Read Kaqchikel 2 Rey 9 Bible Online

2 Rey 9 - Kaqchikel bible

2 Rey 9

¹Rokik ri Joram nraq'omaj-ri', ri Eliseo q'alajirisey ruch'abel ri Dios xroyoj jun chike ri rutijoxel, q'alajirisey ruch'abel ri Dios, y xubij chire: Tabana' achojmil richin yabe pa tinamit Ramot richin Galaad, y tak'uaj-el jun ti bojo'y nojineq chi aceite.

²Toq xkatapon chiri' takanoj ri Jehú ruk'ajol ri Josafat, y rumam ri Nimsí. Y toq xtatz'et, tawelesaj-pe chikikojol ri rachibil y tak'uaj pa jun chik jay ri kan man jun wineq k'o chupan.

³K'ari' tachapa' ri ti bojo'y, y taq'eja' ri aceite pa rujolon ri Jehú, y tabij chire chi kere' nubij ri Jehová: Yin xatincha' y ninqasaj aceite pan awi' richin yatok rey pa ruwi' ri ruwach'ulew Israel, nicha' ri Jehová, tabij. Chirij ri' tajaqa' ri ruchi' ri jay, katanimej-pe y man kapa'e-qa k'a xkatoqaqa na re wawe', xcha-el ri Eliseo chire.

⁴Ri tijoxel ri' xbe k'a pa Ramot, richin Galaad.

⁵Toq xapon chiri', ri e aj-raqen pa kiwi' ri aj-labal e tz'uyul pa jun jay. Y ri tijoxel xubij: Táta k'o ri ninwajo' ninbij chawe, xcha'. Y ja ri Jehú ri xbech'on-pe y xuk'utuj ri achike chike rije' ri nukanoj. Y ri tijoxel xubij chi kan ja rija' ri nukanoj.

⁶Y ri Jehú xel-pe chikikojol ri rachibil y xok-apo pa jun chik jay. Y ri tijoxel, q'alajirisey ruch'abel ri Dios, xuq'ej ri aceite pa rujolon y xubij chire: Kere' nubij ri Jehová ri qa-Dios richin Israel: Yin xatincha' y ninqasaj aceite pan awi' richin yatok rey pa ruwi' ri nutinamit Israel.

⁷Rat kan xke'ak'is k'a ri e rijatzul kan ri Acab, richin chi niqaqa pa kiwi' rije' ri xkiben chike ri nusamajela' ri e q'alajirisey ri nuch'abel, toq ri Jezabel xuben chi xbiyin kikik'el.

⁸Keri' xkek'is konojel ri e rijatzul kan ri Acab; Kan xkek'is k'a konojel ri achi'a' ri e richin rija'; stape' ri e yuqul pa samaj rik'in o ri man yuqul ta pa samaj.

⁹Xtinbenbana' rik'in ri aj pa rachoch ri Acab achi'el xinben kik'in ri e rijatzul kan ri Jeroboam ruk'ajol kan ri Nabat, y kik'in ri e rijatzul kan ri Baasá ruk'ajol kan ri Ahías.

¹⁰Y pa ruwi' ri Jezabel; xtinben chi ri ruch'akul rija' xtitij koma ri tz'i' chiri' pa jun ulew richin Jezreel, y kan man jun xtimuqun richin, nicha' ri Jehová, xcha' ri q'alajirisey ruch'abel ri Dios. Kan xaxe k'a xubij kan re'; xujeq-pe ri ruchi' ri jay y xel-pe chi'anin.

¹¹Chirij ri' ri Jehú xbe'el-pe pa jay y ri rachibil xkik'utuj chire: ¿Man jun xak'uluwachij? ¿Achike roma xpe la jun ch'u'j la' awik'in?, xecha' chire. Ri Jehú xubij: Rix kan iwetaman chik ri achike ch'abel yerubij ri achin ri', xcha'.

¹²Ri rachibil xkibij chik chire: Man tatz'uk-tzij. ¡Tatzijoj chiqe ronojel ri xubij kan chawe, xecha'. Y ri Jehú kan xutzijoj k'a chike ri xbix chire roma ri Eliseo: Xubij chi ri Jehová xucha' yan ri Jehú, y xuq'ej aceite pa ruwi' richin xok kan rey pa ruwi' ri tinamit Israel.

¹³K'ari' chikijujunal xkichop chi'anin ri kitziaq ri kiq'un, y xkiya' pa raqen ri Jehú. K'ari' xkixupuj ri trompeta y xkibij: Ja ri Jehú, jari' ri rey, xecha'.

