Read Kaqchikel 1 Crón 11 Bible Online

1 Crón 11 - Kaqchikel bible

1 Crón 11

¹Chijun ri winaqi' richin ri ruwach'ulew Israel xkimol-ki' rik'in ri David pa tinamit Hebrón y xkibij chire: Rat kan at qach'alal-wi.

²Y stape' toq ri Saúl k'a k'es na, kan ja rat ri xatuk'uan qichin roj ri oj aj-labal. Chuqa' ri Jehová ri qa-Dios kan rubin k'a chawe chi ja rat ri xkayuq'un richin ri rutinamit y xkatok rey pa qawi', xecha'.

³Toq konojel k'a ri achi'a' ri k'o kiq'ij richin ri tinamit Israel xebe y xech'on rik'in ri David pan Hebrón, jari' toq rija' kan xuben jun jikibel-tzij kik'in, y kan chuwech ri Dios xuben-wi. K'ari' rije' xkiqasaj aceite pa ruwi' ri David richin xok kan rey pa ruwi' ri Israel, achi'el ri ch'abel ri rubin kan ri Dios chire ri Samuel.

⁴Ri David y konojel ri aj-Israel xebe pa Jerusalem, ri chuqa' nibix Jebús chire roma ri jebuseo k'a ek'o na chiri'.

⁵Y ri achi'a' jebuseo xkibij chire ri David: Wawe' man yatok ta pe rat, xecha'. Jak'a ri David xtikir xuch'ek kan ri tobel rubini'an Sión, ri sutin-rij rik'in tz'aq; y roma ri' k'a re wakami ri tinamit ri' nibix ri Rutinamit ri David chire.

⁶Toq man jani tuch'ek ri tinamit Sión, ri David xubij chike ri e aj-labal israelita: Ri xtich'akon pa nabey chikij ri jebuseo, jari' xtinya' kan aj-raqen pa kiwi' ri ch'aqa' chik aj-labal, xcha'. Y ri nabey ri xch'akon, ja ri Joab ral ri Seruiá. Y ja rija' ri xok kan aj-raqen pa kiwi' ri aj-labal israelita.

⁷Chirij ri', ri David xk'oje' kan chupan ri tobel, y roma ri' xkijel ri rubi', y re wakami nibix ri Rutinamit ri David chire.

⁸Ri David xupaba' chik q'anej ri tobel richin Sión, y chuqa' xutaq'ajuj chik ri ulew ri k'o chunaqaj. Rokik ri David nupaba' chik q'anej ri Sión, ri Joab chuqa' xupaba' chik q'anej ri tinamit.

⁹Keri' k'a toq ri David xnimer ri ruq'atbal-tzij, roma ri Jehová ri k'iytisanel richin ronojel kan k'o-wi rik'in.

¹⁰Ja achi'a' re' ri k'o más kiq'ij, ri ek'o pa kiwi' ri aj-labal ri maneq xibinri'il chikiwech; y rije' xeto'on richin ri David chupan ri ruq'atbal-tzij. Xjunamatej k'a kiwech kik'in ri ch'aqa' chik israelita richin chi ri David xok kan rey, achi'el ri rubin-pe ri Jehová chire ri tinamit Israel.

¹¹Ri nabey chike ri achi'a' ri xk'oje' ruq'ij, ja ri Jasobeam, ruk'ajol ri Hacmoní. Y ri Jasobeam jun chike ri aj-raqen pa kiwi' ri aj-labal. Y k'o k'a jun q'ij chupan jun oyowal, xerukamisaj e 300 achi'a' rik'in ri rukum.

¹²Ri ruka'n chike ri achi'a' ri k'o ruq'ij, ja ri Eleazar, ruk'ajol ri Dodó, jun ahohíta, jun chike ri achi'a' ri maneq xibinri'il chikiwech.

¹³Ri Eleazar k'o k'a rik'in ri David chiri' pa Pas-damim toq ri aj-Filistea xkimol-ki' richin nibekibana' oyowal. Y xkiben k'a ri oyowal chiri' chunaqaj jun ulew ri tikon cebada chuwech, jak'a ri achi'a' israelita xa xe'animej chikiwech ri aj-Filistea.

¹⁴Jak'a ri Eleazar y jun tzobaj achi'a' xkipaba-ki' chikiwech ri aj-Filistea chiri' pa runik'ajal ri ulew ri'. Y kan xekich'ek k'a roma kan ja ri Dios xya'on ri jun nimalej ch'akonik ri' chike ri israelita.

¹⁵K'o k'a jun q'ij toq ri e oxi' aj-raqen, ri k'o más kiq'ij, xebe-qa rik'in ri nimalej abej ri k'o chuxikin ri jul rubini'an Adulam, richin xe'apon rik'in ri David. Y ri aj-Filistea ek'o-pe chikiwech rije' pa taq'aj richin ri Refaim.

¹⁶Ri David k'o pa jun tobel richin nuto-ri'. Y chupan ri q'ij ri' ri aj-labal aj-Filistea ek'o-qa pa tinamit Belén.

¹⁷Y ri David xubij: K'ate' ta k'o-pe juba' nuya' ri elesan-pe chupan ri pozo ri k'o chuchi' ri Belén, xcha'.

