire ri ruyabil, xcha'.

⁴Toq xrak'axaj ri Naamán, xberutzijoj chire ri rey, y xubij chire ronojel ri xubij ri xten aj-Israel.

⁵Y ri rey richin Siria xubij chire ri Naamán: Kabiyin, y yin xtinteq-el jun wuj chire ri rey richin Israel richin xkaruk'ul chi utzil, xcha'. Keri' xbe ri Naamán pa ruwach'ulew Israel, y xuk'uaj-el jubama wuqu' quintal saqipueq, jun quintal rik'in nik'aj q'anapueq y lajuj jal tzieq.

⁶Y xuk'uaj k'a el ri wuj richin ri rey richin Israel, y ri wuj kere' nubij: Toq xtapon pan aq'a' re jun wuj re', k'ari' xtawetamaj chi yin nutaqon-el chawe re nusamajel rubini'an Naamán, jun chike ri aj-raqen ri ek'o wik'in, richin chi nak'achojirisaj chire ri ruyabil, ncha' ri wuj.

⁷Toq ri rey richin Israel xusik'ij re wuj re', kan xuretz k'a ri rutziaq chirij, y xubij: ¡Yin, man in Dios ta richin ninya' ruk'aslen re achin re', ni richin ninwelesaj ruk'aslen. ¿Achike k'a roma wik'in yin xuteq-pe richin chi nink'ach'ojirisaj-el chire ri ruyabil? Titz'eta' na pe, ri rey richin Siria kere' xuben xaxe roma nrajo' chi niyakatej-pe chiqij, xcha'.

⁸Toq ri Eliseo, ri rusamajel ri Dios, xrak'axaj chi ri rey richin Israel xuretz rutziaq roma xuxibij-ri', xuteq rubixik chire: ¿Achike roma xaretz ri atziaq chawij? Tipe k'a wik'in yin ri achin ri' richin nretamaj chi wawe' pan Israel k'o jun q'alajirisey ruch'abel ri Dios, xcha'.

⁹Chirij ri' xapon k'a ri Naamán chuchi' ri rachoch ri Eliseo y e ruk'uan k'a el ri rukiej y ri ru-carruaje. Y ri Naamán xbepa'e' chiri' chuchi' ri jay.

¹⁰K'ari' ri Eliseo xuteq-pe ri rusamajel rik'in ri Naamán y xubij-el chire: Kabiyin pa raqen-ya' Jordán y tabech'aja-awi' wuqu' mul chupan ri ya' ri'; y ri ach'akul kan xtich'ajch'ojir, xcha-el.

¹¹Jak'a ri Naamán xa xyakatej janila royowal y xtzolej kik'in ri rusamajela', y xubij: Yin kan xinch'ob-qa pa wánima chi ri achin ri' xtel-pe chi nuk'ulik, y keri' pa'el xtich'on rik'in ri Jehová ri ru-Dios, xtutzeqej k'a ri ruq'a' y xtuya' akuchi k'o-wi ri ch'a'k, y keri' chi'anin xkik'achoj-el.

¹²Ri raqen-ya' Abaná y ri raqen-ya' Farfar, ri ek'o pa Damasco, kan más e utz chuwech ri ek'o wawe' pan Israel. Wi ta yibe'atin chupan jun chike ri ka'i' raqen taq ya' ri, ¿man yik'achoj ta kami?, xcha'. Y rik'in janila royowal xel-el chiri'.

¹³Jak'a ri rusamajela' ri Naamán xebe-apo rik'in y xkibij chire: Qajaw roj, wi ta ri q'alajirisey ruch'abel ri Dios nubij ta chawe chi tabana' jun samaj ri janila k'ayew, rat kan ta xaben. Jak'a re wakami, xaxe xubij chawe chi kabetatin chupan ri raqen-ya' Jordán, y xkak'achoj, xecha'.

¹⁴K'ari' xbe ri Naamán, y xuch'ej-ri' wuqu' mul chupan ri raqen ya' Jordán, achi'el xubij-el ri rusamajel ri Dios chire. Y ri ruch'akul xch'ajch'ojir, y kan achi'el ruch'akul jun ak'ual xuben kan.

¹⁵Chirij ri' ri Naamán y konojel ri e beneq rik'in xetzolin chik rik'in ri Eliseo. Y ri Naamán xbepa'e' chuwech, y xubij chire: Wakami xq'ax chinuwech chi kan xaxe ri a-Dios rat ri k'o wawe' pan Israel, ri Dios richin chijun ri ruwach'ulew. Wakami k'a nink'utuj utzil chawe chi tak'ulu' kan re jun sipanik ri nuk'amon-pe chawe, xcha' chire.

