Read Kaqchikel 1 Crón 13 Bible Online

1 Crón 13 - Kaqchikel bible

1 Crón 13

¹Ri David xeruk'ulubej konojel ri achi'a' ri e aj-raqen richin jun tzobaj kichin 1,000 y wok'al aj-labal.

²Chirij ri', xubij chike konojel ri achi'a' ri k'o kiq'ij: Wi rix niqa' chiwech y wi ri Jehová ri qa-Dios nuya' q'ij chiqe, xtiqaya' k'a rutzijol chike konojel ri qawinaq ri k'a ek'o na kan pa taq tinamit richin Israel, y chuqa' ri e sacerdote y ri e levita ri ek'o pa taq kitinamit rik'in kisoq'olbal. Y ri rutzijol ri' richin tijunamatej-qawech kik'in.

³Richin keri' niqak'en-pe ri rukáxa ri qa-Dios, roma kan pa ruq'ijul kan ri Saúl, jari' toq qamalin kan, xcha' ri David.

⁴Konojel k'a ri winaqi' utz xkak'axaj ri xbix chike, y konojel xkibij chi keri' tibanatej.

⁵Jari' toq ri David xuteq koyoxik konojel ri winaqi' richin chijun Israel, xtiker-el pa tinamit Sihor ri k'o chunaqaj ri Egipto, y xapon k'a pa xaman chuchi' ri Hamat, richin xbekik'ama' ri káxa richin ri rujikibel-tzij ri Dios ri k'o pa tinamit Quiriat-jearim.

⁶Xbe k'a ri David junan kik'in ri winaqi' israelita pa Quiriat-jearim, ri chuqa' nibix Baalá richin Judá chire, richin nikiq'axaj ri káxa ri akuchi ninatex-wi ri rubi' ri Jehová Dios, ri niq'aton-tzij pa kiwi' ri querubín.

⁷Xbekik'ama' k'a pe ri káxa ri' pa rachoch ri Abinadab, y xkiya-el chupan jun k'ak'a' carreta. Ri Uzá y ri Ahió, jari' ri e uk'uayon ri rubey ri carreta.

⁸Rokik ri' ri David y konojel ri israelita kan janila k'a xekikot, y e beneq chuwech ri Dios. Y kan rik'in k'a ronojel kuchuq'a' yebixan y yeropiyaj, y nikiq'ojomaj k'a jalajoj ruwech q'ojom achi'el ri arpa, ri salterio, ri tamboril, ri platillo y ri trompeta.

⁹Y toq xe'apon akuchi nuch'ey-wi ri ru-trigo ri Quidón, jari' toq ri bóyix jubama xetzaq; roma ri' ri Uzá xurik'-apo ri ruq'a' richin xutemej ri káxa.

¹⁰Jak'a ri Jehová kan xpe janila royowal chirij ri Uzá roma xuchop ri káxa, y chiri' k'a xukamisaj-wi kan.

¹¹Ri David xyakatej royowal roma ri Jehová xrelesaj ri ruk'aslen ri Uzá, y roma ri' ri akuchi xken-wi, xubini'aj Peres-uzá*f6* k'a re q'ij re'.

¹²Jak'a ri David janila k'a xuxibij-ri' chuwech ri Dios ri q'ij ri', y xubij-qa: ¡Yitikir kami nink'uaj ri rukáxa ri Dios pa wachoch!, xcha-qa ri David.

¹³Y man xuk'uaj ta k'a el ri káxa pa rachoch; xa xuya' kan pa rachoch ri jun achin rubini'an Obed-edom aj-Gat.

¹⁴Y ri káxa richin ri Dios xk'oje' k'a kan oxi' ik' pa rachoch ri Obed-edom; y ri Jehová kan xuya' urtisanik pa kiwi' konojel ri aj pa rachoch y konojel ri ek'o rik'in.