Read Kaqchikel 1 Crón 23 Bible Online

1 Crón 23 - Kaqchikel bible

1 Crón 23

¹Toq ri David janila chik ri'j, xuq'alajirisaj k'a chikiwech ri winaqi' chi ja ri Salomón ri ruk'ajol xtik'oje' kan pa ruk'exel.

²Y xerumol k'a konojel ri aj-raqen richin ri tinamit, y ri e sacerdote y ri e levita.

³Xe'ajlex k'a ri e levita ri k'o juwineq lajuj kijuna' pa jotol. Xk'achoj ri kajlaxik, y ek'o k'a 38,000 achi'a'.

⁴Chike konojel re' e 24,000 richin yepa'e' pa ruwi' ri samaj chupan ri rachoch ri Dios, e 6,000 richin ye'ok aj-raqen y to'onela' pa ruwi' ri ruwach'ulew,

⁵e 4,000 chajinela' richin nikichajij ri ruchi' ri rachoch ri Dios, y e 4,000 chik ri yeya'on ruq'ij ri Dios rik'in jalajoj ruwech q'ojom, ri xuteq kibanik ri David.

⁶Y ri David xeruch'er k'a ri levita ri' pa taq tzobaj achi'el ri kajlabal ri e ruk'ajol kan ri Leví. Y rije' ja ri Guersón, ri Quehat, y ri Merarí.

⁷Ri e ruk'ajol kan ri Guersón ja ri Ladán y ri Simí.

⁸Ja kibi' re' ri e oxi' ruk'ajol ri Ladán: Ri Jehiel jari' ri nimalaxel; ri Zetam y ri Joel.

⁹Ri e ruk'ajol ri Simí chuqa' e oxi': Ri Selomit, ri Haziel y ri Harán. Konojel re' kan e aj-raqen kichin ri e aj pa rachoch kan ri Ladán.

¹⁰Chuqa' k'o jun chik achin rubini'an Simí, y xek'oje' kaji' ruk'ajol: Ri Jáhat, ri Ziza, ri Jeús, y ri Beriá.

¹¹Ri Jahat ja rija' ri nimalaxel; ri ruka'n ja ri Ziza. Ri Jeús y ri Beriá man xk'oje' ta k'iy kalk'ual, y roma ri' xa jun jay winaqi' xban chike richin yesamej.

¹²Ri e kaji' ruk'ajol ri Quehat, ja ri Amram, ri Ishar, ri Hebrón y ri Uziel.

¹³Ri e ka'i' ruk'ajol ri Amram ja ri Aarón y ri Moisés. Ri Aarón xcha'ox richin nusuj ri sipanik ri yejach chire ri Dios, y richin nuporoj pom chuwech ri Jehová. Kan nusamajij, y kan pa rubi' ri Dios nuya' urtisanik. Ronojel re' ja re' ri samaj ri k'o chi nikiben ri Aarón y ri e rijatzul richin q'asen.

¹⁴Jak'a ri Moisés, ri rusamajel ri Dios, y ri e rijatzul xa jun xkiben rik'in ri tzobaj richin ri Leví.

¹⁵Ri e ka'i' ruk'ajol ri Moisés ja ri Guersón y ri Eliézer.

¹⁶Ri nabey ruk'ajol ri Guersón ja ri Sebuel.

¹⁷Ri juney ruk'ajol ri Eliézer ja ri Rehabías ri aj-raqen. Jak'a ri Rehabías xek'oje' janila ralk'ual.

¹⁸Ri nabey ruk'ajol ri Ishar ja ri Selomit.

¹⁹Ri Hebrón xek'oje' e kaji' ruk'ajol. Ri nabey ja ri Jeraías, ri ruka'n ja ri Amarías, ri rox ja ri Jahaziel; y ri rukaj ja ri Jecamán.

²⁰Ri Uziel xek'oje' e ka'i' ruk'ajol. Ri nabey ja ri Micaías y ri ruka'n ja ri Isías.

²¹Ri e ka'i' ruk'ajol ri Merarí ja ri Mahli y ri Musí. Ri e ka'i' ruk'ajol ri Mahli ja ri Eleazar y ri Cis.

²²Ri Eleazar xken y man jun ruk'ajol xk'oje'. Xaxe xek'oje' rumi'al, y xek'ule' kik'in ri kach'alal, ri e ruk'ajol ri kich'utitata' rubini'an Cis.

²³Ri Musí xek'oje' e oxi' ruk'ajol: ri Mahli, ri Éder y ri Jeremot.

²⁴Jare' ri e rijatzul kan ri Leví ri e aj-raqen pa kiwi' ri e aj pa kachoch y ri tz'ibatel kan ri kibi' toq xe'ajlex. Konojel re achi'a' re' k'o juwineq kijuna' pa jotol y yesamej pa rachoch ri Dios.

²⁵Ri David rubin k'a: Ri Jehová ri qa-Dios roj ri oj aj-Israel xuya' yan uxlanibel-k'u'x chiqe, y rija' kan xtik'oje' chiri' pa Jerusalem richin q'asen.

²⁶Y xa roma ri' ri e levita man chaq xtikik'uaj ta kela' ri rachoch ri Dios ri banon rik'in tzieq, y ni ta ri samajibel ri yekusex toq niya'ox ruq'ij Rija'.

²⁷Keri' k'a ri runojibal ri David chi xtz'ibex ri kibi' y ri kajlabal chikikojol ri e rijatzul kan ri Leví ri k'o juwineq kijuna' pa jotol.

²⁸Xek'oje' k'a kan ri e rijatzul ri Aarón chuxe' kitzij ri e sacerdote, richin yesamej pa rachoch ri Dios. Ja rije' ri yejosq'in ri ruwa-jay y ri pa jay, y nikich'ajch'ojirisaj ri samajibel ri yekusex toq niya'ox ruq'ij ri Dios, y keri' chuqa' ri ch'aqa' chik samaj ri niban chiri'.

²⁹Y chuqa' ja rije' ri yechojmirisan ri kaxlan-wey chuwech ri mesa. Keri' chuqa' ri ye'etan ri k'ej chayun richin ri sipanik, y richin ri kaxlan-wey ri maneq ch'amilej-q'or rik'in. Chuqa' rije' xeya'ox richin xkichaq'arisaj ri kaxlan-wey pa sartén, y chuqa' nikiwotz'otz'ij.

³⁰Y ek'o levita ri ye'ok chupan ri rachoch ri Dios ronojel q'ij ri nimaq'a' yan y ri tiqaq'ij richin nikimatioxij chire ri Jehová y nikiya' ruq'ij,

³¹y chuqa' toq niporox ri chikop chuwech ri Dios chupan ri q'ij richin uxlanenri'il, richin ri nimaq'ij toq nalex ri k'ak'a' ik' y ri ch'aqa' chik nimaq'ij. Ri e levita kan k'o chi nikisamajij ri Dios rik'in ch'ajch'ojil achi'el ri bin chike.

³²Y keri' ri e levita kan xkiben k'a ri xbix chike richin ri rachoch ri Dios richin molojri'il y chuqa' richin ri jay ri akuchi k'o-wi ri Dios. Re levita re' xek'oje' chuxe' kitzij ri e rijatzul kan ri Aarón.