¹⁶Jak'a ri Eliseo xubij: Ninya' nutzij chuwech ri Jehová, ri achoq chuwech ink'o-wi, chi kan man jun k'a chire ri ak'amon-pe ri xtink'ul kan chawech, xcha'. Y ri Naamán kan nuk'utuj k'a utzil chire chi tuk'ulu' kan ri sipanik; jak'a ri Eliseo kan man xrajo' ta xuk'ul kan.

¹⁷K'ari' ri Naamán xubij chire ri Eliseo: Xaxe k'a nink'utuj utzil chawe chi taya' q'ij chuwe richin nink'uaj-el juba' ulew ri janipe' yetikir nikik'uaj e ka'i' kowilej taq kiej. Roma re chiqawech-apo, yin man xtinsuj ta chik poron chikop, ni man xtinsuj ta chik kamelabel chikiwech ri ch'aqa' chik dios; xa kan xaxe chire ri Jehová xtinsuj-wi.

¹⁸Ninwoyobej k'a chi ri Jehová xtukuy ta k'a ri numak yin toq ri wajaw xkiruk'uaj-el pa rachoch ri ru-dios rubini'an Rimón, richin niberuya' ruq'ij. Y xkirujik'-qa chi nuq'a', y roma ri' yin chuqa' xkixuke-qa. Toq xtinben keri', ri Jehová kan ta k'a xtukuy ri numak ri', xcha'.

¹⁹Y ri Eliseo xujech k'a el ri Naamán y xubij-el chire: Kabiyin rik'in uxlanibel-k'u'x, xcha-el. Keri' ri Naamán xkichop k'a el bey.

²⁰Rokik ri Naamán kichapon-el bey, ri Guehazí, ri rusamajel ri Eliseo, xubij-qa pa ránima: Ri wajaw xuya-el q'ij chire ri Naamán richin xbe. Rija' kan janila k'a chi sipanik ri ruk'amon-pe; jak'a ri wajaw kan man jun rajel xuk'ul kan. Wakami yin kan pa rubi' ri Jehová xtintzeqelibej-el, y xtinbenq'i', y xtink'en kan juba' chire ri sipanik, xcha-qa.

²¹K'ari' ri Guehazí xutzeqelibej-el ri Naamán; y ri Naamán toq xutz'et chi ri Guehazí rutzeqeliben-el, xpa'e' y xqaqa-pe chupan ri ru-carruaje, richin xuk'ul-apo; y xuk'utuj chire wi utz beneq ronojel chikiwech.

²²Y rija' xubij: Ja' utz. Ri wajaw xiruteq-pe richin nonbij chawe chi wakami yan xe'apon rik'in e ka'i' q'alajirisey ruch'abel ri Dios, ri e peteneq chuwi' taq juyu' richin Efraín. Wakami k'a nuk'utuj utzil chawe chi taya' kan 106 libra saqipueq chike, y ka'i' jal k'ak'a' tzieq, xcha' chire.

²³Y ri Naamán xubij: Yin nink'utuj utzil chawe chi tak'ama' kan ka'i' mul chire ri ruk'utun-pe ri awajaw, xcha'. Y kan xuben chire chi xuk'en kan, y xuxim kan pa ka'i'. Y chuqa' xuya' kan ri ka'i' jal tzieq. K'ari' ri Naamán xuben chike e ka'i' rusamajela' richin xkejqaj-el ronojel re', y xe'ik'o-el chuwech ri Guehazí.

²⁴Y toq xe'apon-q'anej ri akuchi k'o-wi ri kachoch, jari' toq ri Guehazí xuk'en kan ri saqipueq y ri tzieq richin xuyek kan chirachoch. K'ari' xeruteq-el ri samajela' ri'.

²⁵Y rija' xok-apo pa jay, y xbe-apo rik'in ri Eliseo. Y ri Eliseo xubij chire: ¿Akuchi at peteneq-wi Guehazí?, xcha'. Y ri Guehazí xubij chi rija' kan man jun akuchi beneq-wi.

²⁶K'ari' ri Eliseo xubij chire: ¿Man awetaman ta k'a chi ri wánima yin chuqa' k'o chiri' rik'in ri Naamán toq rija' xqaqa-pe chupan ri ru-carruaje richin xaruk'ul? Re wakami, man q'ij ta richin yabeyomer-q'anej, y keri' naloq' ruche'el olivo, tiko'n richin uva, kokoj y nima'q taq awej y samajela' chi ixoqi', chi achi'a'.

²⁷Roma kere' xaben, ri ruyabil ri Naamán xtiq'ax chawij rat y chikij ri awijatzul richin q'asen, xcha' ri Eliseo. Keri' ri Guehazí xel-el chiri' rik'in ri Eliseo, y kan nojineq ri ruch'akul rik'in ri yabil, y kan seq-seq rubanon achi'el ri chuma-tew.