Read Kaqchikel 2 Crón 10 Bible Online

2 Crón 10 - Kaqchikel bible

2 Crón 10

¹Chirij ri rukamik ri Salomón, ri Roboam xbe k'a pa tinamit Siquem roma konojel winaqi' richin Israel xebe chiri' richin nikiben ki-rey chire rija'.

²Y ri Jeroboam ruk'ajol ri Nabat k'a k'o na pan Egipto, roma animajineq-el chuwech ri rey Salomón. Y toq xrak'axaj chi xken yan, xtzolin pa ruwach'ulew Israel.

³Y ri Jeroboam xtaq k'a ruk'amik chiri' pa Siquem, y toq rija' xapon chiri', rija' y konojel k'a ri winaqi' richin Israel xech'on rik'in ri Roboam, y xkibij chire:

⁴Ri atata' k'iy k'a ri ruq'aton kan pa qawi', jak'a wi rat naqasaj ruwi' ri ilinri'il ri ruq'aton kan pa qawi' richin utz ta juba' yojk'ase', roj kan xqojk'oje' k'a awik'in, xecha' chire.

⁵Y ri Roboam xubij chike chi kebe chi taq kachoch y ketzolej chik pe rik'in pa rox q'ij. Y ri winaqi' kan keri' k'a xkiben.

⁶K'ari' ri rey xeruk'ulubej k'a ri achi'a' ri k'o kina'oj ri xek'oje' rik'in ri rutata' toq rija' k'a k'es na, y xuk'utuj chike chi achike ta jun na'oj nikiya' chire pa ruwi' ri k'utunik ri xkiben ri winaqi' chire.

⁷Ri achi'a' ri' xkibij chire: Wi rat nawajo' ye'ato' ri wineq, y naben ri nikajo' y utzilej taq ch'abel xtabij chike, rije' kan xkatkisamajij chijun ak'aslen, xecha'.

⁸Jak'a ri Roboam man xuya' ta ruxikin chire ri xkibij ri achi'a' ri', y xa xuk'utuj chik runa'oj kik'in ri alaboni' ri junan e k'iyineq rik'in, ri e rusamajela' chuqa'.

⁹Y xuk'utuj chike: ¿Achike ta na'oj niya' chuwe, richin ta ninbij-el chike ri winaqi' ri xkik'utuj utzil chuwe chi tinqasaj juba' ruwi' ri samaj ri xuya' kan pa kiwi' ri nata'?, xcha'.

¹⁰Y ri alaboni' ri junan xek'iy rik'in xkibij chire: Kere' tabij-el chike ri winaqi' ri xech'on awik'in: Rix k'ayew xina' roma ri xuben ri nata' iwik'in y re' xa man jun ok. Tiwoyobej juba' y xtiwetamaj ri in achike yin.

¹¹Ri nata' xuya' al ejqa'n chiwij, jak'a yin kan xtinben chi janila ralal ri ejqa'n ri'. Rija' xixruch'ey rik'in tz'um, jak'a yin xkixinch'ey rik'in tz'um ri k'o k'ix ch'ich' chutza'n, keri' tabij-el chike, xecha' chire.

¹²Toq xapon k'a ri rox q'ij, ri Jeroboam y konojel ri winaqi' xe'apon k'a rik'in ri rey Roboam kan achi'el ri rubin-el chike chi ke'apon pa rox q'ij.

¹³Ri rey Roboam kan kow k'a xch'on chike ri winaqi', y xa man xuya' ta ruxikin chire ri xkibij ri achi'a' ri k'o kina'oj.

¹⁴Rija' xa ja ri xkibij ri alaboni' chire, xa jari' xutzeqelibej y xubij chike ri winaqi': Ri nata' xuya' al ejqa'n chiwij, jak'a yin kan xtinben chi janila ralal ri ejqa'n ri'. Rija' xixruch'ey rik'in tz'um, jak'a yin xkixinch'ey rik'in tz'um ri k'o k'ix ch'ich' chutza'n, xcha' chike.

¹⁵Ri rey man xerak'axaj ta ri winaqi' ri', roma ja ri Dios xbanon chire richin keri' nibanatej, achi'el ri rubin ri Dios chire ri Ahías ri aj-Siló chirij ri Jeroboam ri ruk'ajol ri Nabat, chi keri' xtibebanatej.

¹⁶Toq ri winaqi' ri e richin Israel xkitz'et chi ri rey man nrajo' ta yerak'axaj, jari' toq rije' xkibij chire: Roj xa oj man jun rik'in ri ánima David, ni man jun xqichinaj rik'in rija' ri xa ruk'ajol kan ri Isaí. Roj ri aj-Israel, jo' pa taq qachoch, y ri e aj pa rachoch kan ri David kan tikitzu' k'a pa ruwi' ri kachoch, xecha'. Y keri' konojel ri aj-Israel xetzolin chi taq kachoch.

¹⁷Jak'a ri aj-Israel ri k'o kachoch pa taq tinamit ri chiri' pa Judá, k'a xq'aton na tzij ri Roboam pa kiwi'.

¹⁸K'o k'a jun achin rubini'an Adoram y ja rija' ri pa'el pa kiwi' ri achi'a' ri kan k'o chi nikiben ri rusamaj ri rey y re achin re' xa xkamisex k'a chi abej, koma ri winaqi'. Y toq ri rey xrak'axaj re', xjote-el pa ru-carruaje, xanimej-el y xbe k'a pa Jerusalem.

¹⁹Y keri' k'a toq xyakatej ri Israel chikij ri aj pa rachoch kan ri David y keri' k'a rubanon kan.