Read Kaqchikel 1 Crón 19 Bible Online

1 Crón 19 - Kaqchikel bible

1 Crón 19

¹Toq q'axineq chik k'a q'ij, xken k'a ri Nahas rey kichin ri amonita; y ja ri ruk'ajol rubini'an Hanún ri xk'oje' kan pa ruk'exel.

²K'ari' ri David xubij chi k'o chi nijoyowex ruwech ri Hanún ruk'ajol kan ri Nahas, roma ri rutata' kan utz ri xuben rik'in ri David. Y xeruteq k'a el e banoy taqo'n rik'in ri Hanún richin nibekiq'ejela' kan. Jak'a toq xe'apon ri e taqon-el pa kiruwach'ulew ri amonita,

³jari' toq ri e aj-raqen kichin rije' xkibij chire ri Hanún: ¿Nanimaj rat chi ri David e rutaqon-pe rusamajela' richin yatokiq'ejela' kan, roma ri rukamik ri atata'? ¡Re' e peteneq richin nokinachaj y noketamaj kan jebel re qaruwach'ulew!, xecha'.

⁴K'ari' ri Hanún xuteq kichapik ri e taqon-el, y k'ari' xkisokaj-el ri rusumal-kichi', y xuqupij ri kitziaq chikij xapon k'a chutza'n kacheq, y k'ari' xeruteq-el pa kiruwach'ulew.

⁵Toq xbeya'ox rutzijol chire ri rey David ri achike xkik'uluwachij ri e rutaqon-el, k'ari' rija' xeruteq ch'aqa' chik richin yebek'ul, roma kan janila e k'ixbitajineq. Y chuqa' xubij chi kek'oje' kan pa tinamit Jericó k'a xtik'iy na pe ri rusumal-kichi', y k'ari' ketzolin-pe.

⁶Xq'ax k'a chikiwech ri amonita chi ye'ixowex roma man utz ta ri xkiben chuwech ri David. Roma ri' xkik'uaj-el 660 quintal saqipueq richin xekitoj aj-labal ri ye'uk'uan carruaje y chuqa' achi'a' ri yech'oke' chirij taq kiej richin ri aj-Mesopotamia, ri aj-Siria, ri aj-Maacá y ri aj-Sobá richin nibekibana' oyowal rik'in ri David.

⁷Xkitoj k'a ri rey richin Maacá, ri aj-labal, y ri aj-labal ri ye'uk'uan 32,000 carruaje. Y xebek'oje-qa chuwech ri tinamit Medebá. Chuqa' ri achi'a' amonita xe'el-pe pa taq kitinamit, y xkimol-ki' richin xepe pa labal.

⁸Jak'a ri David kan chi'anin xunabej, xeruteq-el ri Joab y konojel ri aj-labal, y rije' man jun xibinri'il chikiwech.

⁹Ri achi'a' amonita xkichojmirisaj k'a ki' richin nikichop oyowal, y xbekicholajij-ki' chuchi' ri tinamit ri akuchi ek'o-wi, jak'a ri rey ri e kachibilan-pe xkewaj kan ki' pa juyu'.

¹⁰Toq ri Joab xutz'et chi k'o yebek'aqon-pe chikiwech y chikij, jari' toq xerucha' k'a ri achi'a' israelita ri janila kuchuq'a' y maneq xibinri'il chikiwech, y xeruteq richin nikichop oyowal kik'in ri aj-Siria.

¹¹Jak'a ri Joab xeruya' kan ri ch'aqa' chik aj-labal pa ruq'a' ri runimal rubini'an Abisai, richin nibekibana' oyowal kik'in ri amonita ri ek'o-apo juk'an.

¹²Y ri Joab xubij chire ri Abisai: Wi ri aj-Siria yetikir más chinuwech yin, rat xkinato', y wi ri amonita yetikir más chawech rat, yin xkatinbento'.

¹³Kan kof k'a qojk'oje', y tiqabana' oyowal richin niqakol ri qaruwach'ulew y ri nima'q taq tinamit richin ri qa-Dios, y ri Jehová xtuben ri achike niqa' chuwech rija', xcha'.

¹⁴Ja ri Joab y ri achi'a' ri ek'o rik'in xejel-apo richin nibekibana' oyowal kik'in ri aj-Siria, jak'a rije' xa xe'animej-el chikiwech ri Joab y ri e rachibil.

¹⁵Y toq ri amonita xkitz'et chi ri aj-Siria xe'animej-el, chuqa' rije' xe'animej-el chuwech ri Abisai, y xe'ok pa kitinamit. K'ari' ri israelita xetzolin pa Jerusalem.

¹⁶Toq ri aj-Siria xkinabej chi xech'akatej koma ri aj-Israel, xkiteq rutzijol kik'in ch'aqa' chik aj-labal aj-Siria ri ek'o juk'an chire ri raqen-ya' Éufrates. Ri aj-raqen pa kiwi' rije' ja ri Sofac, ri aj-raqen chuqa' kichin ri aj-labal ri e richin ri Hadad-ézer.

¹⁷K'ari' xtzijox chire ri David, y rija' kan xerumol k'a konojel achi'a' pan Israel. Y xeq'ax juk'an chik chire ri raqen-ya' Jordán, y xe'apon chikinaqaj ri akuchi ek'o-wi ri aj-Siria. K'ari' xkichop oyowal kik'in rije'.

¹⁸Jak'a ri achi'a' aj-Siria xa xe'animej chikiwech ri David y ri israelita. Y rije' xekikamisaj e 40,000 achi'a' ri e beneq chikaqen y 7,000 ri ek'o pa carruaje richin oyowal. Y chuqa' xkamisex ri Sofac aj-raqen kichin ri aj-labal aj-Siria.

¹⁹Toq ri achi'a' aj-Siria ri junan kiwech rik'in ri Hadad-ézer xech'akatej koma ri aj-Israel, xkiben chi tik'oje' uxlanibel-k'u'x kik'in ri David, y xeyuqe' kan pa samaj rik'in. Kan ja q'ij ri' ri winaqi' richin Siria man xkajo' ta chik richin xekito' ri amonita.