¹⁴Keri' ri Jehú ruk'ajol ri Josafat y rumam kan ri Nimsí, xuchop xupaba-ri' chuwech ri Joram. Ri Joram xk'oje-el pa tinamit Ramot ri k'o pa Galaad kik'in konojel ri aj-Israel richin xuchajij, roma ri Hazael rey richin Siria kan nrajo' nuben oyowal kik'in.

¹⁵Jak'a ri Joram xa xtzolin pa Jezreel, richin xberaq'omaj-ri' chire ri sokotajik ri xkiben chire toq xkiben oyowal kik'in ri aj-Siria. Y ri Jehú xubij k'a chike ri rachibil ri ek'o chiri' pa Ramot: Wi rix kan keri' niwajo', man jun k'a tel-el chupan re tinamit, richin niberuya' rutzijol pa Jezreel, xcha'.

¹⁶K'ari' ri Jehú xjote-el pa ru-carruaje, y xbe pa Jezreel richin xberila' ri Joram ri k'o chiri' roma yawa'. Chuqa' ri Ocozías rey richin Judá chiri' k'o-wi, roma beneq chutz'etik ri Joram.

¹⁷Y toq ri Jehú xnaqajub-apo pa Jezreel, jari' toq ri chajinel ri k'o chiri' pa ruwi' ri tz'aq, xutz'et chi e beneq-apo ri tzobaj winaqi' richin ri Jehú. Y roma ri' xsik'in-apo kik'in ri rachibil, y xubij: K'o winaqi' e richin oyowal e peteneq, xcha-apo. Ri Joram kan xubij k'a chi titaq-el jun achin chirij kiej richin niberetamaj kiwech, y tuk'utuj chike wi e peteneq rik'in uxlanibel-k'u'x.

¹⁸Xbe k'a ri achin, y toq xapon kik'in xubij chike: Ri rey rutaqon-pe ruk'utuxik, wi ix peteneq rik'in uxlanibel-k'u'x o ni, xcha'. Y ri Jehú xubij chire: Rat man nik'atzin ta richin nawetamaj re'. Katanpe chuwij y kinatzeqelibej, xcha'. K'ari' ri chajinel ri k'o pa ruwi' ri tz'aq xubij-apo chike ri rachibil chi ri achin ri taqon-el chikitz'etik ri winaqi', xapon yan kik'in, jak'a xa man nitzolin ta pe.

¹⁹K'ari' ri Joram xuteq chik el jun achin ri xbe chirij kiej, y toq xapon re achin re' rik'in ri Jehú, xuk'utuj chire wi e peteneq rik'in uxlanibel-k'u'x o ni. Y ri Jehú xubij chi rija' man nik'atzin ta richin nretamaj, y xubij chire chi tutzeqelibej.

²⁰K'ari' ri chajinel ri k'o pa ruwi' ri tz'aq xubij chik jun bey chike ri rachibil chi ri achin ri taqon-el chikitz'etik ri winaqi' xapon yan kik'in, jak'a xa man nitzolin ta pe. Y xubij chuqa' chi ri ik'owineq-pe chikiwech ri tzobaj winaqi' ri e peteneq, achi'el xa ja ri Jehú ri ruk'ajol ri Nimsí, roma kan achi'el ch'u'j ruk'amon-pe ri ru-carruaje.

²¹K'ari' ri Joram xubij chi tichojmirisex ri ru-carruaje rija'. Y toq banon chik rutzil ri carruaje, jari' toq xe'el-pe ri Joram rey richin Israel y ri Ocozías rey richin Judá, chikijujunal pa ki-carruaje. Xbekik'ulu' k'a ri Jehú, y xbekila' chiri' pa rulew kan ri Nabot ri k'o chunaqaj ri Jezreel.

²²Y toq ri Joram xapon rik'in ri Jehú, xuk'utuj chire wi k'o uxlanibel-k'u'x o ni. Y ri Jehú xubij: ¡Achi'el ta k'a chi xtik'oje' uxlanibel-k'u'x, rokik ri ate' Jezabel xa k'a nuya' na kiq'ij ri ch'aqa' chik dios, y chuqa' k'a najin rik'in ri mak richin itz!, xcha'.

²³K'ari' ri Joram chi'anin xupiskolij-el ri ru-carruaje, xanimej y xubij chire ri Ocozías: ¡Wakami xa xojq'ol! Ri Jehú xa man k'o ta chik qik'in, xcha' ri Joram.

