Read Kaqchikel 1 Crón 10 Bible Online

1 Crón 10 - Kaqchikel bible

1 Crón 10

¹K'o k'a jun q'ij ri aj-Filistea xkichop oyowal kik'in ri israelita ri chiri' pa juyu' rubini'an Guilboa. Jak'a ri israelita xa xe'animej y xeken kan e k'iy chike chiri'.

²Y ri aj-Filistea xekitzeqelibej k'a el ri Saúl y ri e ruk'ajol, y kan xekikamisaj k'a kan ri Jonatán, ri Abinadab y ri Malquisúa.

³Xnimer k'a ri ruk'ayewal ri oyowal chirij ri Saúl chupan ri q'ij ri', y ri ch'abnela' aj-Filistea xkimej rik'in ri kich'ab y nim k'a sokotajik ri xril.

⁴Ri Saúl xubij k'a chire ri ruto'onel: Tawelesaj ri a-espada y kinakamisaj chi'anin. Man xa kepe ri itzel taq winaqi' aj-Filistea richin yinketz'abe'j y k'ari' yinkikamisaj, xcha'. Jak'a ri ruto'onel man xrajo' ta xukamisaj, roma xa xpe xibinri'il rik'in. Kan jari' ri Saúl xuchop ri ru-espada y xuk'eq-ri' chutza'n richin xukamisaj-ri'.

⁵Toq ri ruto'onel xutz'et chi ri Saúl xukamisaj-ri', chuqa' rija' xuk'eq-ri' chutza'n ri ru-espada y xukamisaj-ri' chuqa' rija'.

⁶Keri' k'a xbanatej toq xken ri Saúl y chi e oxi' ruk'ajol. Y keri' xk'is kan ri rijatzul ri Saúl.

⁷Ri aj-labal xa xe'animej toq ri Saúl xken junan kik'in ri e ruk'ajol. Y xkak'axaj k'a ri israelita ri ek'o chiri' chuwa-taq'aj chuxe' ri juyu' Guilboa. Roma ri' rije' xe'animej-el chuqa'. Xekiyala' kan ri kitinamit, y ri aj-Filistea kan xekitz'et k'a chi xe'animej-el. Jari' toq xebek'oje' kan chupan ri kitinamit ri israelita.

⁸Ri ruka'n q'ij xe'apon ri aj-Filistea kik'in ri kaminaqi' richin nikik'uaj-el ronojel ri k'o kejqalen ri k'o kik'in. Y toq xe'apon pa juyu' Guilboa xekitz'et ri kich'akul ri Saúl y ri e ruk'ajol e li'an kan.

⁹Xkik'uaj k'a el ri rutziaq ri Saúl; chuqa' xkelesaj-el ri rujolon y xkik'uaj-el junan rik'in ri rukamisabal. K'ari' xkiteq rutzijol chijun ruwach'ulew Filistea richin chi ri winaqi' y ri e ki-dios tiketamaj.

¹⁰Xkiya' k'a kan ri rukamisabal pa rachoch ri ki-dios, y chuqa' xbekitzeqeba' kan ri rujolon chupan ri rachoch ri Dagón ri jun chik ki-dios.

¹¹Toq xkak'axaj ri aj-Jabés richin ri Galaad, ri xkiben ri aj-Filistea chire ri Saúl,

¹²jari' xeyakatej-el konojel aj-labal, ri man jun xibinri'il chikiwech, xbekik'ama-pe ri ruch'akul ri Saúl y ri kich'akul ri e ruk'ajol, y xebekiya' kan chiri' pa Jabés. Xekimuq k'a kan chuxe' jun paten-che', y kan xemewayin k'a wuqu' q'ij.

¹³Ri Saúl xken roma man xuben ta ri ruk'amon chi nuben chuwech ri Dios. Y man xaxe ta k'ari', xmakun chuqa' roma xa xberuk'ulubej jun ixoq ri nubananej chi retaman ri peteneq chikiwech-apo,

¹⁴y man ja ta ri Jehová ri xuk'ulubej. Y roma ri' ri Jehová xrelesaj-el ri ruk'aslen, y ri ruq'atbal-tzij xuq'axaj pa ruq'a' ri David ruk'ajol ri Isaí.