¹⁸Toq xkak'axaj re oxi' achi'a' re' ri kan janila kuchuq'a' y man nikixibij ta ki', xeq'ax chikikojol ri aj-Filistea ri ek'o pa taq'aj, richin xbekelesaj juba' ya' chupan ri pozo ri k'o chuchi' ri Belén. Y xkik'uaj k'a el chire ri David. Jak'a ri David xa man xuqum ta. Xa xutix chuwech ri Jehová richin jun sipanik,

¹⁹y xubij: Kan kinato' nu-Dios richin man xtinqum ta re ya' re', roma re' xa kan achi'el xa ta ja ri kikik'el re achi'a' re' ninqum, roma rije' kan xkiya-el ri kik'aslen chuwi-kamik richin xbekik'ama-pe re ya' re', xcha'. Y roma ri' man xuqum ta. Keri' xkiben ri e oxi' achi'a' aj-raqen ri maneq xibinri'il chikiwech.

²⁰Ri Abisai, rach'alal ri Joab, chuqa' jun aj-raqen pa kiwi' ri aj-labal. K'o k'a jun q'ij xeruq'ijuj e 300 achi'a' rik'in ri rukum, y xerukamisaj. Keri' toq xel rutzijol chi kan k'o ruchuq'a' chikiwech ri ch'aqa' achi'a' ri maneq xibinri'il chikiwech.

²¹Y ja rija' ri xya'ox más ruq'ij chikiwech, y xok aj-raqen pa kiwi', jak'a kan man xeruq'i' ta ri ch'aqa' chik ri xenatex yan qa.

²²Chuqa' ri Benaías, ruk'ajol ri Joiadá aj-Cabseel, chuqa' jun achin kan maneq xibinri'il chuwech. Y k'iy k'a nima'q taq banobel ri xeruben. Rija' xkamisan kichin ri e ka'i' achi'a' ri achi'el kewachin koj, achi'a' aj-Moab ri e ruk'ajol ri Ariel. Y chuqa' jun q'ij toq ruchapon ruqajinen tef, rija' xok-qa pa jun jul y chiri' xukamisaj jun koj.

²³Y chuqa' xukamisaj jun achin aj-Egipto ri k'o jun jaj rik'in wo'o' q'a'aj ri rupalen, ri nuk'uaj jun rukum ri janila nim rupan. Ri Benaías xuk'uaj jun ch'ich' pa ruq'a' y rik'in ri' xtikir xumej ri kum pa ruq'a' ri aj-Egipto, y rik'in ri' xukamisaj-wi.

²⁴Ri xuben ri Benaías, ruk'ajol ri Joiadá xel rutzijol y xetamex chi kan k'o-wi ruchuq'a' chikiwech ri e juwineq lajuj achi'a' ri maneq xibinri'il chikiwech;

²⁵y kan xnimirisex k'a ruq'ij chikiwech ri e juwineq lajuj achi'a', jak'a man xeruq'i' ta ri e oxi' nabey, y xok chajiy richin ri David.

²⁶Ja aj-labal re' ri janila kuchuq'a' y man jun xibinri'il chikiwech: Ri Azael, rach'alal ri Joab; ri Elhanán, ruk'ajol ri Dodó, aj-Belén;

²⁷ri Samot, aj-Harod;

²⁸ri Irá, ruk'ajol ri Iqués, aj-Tecoa; ri Abiézer, aj-Anatot,

²⁹ri Sibecai, aj-Husá; ri Ilai, ri ahohíta;

³⁰ri Maharai, aj-Netofá; ri Héled, ruk'ajol ri Baaná, chuqa' aj-Netofá;

³¹ri Itai, ruk'ajol ri Ribai, aj-Guibeá, ri k'o pa ruwach'ulew ri Benjamín; ri Benaías, aj-Piratón;

³²ri Hidai, ri xk'oje' chunaqaj ri ti raqen-ya' richin Gaas; ri Abiel, arbatita;

³³ri Azmávet aj-Bahurim; ri Eliahbá aj-Saalbim;

³⁴ri e ralk'ual ri Jasén aj-Guinzo; ri Jonatán, ruk'ajol ri Sagué aj-Harar;

³⁵ri Ahiam, ruk'ajol ri Sacar chuqa' aj-Harar; ri Elifal, ruk'ajol ri Ur;

³⁶ri Héfer aj-Mequerá; ri Ahías aj-Pelón;

³⁷ri Hesrai aj-Carmel; ri Naarai, ruk'ajol ri Esbai;

³⁸ri Joel, rach'alal ri Natán; ri Mibhar, ruk'ajol ri Hagrai;

³⁹ri Sélec amonita; ri Naharai aj-Berot, y chuqa' to'onel richin ri Joab, ral ri Seruiá;

⁴⁰ri Irá aj-Jatir; ri Gareb chuqa' aj-Jatir;

⁴¹ri Urías, ri hitita; ri Zabad, ruk'ajol ri Ahlai;

⁴²ri Adiná, ruk'ajol ri Sizá, rubenita, y chuqa' aj-raqen kichin rije' y e rachibilan e juwineq lajuj achi'a';

⁴³ri Hanán, ruk'ajol ri Maacá; ri Josafat ri mitnita;

⁴⁴ri Ozías aj-Astarot; ri Samá ruk'ajol ri Hotam; ri Jehiel, ruk'ajol chuqa' ri Hotam aj-Aroer;

⁴⁵ri Jediael, ruk'ajol ri Simrí; y ri rach'alal rubini'an Johá aj-Tizá;

⁴⁶ri Eliel aj-Mahanaim; ri Jerebai, ruk'ajol ri Elnáam; ri Josavía, ruk'ajol chuqa' ri Elnáam; ri Itmá aj-Moab;

⁴⁷ri jun chik Eliel; ri Obed; y ri Jaasiel aj-Sobá.