Read Kaqchikel 2 Crón 13 Bible Online

2 Crón 13 - Kaqchikel bible

2 Crón 13

¹Toq ri Jeroboam k'a k'es na, y chupan ri juna' waqxaqlajuj richin ri ruq'atbal-tzij pa ruwi' ri Israel, jari' toq xok kan rey ri Abiam*f7* ri chiri' pa Judá.

²Ri rute' rubini'an Maacá,*f8* rumi'al ri Uriel aj-Guibeá. Y ri Abiam xuq'et-tzij oxi' juna' pa Jerusalem. Xuchop k'a nuben labal rik'in ri Jeroboam.

³Y ri Abiam xerucha' k'a el e 400,000 aj-labal ri más e utz. Keri' chuqa' ri Jeroboam xerucha' e 800,000 aj-labal, chuqa' ri más e utz, y xebe k'a richin nibekibana' oyowal.

⁴K'ari' ri Abiam pa'el pa ruwi' ri juyu' rubini'an Semaraim, ri k'o chuwi' taq juyu' richin ri ruwach'ulew Efraín, y xureq-apo ruchi', y xubij: ¡Rat Jeroboam y rix israelita, kinawak'axaj!

⁵¿Man iwetaman ta k'a rix, chi ri Jehová ri qa-Dios qonojel ri oj rijatzul kan ri Israel, kan xujech richin q'asen ri q'atbel-tzij pa ruq'a' ri David y pa kiq'a' ri e rijatzul toq xuben ri jikibel-tzij rik'in?

⁶Man rik'in ri', ri Jeroboam ruk'ajol ri Nabat, xyakatej chirij ri Roboam ri rajaw. Y ri Jeroboam ri' xa jun rusamajel ri Salomón ri ruk'ajol kan ri David.

⁷Xkimol k'a ki' rik'in rija' achi'a' ri janila e q'ori' y e banoy taq etzelal. Ri achi'a' ri' kan xkipaba' k'a ki' chuwech ri Roboam, roma man jani k'iy ta rujuna', y chuqa' man jani k'o runa'oj; roma ri' man xtikir ta xpa'e' kow chikiwech.

⁸Y rix wakami niwajo' nipaba-iwi' chuwech ri ruq'atbal-tzij ri Jehová, ri ruya'on kan chike ri e rijatzul kan ri rey David. Rix nich'ob keri' roma kan ix k'iy, y ek'o iwik'in ri nima-alaji' achija' taq wákix ri e banon rik'in q'anapueq ri xeruben ri Jeroboam richin niya' kiq'ij ri i-dios.

⁹Rix man chik xiya' ta q'ij chike ri e levita ri e rijatzul kan ri Aarón richin xkiben ri kisamaj richin ri Jehová, y xa ja rix ri xixcha'on ri i-sacerdote achi'el nikiben ri ch'aqa' chik ruwach'ulew ri man ketaman ta ruwech ri Jehová. Xabachike ri napon iwik'in richin nok sacerdote, wi ruk'uan jun nima-alaj achij wákix y wuqu' achija' taq karne'l, jari' ri niben-qa i-sacerdote chire richin yerusamajij ri i-dios ri man e qitzij ta.

¹⁰Jak'a roj, kan ja ri Jehová ri qa-Dios y man qamalin ta kan. Ri e sacerdote ri yesamej chupan rachoch ri Jehová ja ri e rijatzul kan ri Aarón, y ri yeto'on kichin ja ri e levita.

¹¹Rije' nikisuj k'a ri kamelabel ri niporox chijun chuwech ri Jehová ronojel nimaq'a' y tiqaq'ij. Chuqa' nikiporoj k'a ri jubulej pom; nikiya' k'a ri kaxlan-wey chuwech ri mesa ri kan ch'ajch'oj. Y ronojel tiqaq'ij nikitzij ri lámpara ri k'o pa ruwi' ri candelabro ri banon rik'in q'anapueq. Roj kan qataqen k'a ri rupixa' ri Jehová ri qa-Dios, jak'a rix xa kan imalin kan.

¹²Tiwetamaj k'a, chi ri Dios kan ja rija' ri k'o pa qawi' roj y ri e ru-sacerdote kan koyoben richin nikixupuj ri trompeta richin retal labal chiwij rix. Roma ri' rix aj-Israel, man tiben oyowal rik'in ri Jehová ri qa-Dios roj y ri ki-Dios kan ri qati't-qamama', roma kan man utz ta xtel chiwech, xcha'.

¹³Y ri Jeroboam rubin k'a chike jun tzobaj chike ri ruwinaq chi tibekisutij-pe-ki' chikij ri aj-Judá y chaqk'ate' kekichapa' chi oyowal, rokik ri ch'aqa' chik ruwinaq yek'oje' chikiwech ri aj-Judá.

¹⁴Toq ri aj-Judá xetzu'un kan chikij, jari' toq xkinabej chi xa najin chik ri oyowal chikij y chikiwech. Kan jari' toq xkinataj rubi' ri Jehová, y ri e sacerdote xkichop nikixupuj ri ki-trompeta.

¹⁵Y toq ri aj-Judá xkireq kichi' richin nichapatej-q'anej oyowal, ri Dios xuben chire ri Jeroboam y ri achi'a' ri aj-Israel chi xech'akatej koma ri Abiam y ri aj-Judá.

¹⁶Y ri aj-Israel xa xe'animej chikiwech ri aj-Judá, roma ri Dios kan xerujech pa kiq'a'.

¹⁷Ri Abiam y ri aj-labal xekikamisaj kan e 500,000 aj-labal ri e cha'on-el chiri' pan Israel.

¹⁸Keri' k'a xkiben ri aj-Israel toq xqasex kiq'ij chupan ri q'ij ri'. Y ri aj-Judá xkik'ut-ki' chi kan k'o-wi kuchuq'a' roma kan xkitaqej y xkikuquba' kik'u'x rik'in ri Jehová ri Dios kichin kan ri kati't-kimama'.

¹⁹Ri Abiam xutzeqelibej-el ri Jeroboam, y kan xekich'ek kan re tinamit re', ri ek'o pa ruq'a': Ri Betel, ri Jesaná, y ri Efraín, y chuqa' ri kokoj taq kitinamit.

²⁰Chirij ronojel re' ri Jehová xuya' ruk'ayewal pa ruwi' ri Jeroboam, y xken. Chupan ri ruk'aslen ri Jeroboam man jun bey chik xk'oje' ruchuq'a' ri ruq'atbal-tzij rokik k'es ri Abiam.

²¹Roma ri' ri Abiam kan xjike' chupan ri q'atbel-tzij y kan janila k'a ruchuq'a' xk'oje' janipe' xk'ase-el. Xek'oje' k'a e kajlajuj rixjayil y xeralk'ualaj e juwineq ka'i' ruk'ajol y e waqlajuj rumi'al.

²²Ri ch'aqa' chik ri xuben ri Abiam richin chijun ruk'aslen, xtz'ibatej kan chupan ri wuj richin ri q'alajirisey ruch'abel ri Dios rubini'an Iddo.