Read Kaqchikel 2 Crón 15 Bible Online

2 Crón 15 - Kaqchikel bible

2 Crón 15

¹Ri Espíritu richin ri Dios xpe k'a rik'in ri Azarías, ruk'ajol ri Oded,

²y roma ri' xberuk'ulu' k'a el ri Asá, y xubij chire: Rey Asá, kinawak'axaj k'a rat, y konojel ri winaqi' ri ek'o chupan ri awajawaren: Ri Jehová kan k'o-wi iwik'in rix, wi rix ixk'o rik'in rija'; y wi rix nikanoj, kan xtiwil; jak'a wi rix xa xtimalij kan rija', rija' chuqa' kan xkixrumalij kan.

³Ri ojer kan, chupan ri ruwach'ulew Israel, ri winaqi' man xkikanoj ta ri k'aslik Dios, e maneq sacerdote richin yetijon y maneq chik kik'in ri pixa' ri ya'on kan chike.

⁴Jak'a toq ek'o chupan ri ruk'ayewal, ri winaqi' ri' k'ari' xtzolin kik'u'x rik'in ri Jehová ri ki-Dios. Rije' kan xkikanoj chik k'a ri Jehová y kan xkil.

⁵Chupan ri q'ij ri' ri winaqi' ri yeq'ax chiri' kan maneq uxlanibel-k'u'x kik'in, roma chijun ri ruwach'ulew xa kan yojtajineq k'a jumul.

⁶Ri jun tinamit yakatajineq chirij jun chik tinamit, jun ruwach'ulew chirij jun chik ruwach'ulew, roma kan ja ri Dios xbanon chike richin nikik'owisaj ronojel ri ruk'ayewal ri'.

⁷Wakami k'a, rix kan kow k'a kixk'oje'; man kixmayamo-qa, roma ri ibanobal ri ibanon-pe kan k'o rajel-ruk'exel nuk'en-pe, xcha' ri Azarías.

⁸Toq ri Asá xrak'axaj ri ruch'abel ri Dios ri xuq'alajirisaj ri Azarías, kan xk'oje-el ruchuq'a' richin xerelesaj-el ronojel ri itzel taq wachibel ri kan ruk'amon richin ye'etzelex, ri ek'o chupan chijun ruwach'ulew Judá y ri ruwach'ulew Benjamín y chuqa' ri ek'o pa taq tinamit ri xeruch'ek, ri ek'o-el chuwi' taq juyu' richin ri ruwach'ulew Efraín. Chuqa' kan xuchojmirisaj ri porobel ri k'o-pe chuwech ri rachoch ri Jehová.

⁹K'ari' xerumol konojel ri winaqi' ri ek'o pa rajawaren, ri chiri' pa Judá y Benjamín y chuqa' xerumol ri winaqi' ri e peteneq pan Efraín, pa Manasés y ri pa Simeón ri xeq'ax-pe kik'in rije', roma kan xkitz'et chi kan k'o-wi ri Jehová kik'in.

¹⁰Re jun molojri'il re' xkiben k'a pa tinamit Jerusalem chupan ri rox ik' chire ri juna' wolajuj chire ri q'atbel-tzij richin ri Asá.

¹¹Chupan ri q'ij ri', xkisuj k'a kamelabel chuwech ri Jehová, e 700 bóyix y 7,000 karne'l ri xkik'en-pe pa Guerar chuwi-kiq'a' ri e etzelanel kichin.

¹²K'ari' rije' xkiben jun jikibel-tzij rik'in ronojel kánima y ronojel kik'u'x richin chi jantape' xtikikanoj ri Jehová, ri Dios kichin kan ri kati't-kimama'.

¹³Y chuqa' xkijikiba' chi wi k'o ta jun ri man xtukanoj ta ri Jehová ri ki-Dios kan xtikamisex, stape' k'o ruq'ij o maneq ruq'ij, chi achin chi ixoq.

¹⁴Xkiya' k'a kitzij chuwech ri Jehová rik'in raqoj-chi'ij y rik'in janila kikoten. Y kan nikixupula' ri trompeta y ri uk'a'.

¹⁵Konojel k'a ri winaqi' ri' kan janila xekikot roma ri ya'on-tzij ri xkiben, roma kan rik'in ronojel kánima xkiya' kitzij, y rik'in ronojel kik'u'x xkikanoj ri Jehová. Y ri Jehová kan xerak'axaj k'a, y xuya' uxlanibel-k'u'x kik'in chire ri oyowal.

¹⁶Y chuqa' xuben chire ri Maacá ri rati't chi xel-pe chupan ri q'atbel-tzij, roma rija' rubanon-q'anej jun itzel ruwachibel Asera. Ri Asá xuwulaj-el ri wachibel ri', y k'ari' xberuboxo' pa q'aq' chuchi' ri siwan ri napon-qa pa ch'uti'n raqen-ya' Cedrón.

¹⁷Ri ránima rija' kan xuya' k'a richin xuben ri xrajo' ri Jehová chupan chijun ruk'aslen, stape' xa man xeruwulaj ta el ri akuchi xya-wi kiq'ij ri ch'aqa' chik dios ri pa ruwi' taq juyu'.

¹⁸Y xuya-apo chupan ri rachoch ri Dios ri rusujun kan ri rutata' y ri rusujun-apo rija'; ri saqipueq y ri q'anapueq y ri jalajoj kiwech taq samajibel.

¹⁹Y kan man jun chik labal xbanatej, k'a xapon na ri juna' juwineq wolajuj chire ri q'atbel-tzij richin ri rey Asá.