Read Kaqchikel 2 Crón 21 Bible Online

2 Crón 21 - Kaqchikel bible

2 Crón 21

¹Ri Josafat xken y xmuq pa rutinamit kan ri rey David, y ja ri nabey ruk'ajol rubini'an Joram ri xq'aton kan tzij pa ruk'exel.

²Ri ch'aqa' chik e ruk'ajol kan ri Josafat, ri e rach'alal ri Joram, ja ri Azarías, ri Jehiel, ri Zacarías, ri Azarías, ri Micael y ri Sefatías.

³Ri Josafat kan k'iy k'a sipanik ruya'on kan chike ri ralk'ual: Ri q'anapueq, ri saqipueq y ch'aqa' chik ri kan k'o rejqalen; chuqa' ruya'on kan chike tinamit ri kan jebel tz'apen-kij chi tz'aq ri ek'o chiri' pa Judá, jak'a ri q'atbel-tzij kan chire ri Joram ruya'on-wi kan roma ja rija' ri nabey ruk'ajol.

⁴Y toq ri Joram jebel chik ch'okol kan chupan ruq'atbal-tzij, jari' toq xerukamisaj konojel rach'alal chi espada, y chuqa' xerukamisaj ka'i-oxi' tata'al chikikojol ri aj-Judá.

⁵Toq xuchop nuq'et-tzij ri Joram k'o k'a juwineq kablajuj rujuna', y xuq'et k'a tzij waqxaqi' juna' chiri' pa Jerusalem.

⁶Jak'a rija' xa xuben achi'el ri kibanobal ri rey e richin ri ruwach'ulew Israel ri k'o pa xaman. Kan xuben k'a achi'el ri itzel taq kibanobal ri e aj pa rachoch kan ri Acab, y ri rixjayil ri Joram, ja ri rumi'al ri Acab, y roma ri' kan janila xmakun chuwech ri Jehová.

⁷Man rik'in ri', ri Jehová man xrajo' ta xeruk'is ri e rijatzul ri David, roma ri jikibel-tzij ri rubanon rik'in; y rubin chi ri rusaqil ri David man xtichup ta qa kik'in ri ralk'ual chupan ri q'atbel-tzij richin jantape'.

⁸Y toq niq'aton-tzij rija', jari' toq ri aj-Edom xeyakatej richin nikelesaj-ki' chuxe' ri q'atbel-tzij richin ri Joram, y roma ri' xkikanoj-qa jun ki-rey kiyon rije'.

⁹K'ari' ri Joram xyakatej-el kik'in konojel ri e aj-raqen pa kiwi' ri aj-labal, y chuqa' xeruk'uaj konojel ri ru-carruaje. Y toq ek'o chik chiri', ri aj-labal y konojel ri ye'uk'uan ri carruaje xeyakatej-el chaq'a', y xekichop chi oyowal ri aj-Edom ri kan kisutin chik kij.

¹⁰Jak'a ri aj-Edom kan xetikir xkelesaj kan ki' chuxe' ri ruq'atbal-tzij ri Judá k'a re q'ij re'. Keri' chuqa' xkiben ri winaqi' richin ri tinamit rubini'an Libná. Kan xetikir xkelesaj kan ki' chuxe' ri q'atbel-tzij richin ri Judá. Ronojel re' xbanatej roma ri Joram man xutzeqelibej ta ri Jehová ri ki-Dios kan ri kati't-kimama'.

¹¹Pa ruwi' ri' xa xeruben chik el ri akuchi niya'ox-wi kiq'ij ri wachibel chiri' pa taq juyu' richin Judá. Ja rija' ri xtzaqon chik kan kichin ri aj-Jerusalem y ri ch'aqa' chik winaqi' ri ek'o pa rajawaren, y chuqa' xuben chike chi xkich'er kan ki' chire ri ruchojmilal.

¹²Y k'o k'a jun q'ij ri Joram xuk'ul jun ruwuj ri q'alajirisey ruch'abel ri Dios rubini'an Elías, y kere' nubij: Ri Jehová Dios richin kan ri David ri amama' kere' nubij: Rat man atzeqeliben ta ri utzilej kibanobal ri ánima Josafat, ni ta ri rubanobal ri ánima Asá.

¹³Xa ja ri itzel taq kibanobal ri rey e richin Israel, ri ek'o pa xaman, ri xatzeqelibej; y ja rat xabanon chi ri winaqi' richin ri Judá y ri Jerusalem xkich'er kan ki' chire ri ruchojmilal ri nuya'on yin. Xa kan xaben chi xkiben achi'el ri itzel taq kibanobal ri aj pa rachoch kan ri Acab. Y pa ruwi' ri', chuqa' xe'akamisaj ri awach'alal ri xa kan más e utz chawech rat.

¹⁴Roma ri' yin Jehová ninbenya' jun nimalej ruk'ayewal pa ruwi' ri atinamit, pa kiwi' ri awalk'ual, ri awixjayilal y pa kiwi' konojel ri ek'o awik'in.

¹⁵Y pan awi' rat xtinya' k'iy ruwech yabil, y jun nimalej rukiy apan ri kan q'ij-q'ij más xtinimer, y kan xtibe'el ri awixkolob roma ri yabil ri', nicha' ri Jehová, xcha' ri Elías chupan ri wuj.

¹⁶K'ari' ri Jehová xuben chike ri winaqi' aj-Filistea y ri winaqi' e árabe, ri ek'o-apo chikinaqaj ri aj-Cus chi xkiben oyowal rik'in ri Joram.

¹⁷Y xe'ok-apo pa Judá y xekik'uaj-el ronojel ri k'o rejqalen ri e ya'on kan chupan ri jay akuchi nuq'et-wi-tzij ri rey. Chuqa' xe'uk'uex-el ri ralk'ual y ri e rixjayil; xaxe chik ri Ocozías ri más ko'ol ri chuqa' rubini'an Joacaz, ri xkolotej kan.

¹⁸Chirij k'a ronojel re' ri Jehová xuya' ri nimalej yabil chire ri rupan, y kan man xaq'omatej ta chik.

¹⁹Y xq'ax k'a ri q'ij y toq xtz'aqet la'eq jubama k'a ka'i' juna', roma ri yabil ri k'o chire xel-pe ri rixkolob y roma ri rukiy xken. Y kan man jun k'a q'aq' xkibox ri ruwinaq richin natabel richin, achi'el kibanon kik'in ri rati't-rumama'.

²⁰Ri Joram k'o k'a juwineq kablajuj rujuna' toq xuchop xuq'et-tzij pa ruwi' ri ruwach'ulew Judá chiri' pa Jerusalem, y waqxaqi' k'a juna' xuq'et-tzij. Y toq xken, kan man jun k'a xbison richin; xmuq k'a pa rutinamit kan ri rey David, jak'a man xmuq ta chikikojol ri rey.