Read Kaqchikel 1 Crón 5 Bible Online

1 Crón 5 - Kaqchikel bible

1 Crón 5

¹Ri Rubén, ri nabey ruk'ajol ri Israel kan ja wi rija' ri k'o más ruq'ij, jak'a roma xmakun, roma ri' xelesex chire chi ja rija' ri k'o más ruq'ij, roma xk'oje-qa rik'in ri rixjayil ri rutata'. Y ri k'o ruq'a' rija' chire, xya'ox chike ri e ruk'ajol ri José, ri jun chik ruk'ajol ri Israel; ri Rubén man xya'ox ta chik rejqalen.

²Ri tzobaj richin ri Judá ja rije' ri xk'oje' más kuchuq'a', y chiri' xel-wi-pe jun tata'al pa kiwi' ri rach'alal. Jak'a ri k'atzinel chi niya'ox ta kan chire ri nimalaxel, xa xya'ox chire ri José.

³Ja kibi' re' ri e ruk'ajol ri Rubén, ri nabey ruk'ajol ri Israel: Ri Hanoc, ri Falú, ri Hesrón y ri Carmí.

⁴Ri e ruk'ajol kan ri Joel ja ri Semaías, ri Gog, ri Simí,

⁵ri Micaías, ri Reaías, ri Baal,

⁶y ri Beerá. Re Beerá re' ja rija' ri k'o más ruq'ij chikikojol ri rubenita; y xuk'uex-el roma ri Tiglat-Piléser, rey richin ri Asiria.

⁷Ri e rach'alal ri Beerá xtz'ibatej kan kibi' achi'el ri kajlabal ri e aj pa kachoch: Ri e kitata'al ja ri Jeiel y ri Zacarías,

⁸y ri Bela, ri ruk'ajol ri Azaz, ruk'ajol ri Sema, ruk'ajol ri Joel. Ri Bela xk'oje' pa tinamit Aroer, y ri ruk'ulba't ri ruruwach'ulew nibe pa xaman chire ri juyu' Nebo, y ri tinamit Baal-meón.

⁹Ri ruk'ulba't napon pa relebel-q'ij y k'a pa tz'iran ruwach'ulew ri k'o-pe chuwech ri raqen-ya' Éufrates, roma xk'iyer k'a ri kawej chiri' pa ruwach'ulew Galaad.

¹⁰Toq pa ruq'ijul kan ri rey Saúl, ri e rijatzul kan ri Rubén xkiben jun labal kik'in ri winaqi' agareno, y kan xech'akatej pa kiq'a' ri rubenita, y xek'oje' kan chupan ri kulew ri k'o pa relebel-q'ij chire ri ruwach'ulew Galaad.

¹¹Ri e rijatzul kan ri Gad xek'oje' pa xaman chike ri e rijatzul kan ri Rubén k'a pa ruwach'ulew Basán y k'a pa tinamit Salcá.

¹²Ja ri Joel ja rija' ri k'o más ruq'ij, y chirij-qa rija' ja ri Safán, k'ari' k'o-qa ri Jaanai y pa ruk'isibel ja ri Safat.

¹³Ja ruchojmilal re' ri kibi' ri e wuqu' kach'alal: Ri Micael, ri Mesulam, ri Sebá, ri Jorai, ri Jacán, ri Zía y ri Éber.

¹⁴Jare' ri e ruk'ajol kan ri Abihail, ri ruk'ajol ri Hurí, re' ruk'ajol ri Jaróah, re Jaróah re' ruk'ajol ri Galaad, re Galaad re' ruk'ajol ri Micael, re Micael re' ruk'ajol ri Jesisai, re Jesisai re' ruk'ajol ri Jahdó, y re Jahdó re' ruk'ajol ri Buz.

¹⁵Ri Ahí, ruk'ajol ri Abdiel, y rumam ri Guní. Y ri Ahí xk'oje' más ruq'ij chikiwech ri ek'o pa rachoch ri rute-rutata'.

¹⁶Konojel k'a rije' xek'oje' pa ruwach'ulew Galaad, pa Basán, y pa taq kokoj kitinamit y pa taq soq'olbel richin ri Sarón.

¹⁷Y chi wiq k'a xtz'ibatej kan ri kibi' toq niq'aton-tzij ri Jotam, rey richin Judá, y pa ruq'ijul ri Jeroboam, rey richin Israel.

¹⁸Ri e rijatzul kan ri Rubén y ri Gad, y ri nik'aj tzobaj richin ri Manasés; rije' kan e achi'a' ri maneq xibinri'il chikiwech. Rije' kan jebel e tijon richin nikiben labal, y e kik'amon k'a pe ri kitobal, ri ki-espada y ri rute-kich'ab. Ek'o k'a 44,760 aj-labal.

¹⁹Y xkibanala' k'a oyowal kik'in ri oxi' tzobaj winaqi' agareno: Ri Jetur, ri Nafís y ri Nodab.

²⁰Y ri Dios kan xeruto' k'a chupan ri oyowal toq xkik'utuj to'onik chire, y rije' kan xkikuquba' kik'u'x rik'in. Y roma ri' kan xetzaq k'a ri e etzelanel kichin, y chuqa' ri e junamatajineq-kiwech kik'in.

²¹Xekik'uala' k'a el ri kawej ri e etzelanel kichin: E 50,000 camello, e 250,000 karne'l y e 2,000 bur. Y chuqa' xekik'uaj k'a el e 100,000 winaqi'.

²²Kan janila k'a k'iy xeken chupan ri labal ri', roma kan ja ri Dios xya'on q'ij chike ri israelita. Xek'oje' k'a kan pa taq kitinamit ri winaqi' agareno, k'a toq xe'uk'uex-el pan Asiria.

²³Ri nik'aj chire ri tzobaj richin ri Manasés ri ek'o pa relebel-q'ij chire ri raqen-ya' Jordán kan janila k'a xewinaqir; xkiq'atapuj k'a ri ruwach'ulew, nitiker-el rik'in Basán y napon k'a pa Baal-hermón, ri nibix chuqa' Senir y juyu' Hermón chire.

²⁴Y jare' ri kibi' ri e aj-raqen ri ek'o pa rachoch ri kitata': Ri Éfer, ri Isí, ri Eliel, ri Azriel, ri Jeremías, ri Hodavías, y ri Jahdiel: Rije' e achi'a' ri janila kuchuq'a' y maneq xibinri'il chikiwech.

²⁵Jak'a rije' man xkikuquba' ta kik'u'x rik'in ri Jehová ri ki-Dios y ri ki-Dios ri kite-kitata'. Roma xa xekitzeqelibej ri ki-dios ri winaqi' aj chiri', ri xa xe'elesex yan el roma ri Jehová toq ye'ok yan apo chupan ri ruwach'ulew.

²⁶Y roma ri' ri Dios richin ri Israel xuben chire ri Pul rey richin Asiria richin xeyakatej chikij. Ri Pul xeruk'uaj-el pa ximonri'il ri winaqi' rubenita, gadita y ri nik'aj tzobaj richin ri Manasés ri k'o pa relebel-q'ij chire ri raqen-ya' Jordán. Y xeruk'uaj-el chupan ri tinamit Halah, Habor, Hará y chunaqaj ri raqen-ya' Gozán, ri akuchi ek'o-wi k'a re wakami. Ri Pul chuqa' nibix Tiglat-piléser chire.