²⁴Y ri Jehú xujik' k'a ri rute-ruch'ab, y xuq'ijuj ri che'el-rij ri Joram. Y ri ko'ol raqen ch'ab kan xbek'ulun k'a pe chuwa-ruk'u'x ri Joram, y rija' xtzaq-qa chupan ri ru-carruaje.

²⁵K'ari' ri Jehú xubij chire ri aj-raqen rubini'an Bidcar: Tabek'ama-pe, y tabeya' pa rulew kan ri Nabot ri aj-Jezreel. Toqaqa k'a chi'ak'u'x toq rat y yin junan oj beneq rik'in ri Acab ri rutata' pa carruaje, toq ri Jehová xubij chi kere' xtuk'uluwachij rija' toq xubij:

²⁶Yin kan xintz'et ri rukik'el ri Nabot, y ri kikik'el ri e ralk'ual ri xbiyin. Roma ri' xtinbenya' ruk'exel chawe chupan re ulew re', xcha' kan ri Jehová chire. Wakami k'a tak'uaj, y tabek'aqa' kan pa rulew kan ri Nabot, achi'el rubin ri Jehová, xcha' ri Jehú.

²⁷Toq ri Ocozías rey richin Judá xutz'et ronojel re', xanimej-el y xbe chupan ri bey ri nibe pa tinamit Bet-hagan. Jak'a ri Jehú xutzeqelibej-el y xubij chi tikamisex chuqa' ri Ocozías chupan la ru-carruaje. Y xkisok k'a chiri' chuwa taq juyu' richin ri tinamit Gur, ri k'o chunaqaj ri tinamit Ibleam. Jak'a ri Ocozías k'a xanimej na y xapon pa Meguido, y k'a chiri' xken-wi.

²⁸Y ri rusamajela' rija' xkiya' k'a el ri ruch'akul pa jun carruaje y xkik'uaj k'a pa Jerusalem. Y xkimuq akuchi e muqun-wi ri rute-rutata', ri chiri' pa tinamit richin kan ri rey David.

²⁹Ri Ocozías xuchop k'a ri ruq'atbal-tzij pa ruwi' ri Judá chupan ri juna' julajuj richin ri q'atbel-tzij richin ri Joram, ruk'ajol kan ri Acab pa ruwi' ri ruwach'ulew Israel.

³⁰Y toq xapon ri Jehú pa tinamit Jezreel, jari' toq ri Jezabel xrak'axaj, y xuyala-el aq'om chi runaq'-ruwech y xuben-el ruchojmil jebel ri rusumal-ruwi'. K'ari' xtzu'un-pe pa jun ventana.

³¹Y toq ri Jehú xpa'e-qa chiri' chuxe' ri ventana, ri Jezabel xubij-qa chire: ¿At peteneq rik'in uxlanibel-k'u'x? O xa at achi'el ri Zimrí ri xukamisaj ri rajaw, xcha'.

³²Y ri Jehú xtzu'un k'a q'anej pa ventana y xuk'utuj chi wi ek'o ta ri chiri' ri nikajo' yeto'on richin. Y jari' toq xebek'ulun-pe e ka'i-oxi' achi'a' ri yesamajin richin ri Jezabel.

³³K'ari' ri Jehú xubij-q'anej chike: Tik'aqa-pe la ixoq la', xcha'. Y rije' kan xbekinima-pe ri Jezabel ri k'o chiri' pa ventana. Y ri rukik'el xtzopin chirij ri tz'aq y chikij ri kiej. Y ri kiej kan xeq'ax k'a chirij ri ruch'akul ri Jezabel.

³⁴K'ari' ri Jehú xok-apo pa rachoch ri rey, y toq xwa-xuk'ya' yan, xubij chike ri rusamajela': Wakami kixbiyin y tibemuqu' kan ri ruch'akul ri itzel ixoq, roma xa kan rumi'al chuqa' jun rey, xcha'.

³⁵Jak'a toq xebe richin nibekimuqu' kan, xa xbekila' xaxe chik ri rubaqil ri rujolon, ri raqen y ri ruq'a' ri ek'o kan.

³⁶Ri samajela' xetzolin, y xbekibij chire ri Jehú. Y ri Jehú xubij: Jare' xbanatej ri rubin ri Dios, toq xubij chire ri rusamajel Elías aj-Tisbé chi chupan ri ulew wawe' pa Jezreel, xtitij-wi ri ruch'akul ri Jezabel koma ri tz'i', xcha' ri Jehú.

³⁷Y ri ruch'akul ri Jezabel kan xtok achi'el rukis jun chikop pa ruwi' re ruwach'ulew chiri' pa Jezreel, richin chi man jun xtibin: Jare' ri Jezabel.