Read Kaqchikel 2 Crón 16 Bible Online

2 Crón 16 - Kaqchikel bible

2 Crón 16

¹Chupan k'a ri juna' juwineq waqlajuj chire ri q'atbel-tzij richin ri Asá, rey richin Judá, jari' toq ri Baasá, rey richin Israel, xyakatej-pe chirij ri Judá y xuchop ri tinamit Ramá, y xuchop xupaba-q'anej jun tz'aq richin nutz'apej ri bey richin chi yeruq'et ri winaqi' ri ye'el-ye'ok chupan ri ruwach'ulew Judá y rik'in ri Asá.

²K'ari' ri Asá xberuk'ama-pe ronojel saqipueq y q'anapueq ri k'a k'o na kan chupan ri rubeyomel richin ri rachoch ri Jehová y ri k'o chuqa' chupan ri rubeyomel ri rachoch rija'. Xeruteq-el ri rusamajela' rik'in ri Ben-hadad ri rey richin ri ruwach'ulew Siria ri k'o pa tinamit Damasco, y xubij-el chire:

³Yin xinteq k'a el chawe jun sipanik rik'in juba' saqipueq y juba' q'anapueq. Wakami k'a tijunamatej k'a qawech roj, achi'el xkiben ri qatata'. Yin niwajo' chi rat yabe ta rik'in ri Baasá, rey richin Israel, richin nawelesaj-awi' chupan ri jikibel-tzij ri abanon rik'in, richin chi rija' kerelesaj-el ri aj-labal ri e okineq-pe pa nuruwach'ulew, xcha-el ri Asá chire.

⁴Y ri Ben-hadad xjunamatej-ruwech rik'in ri rey Asá, y xeruteq-el ri achi'a' ri e aj-raqen pa kiwi' ri aj-labal, richin xbekibana' oyowal kik'in ri aj-Israel. Y keri' xkich'ek ri tinamit Iión, ri Dan, ri Abel-maim y chuqa' ronojel ri tinamit richin ri Neftalí ri akuchi e yakel-wi ronojel ruwech ri yek'atzin.

⁵Y toq ri Baasá xrak'axaj re', xutanaba' kan ri samaj ri najin chupabaxik pa Ramá.

⁶Y k'ari' ri rey Asá xerumol konojel ri winaqi' ri ek'o pa rajawaren richin xkik'uaj-el ronojel ri xk'atzin chire ri Baasá richin xupaba-q'anej ri tz'aq. Konojel ri winaqi' ri' xkeraj-el ri abej y ri che' ri najin chukusaxik ri Baasá. Jari' ri xukusaj ri rey Asá richin xeruben-q'anej tz'aq chikij ri tinamit Mispá y ri Guebá.

⁷Chirij ri' xapon jun achin ri nitz'eton ri peteneq chiqawech, rik'in ri Asá y ri achin ri' rubini'an Hananí. Y xubij chire ri Asá: Roma xa rik'in ri rey richin Siria xakuquba' ak'u'x y man xakuquba' ta ak'u'x rik'in ri Jehová ri qa-Dios, roma ri' ri aj-labal richin ri rey aj-Siria xa man xkebek'oje' ta pan aq'a'.

⁸¿Kan man noqaqa ta chi'ak'u'x toq ri aj-Etiopía y ri aj-Libia kan janila kuchuq'a' y e k'iy achi'a' ri yech'oke' chirij kiej y janila ki-carruaje, y man rik'in ri' ri Jehová xerujech pan aq'a', roma kan xakanoj rija'?

⁹Keri' xuben ri Jehová roma rija' kan rutzuliben-pe chijun ri ruwach'ulew richin nuya' kuchuq'a' ri kan qitzij kijachon-ki' pa ruq'a' rik'in ronojel kánima. Rat xa kan achi'el jun nakanik na'oj ri xaben, y roma ri' re wakami chiqawech-apo xtipe más labal chawij, xcha' ri Hananí.

¹⁰Y roma ri' ri Asá xyakatej janila royowal chirij ri Hananí, y xuya' pa cárcel; y chuqa' janila xerutz'ila' e jujun chike ri winaqi' richin ri tinamit.

¹¹Ri ch'aqa' chik natabel richin ri Asá, ri pa rutikeribel y pa ruk'isibel chire ri ruk'aslen, xtz'ibatej kan chupan ri Wuj Ri Cholan Nich'on pa kiwi' ri rey richin ri ruwach'ulew Israel y ri ruwach'ulew Judá.

¹²Chupan ri juna' juwineq belejlajuj chire ri ruq'atbal-tzij, ri Asá xutej k'a poqon roma jun yabil chire ri raqen, y stape' ri ruq'axo'n kan janila nim, kan man xukanoj ta ri Jehová chupan ri ruyabil, xa ja ri aq'omanela' ri xerukanoj.

¹³Ri Asá xken k'a el chupan ri juna' kawineq jun chire ri ruq'atbal-tzij.

¹⁴Xkiya' k'a el pa jun ch'at y xkik'is-el pa jalajoj ruwech jubulej taq aq'om, ri kan ja ri etamanel richin jubulej taq aq'om ri banayon. Chirij ri' xbekimuqu' kan chupan ri jul ri rubanon kan rija' ri chiri' pa tinamit richin kan ri rey David, y k'ari' xkiben jun nimalej q'aq' richin xkiya' ruq'ij rija'.