Read Kaqchikel 2 Crón 17 Bible Online

2 Crón 17 - Kaqchikel bible

2 Crón 17

¹Ri Josafat ri ruk'ajol kan ri Asá, ja rija' xok kan rey pa ruk'exel ri rutata', y kan xk'oje' k'a ruchuq'a' richin nuto-ri' chuwech ri tinamit Israel.

²Xeruya' k'a aj-labal ri chiri' pa taq tinamit ri e sutin-kij chi tz'aq ri e richin ri rajawaren rija', y chuqa' xeruya' chajinela' ri chiri' pa taq tinamit richin Efraín, tinamit ri e ruch'akon kan ri Asá.

³Ri Jehová kan xk'oje' k'a rik'in ri Josafat roma pa taq rutikeribel chire ri ruk'aslen kan xutzeqelibej k'a ri bey ri xutzeqelibej ri David ri rumama', y man xuya' ta k'a kejqalen ri wachibel kichin ri Baal.

⁴Kan xutzeqelibej k'a ri Jehová, ri Dios richin kan ri Asá ri rutata'. Kan xutaqej k'a ri pixa' ri rubin ri Jehová, y man xuben ta achi'el nikiben ri winaqi' aj-Israel.

⁵Ri Jehová kan xujikiba' k'a ri q'atbel-tzij pa ruq'a', y konojel k'a winaqi' richin ri rajawaren k'o sipanik nikiya-apo chire ri Josafat, y rija' kan xk'oje' k'a rubeyomel pa ruk'iyal y nim ruq'ij.

⁶Kan xk'oje' k'a kikoten pa ránima richin xujech-ri' pa ruq'a' ri Jehová, y pa ruwi' ri' kan xerelesaj chuqa' ri che' ri ruwachibel ri Asera y ri akuchi nikiya-wi kiq'ij ri wachibel ri ek'o pa ruwi' taq juyu' ri chiri' pa rajawaren.

⁷Y chupan ri rox juna' chire ri ruq'atbal-tzij xeruteq-el wo'o' tata'al richin yebetijon pa taq tinamit richin ri ajawaren richin Judá. Y rije' kibini'an Ben-hail, Abdías, Zacarías, Natanael y Micaías.

⁸Chuqa' kik'in re tata'al re' xebe beleje' levita. Y rije' kibini'an Semaías, Netanías, Zebadías, Asael, Semiramot, Jonatán, Adonías, Tobías y Tobadonías. Chuqa' xebe ri sacerdote Elisamá y ri Joram.

⁹Rije' xebe k'a richin xebetijon pa taq tinamit richin ri ajawaren richin Judá, y xbekisolo-rij ri nubij chupan ri wuj richin ri rupixa' ri Jehová; y kan xeq'axilan k'a chupan ronojel tinamit richin xekitijoj ri winaqi'.

¹⁰Ri Jehová xuben k'a chi konojel ri q'atbel-tzij richin ri ruwach'ulew ri ek'o chunaqaj ri Judá xqaqa jun nimalej xibinri'il pa kiwi', y keri' kan man xetikir ta chik xkiben oyowal rik'in ri Josafat.

¹¹Ek'o k'a chike ri aj-Filistea xkiya' sipanik chire ri Josafat, y k'iy saqipueq k'o chi nikitoj chire, y ri aj-Arabia xkiya' k'a e 7,700 achija' karne'l y chuqa' e 7,700 achija' tzuntzun.

¹²Ri rey Josafat xk'oje' k'a q'anej ronojel uchuq'a' pa ruq'a', y xerupabala-q'anej nimalej taq jay tz'apen-kij chi tz'aq, y chuqa' xerupaba-q'anej tinamit ri akuchi ek'o jay richin yakonabel richin ronojel ri nik'atzin, chijun ri ajawaren.

¹³Chupan ri tinamit richin yakonabel, janila k'a k'iy ri k'atzinel yakon kan. Y chiri' pa Jerusalem, kan janila k'a e k'iy aj-labal ri maneq xibinri'il chikiwech ri xek'oje' rik'in ri Josafat.

¹⁴Ri aj-labal kan kich'aron-ki' pa taq tzobaj. Ja kajlabal re' achi'el kajlabal pa taq kachoch: Chupan ri tzobaj richin Judá, k'o ri aj-raqen pa kiwi' ri aj-labal rubini'an Adná e rachibilan e 300,000 achi'a' ri kan k'o kuchuq'a'.

¹⁵Chuqa' junan rik'in rija', k'o ri aj-raqen rubini'an Johanán pa kiwi' e 280,000 aj-labal.

¹⁶Chuqa' k'o ri Amasías, ruk'ajol ri Zicrí, y rija' xusuj-ri' richin nuben rusamaj ri Dios; y k'o k'a pa kiwi' e 200,000 achi'a' ri maneq xibinri'il chikiwech.

¹⁷Chupan ri tzobaj richin Benjamín k'o ri Eliadá, jun achin ri maneq xibinri'il chuwech; rija' k'o pa kiwi' e 200,000 achi'a', y ja rije' ri yek'aqon rik'in rute-ch'ab y kik'uan ri kitobal.

¹⁸Chuqa' k'o ri Jozabad e rachibilan e 180,000 aj-labal.

¹⁹Konojel k'a re achi'a' re' jare' ri xek'oje' rik'in ri Josafat, y man e ajlan ta ri achi'a' ri yechajin kan chiri' pa taq tinamit ri jebel tz'apen-kij chi tz'aq chupan ri ajawaren.