Read Kaqchikel 1 Crón 15 Bible Online

1 Crón 15 - Kaqchikel bible

1 Crón 15

¹Ri David xuteq k'a rubanik k'iy rachoch pa tinamit ri nibix Ri Rutinamit ri David chire. Y chuqa' xuchojmirisaj k'a jun ulew ri akuchi nik'oje-wi ri káxa richin ri rujikibel-tzij ri Dios, y chuqa' xuben jun jay ri banon rik'in tzieq richin chiri' nik'oje-wi ri káxa.

²K'ari' xubij: Wakami xa kan xaxe k'a ri e levita ri ye'uk'uan ri káxa richin ri rujikibel-tzij ri Dios, y man jun achike ta chik, roma ri Jehová kan e rucha'on rije' richin jantape' nikik'uaj ri káxa y nikisamajij, xcha'.

³Xeri' xerumol chik k'a konojel ri aj-Israel pa Jerusalem richin nikiq'axaj ri káxa chupan ri jay ri xuben.

⁴Y chuqa' xeroyoj jujun chike ri e rijatzul kan ri Aarón y ri ch'aqa' chik levita.

⁵Chike ri e rijatzul kan ri Quehat xe'apon e 120; y ri aj-raqen pa kiwi' ja ri Uriel.

⁶Chike ri e rijatzul kan ri Merarí xe'apon e 220; y ri aj-raqen pa kiwi' ja ri Asaías.

⁷Chike ri e rijatzul kan ri Guersón xe'apon e 130; y ri aj-raqen pa kiwi' ja ri Joel.

⁸Chike ri e rijatzul kan ri Elizafán xe'apon e 200; y ri aj-raqen pa kiwi' ja ri Semaías.

⁹Chike ri e rijatzul kan ri Hebrón xe'apon e jumuch'; y ri aj-raqen pa kiwi' ja ri Eliel.

¹⁰Chike ri e rijatzul kan ri Uziel xe'apon e 112; y ri aj-raqen pa kiwi' ja ri Aminadab.

¹¹K'ari' ri David xuteq koyoxik ri e ka'i' sacerdote; ri Sadoc y ri Abiatar. Y chuqa' xuteq koyoxik ri e waqi' levita; ri Uriel, ri Asaías, ri Joel, ri Semaías, ri Eliel y ri Aminadab,

¹²y xubij chike: Rix ri aj-raqen pa kiwi' ri e aj pa kachoch ri e levita; tich'ajch'ojirisaj-iwi', y keri' chuqa' ri iwach'alal, richin niq'axaj ri káxa chupan ri rachoch ri xinben.

¹³Ri pa nabey man xqak'ulubej ta ri Jehová pa ruwi' ri k'atzinel richin ta xqaben, y roma rix man xixk'oje' ta apo ri chiri', roma ri' ri Jehová xrelesaj-el ruk'aslen jun chiqakojol roj, xcha' ri David.

¹⁴Y ja ri e sacerdote y ri e levita xkich'ajch'ojirisaj-ki' richin nikiq'axaj ri káxa richin ri rujikibel-tzij ri Jehová Dios richin Israel.

¹⁵Ri e levita xbekelesaj-pe ri káxa ri', y xkiju-pe ka'i' che' pa taq ruxikin richin xkiya-pe chuwi-kitele'n, achi'el rubin kan ri Jehová chire ri Moisés.

¹⁶Y ri David xubij k'a chuqa' chike ri aj-raqen pa kiwi' ri e levita chi kecha'ox ri bixanela' y nikibixaj bix richin kikoten, chuqa' kecha'ox ri q'ojomanela' rik'in jalajoj ruwech q'ojom achi'el ri salterio, ri arpa y ri platillo.

¹⁷Ri xecha'ox richin nikiq'ojomaj ri platillo jari' ri Hemán ruk'ajol ri Joel, ri kach'alal rubini'an Asaf ruk'ajol ri Berequías y ri Etán Cusaías, y rije' e rijatzul kan ri Merarí. Y ri xeto'on kichin ja ri Zacarías, ri Jaaziel, ri Semiramot, ri Jehiel, ri Uní, ri Eliab, y ri Benaías. Konojel k'a rije' nikiq'ojomaj ri ki-salterio achi'el nikiben ri elamita. Chuqa' ri Maaseías, ri Matatías, ri Elifelehu, ri Mecneías, ri Azazías y ri ka'i' chajinela' ri kibini'an Obed-edom y ri Jeiel, rije' chuqa' xeto'on. Y xkiq'ojomaj ri arpa achi'el nikiben ri siminita.

²²Ri Quenanías aj-raqen pa kiwi' ri e levita ri xebixan.

²³Ri yechajin richin ri káxa ja ri Berequías y ri Elcaná.

²⁴Y ri yexupun ri trompeta chuwech ri káxa ja ri sacerdote Sebanías, ri Josafat, ri Natanael, ri Amasai, ri Zacarías, ri Benaías y ri Eliézer. Ri Obed-edom y ri Jehías chuqa' nikichajij ri káxa.

²⁵K'ari' ri David y ri achi'a' ri k'o kiq'ij richin ri Israel y ri aj-raqen kichin ri aj-labal, rik'in k'a kikoten xbekik'ama-pe ri káxa richin ri rujikibel-tzij ri Dios pa rachoch ri Obed-edom.

²⁶Y ri Dios kan man jun k'a tijoj-poqonal xuya' pa kiwi' ri e levita ri e uk'uayon ri káxa richin ri rujikibel-tzij; y roma ri' ri winaqi' xkisuj k'a chuwech ri Jehová, e wuqu' achija' taq wákix y wuqu' achija' taq karne'l.

²⁷Ri David rukusan jun rutziaq ri janila jebel ok ri banon rik'in lino; keri' chuqa' kitziaq kikusan ri levita ri e uk'uayon ri káxa, ri bixanela' y ri Quenanías ri nitijon kichin. Y ri David rukusan chuqa' jun tzieq ri nibix efod chire, ri chuqa' banon rik'in lino.

²⁸Keri' k'a konojel ri aj-Israel yekikot kik'uan ri káxa richin ri rujikibel-tzij ri Jehová; y nikireq k'a kichi' roma kikoten. Chuqa' nikixupuj ri trompeta y ri uk'a'; y nikiq'ojomaj ri platillo, ri salterio, y ri arpa.

²⁹Y toq ri káxa richin ri rujikibel-tzij ri Dios xapon pa rutinamit ri David, ri rumi'al kan ri Saúl rubini'an Mical ri rixjayil ri David, xtzu'un-pe pa ventana y xutz'et-pe ri rey David nitzopiyaj roma kikoten; y ri ixoq ri' kan xrixowaj ri David ri rachijil.