Read Kaqchikel 2 Crón 14 Bible Online

2 Crón 14 - Kaqchikel bible

2 Crón 14

¹Toq ri Abiam xken, xmuq chupan ri tinamit richin kan ri rey David. Jari' toq xk'oje' kan pa ruk'exel ri Asá ri ruk'ajol, y xk'oje' k'a lajuj juna' uxlanibel-k'u'x chupan ri ruwach'ulew ri'.

²Ri rubanobal ri Asá kan utz y kan choj xuben chuwech ri Jehová ri ru-Dios.

³Xerelesaj-el ri porobel kichin ri ch'aqa' chik dios ri ek'o pa ruwi' taq juyu' y xeruyoj jumul ri akuchi niya'ox-wi kiq'ij. Chuqa' xerupaxij ronojel ri paban taq abej y chuqa' ri ruwachibel ri dios ixoq rubini'an Asera.

⁴Chirij re' xubij chike ri aj-Judá richin nikitzeqelibej ri Jehová ri ki-Dios, ri chuqa' kichin kan ri kati't-kimama'. Ri Asá kan xuben k'a chike ri ruwinaq chi tikitaqej ronojel ri pixa' ri ruya'on kan ri Jehová.

⁵Chuqa' xerelesaj chupan ronojel tinamit ri k'o pa ruwach'ulew Judá, ri akuchi niya'ox-wi kiq'ij ri ch'aqa' chik dios y chuqa' akuchi niporox-wi pom. Y roma keri' xuben rija', kan xk'oje' k'a uxlanibel-k'u'x janipe' xuq'et-tzij.

⁶Rokik ri Jehová xuya' uxlanibel-k'u'x chire ri ruwach'ulew, ri Asá xtikir xerupaba-q'anej tinamit ri tz'apen-kij chi tz'aq chiri' pa Judá.

⁷Y xubij k'a chike ri aj-Judá: Qatz'apej-kij ri qatinamit y qapaba-q'anej tz'aq y kachoch ri chajinela' pa ruwi' ri tz'aq, y chirij ri ruchi' ri tz'aq tiqaya' ch'ayubel ri banon rik'in ch'ich' y che', rokik ri ruwach'ulew k'o pa qaq'a' roj, roma kan qakanon ri qa-Dios y rija' kan ruya'on uxlanibel-k'u'x qik'in, xcha'. Y keri' rije' xkipaba-q'anej ri samaj ri' y ronojel kan utz k'a xuben chikiwech.

⁸Ri Asá xek'oje' aj-labal rik'in; ri aj-Judá ek'o k'a e 300,000 achi'a' ri k'o kitobal y kikum, y ri aj-Benjamín ek'o k'a 280,000 achi'a' ri k'o kokoj tobel kik'in y chuqa' k'o ri rute-ch'ab kik'in; konojel k'a re achi'a' re' janila kuchuq'a' k'o.

⁹Y k'o k'a jun etzelanel richin ri Asá ri xbeyakatej-pe chirij, y xebek'oje' pa tinamit Maresá. Ri etzelanel richin aj-Etiopía, rubini'an Zérah, y e ruk'amon-pe 1000,000 aj-labal y 300 carruaje.

¹⁰K'ari' ri Asá xbe richin xberubana' oyowal rik'in, e rachibilan ri aj-labal y xek'oje' pa taq'aj kojol juyu' richin Sefata chunaqaj ri Maresá.

¹¹Ri Asá xuk'utuj to'onik chire ri Jehová ri ru-Dios y xubij: ¡Jehová, chawech rat junan richin ye'ato' ri aj-labal ri k'o kuchuq'a', y ri maneq kuchuq'a'! Y roma ri' qojato' Jehová ri at qa-Dios, roma kan awik'in rat qakuquban-wi qak'u'x, y pan abi' rat oj peteneq-wi chikij re achi'a' re'. ¡Jehová ja rat at qa-Dios; tak'utu' k'a awi' chi awik'in rat kan man jun nitikir!, xcha'.

¹²K'ari' ri Jehová xuya' k'a ch'akonik pa kiq'a' ri Asá y ri aj-Judá richin chi ri aj-Etiopía xa xe'animej chikiwech.

¹³Ri Asá y ri achi'a' xekitzeqelibej-el ri e etzelanel kichin k'a pa tinamit Guerar. Xekamisex k'a ri aj-Etiopía roma ri Jehová y koma ri aj-labal ri aj-Judá. Kan man jun chik xk'ase' kan chike ri aj-Etiopía, y ri aj-Judá kan xkimej k'a pe ronojel ri k'o rejqalen chuwi-kiq'a' ri e etzelanel kichin.

¹⁴Chuqa' xekich'ek kan ri ch'aqa' chik tinamit ri ek'o chunaqaj ri Guerar, roma ri nimalej xibinri'il richin ri Jehová xqaqa pa kiwi'. Ri aj-Judá xekik'is k'a kan konojel winaqi' kichin ri tinamit ri', y xkik'en-pe ronojel ri k'o rejqalen ri k'o kik'in, roma chiri' janila beyomel k'o.

¹⁵Chuqa' xebe pa taq kiqejoj ri awej, y kan k'iy k'a awej y camello xekik'en-pe. K'ari' xetzolin pa Jerusalem.