Read Kaqchikel 2 Crón 22 Bible Online

2 Crón 22 - Kaqchikel bible

2 Crón 22

¹Ri winaqi' aj-Jerusalem xkikusaj kan rey ri Ocozías ri más chaq'laxel, roma ri e nimalaxela' xa xekamisex koma jun tzobaj e itzel taq achi'a' ri junan e peteneq kik'in ri aj-Arabia.

²Ri Ocozías k'o k'a juwineq ka'i' rujuna' toq xuchop nuq'et-tzij pa Jerusalem, y xaxe ok jun juna' ri xuq'et-tzij. Ri rute' rubini'an Atalía rijatzul kan ri Omrí.

³Rija' xa xerutzeqelibej ri itzel kibanobal ri e aj pa rachoch kan ri Acab, y ja ri rute' ri xya'on kan ri itzel taq pixabanik chire.

⁴Kan xuben ri itzel chuwech ri Jehová, roma toq xken ri Joram ri rutata', ri aj pa rachoch ri Acab xepe richin xkitaqchi'ij chubanik itzel taq banobel.

⁵Ri Ocozías kan xunimaj ri xkibij chire y xrachibilaj-el ri Joram, ruk'ajol kan ri Acab, rey richin Israel, richin xbekibana' oyowal pa ruwi' ri Ramot richin Galaad rik'in ri Hazael rey richin Siria. Y ri aj-Siria xkisok-pe ri Joram.

⁶Y xtzolin k'a pe richin xraq'omaj-el-ri' pa tinamit Jezreel roma xsokotej-pe pa Ramot toq xkiben oyowal kik'in ri aj-Siria. Y toq q'axineq chik ka'i-oxi' q'ij, ri Ocozías xberutz'eta-el ri Joram chiri' pa Jezreel, rokik nraq'omaj ri'.

⁷Ri Dios xuben chire ri Ocozías chi nibeken toq xtiberuq'ejela-el ri Joram. Toq ri Ocozías xapon rik'in ri Joram, kan jari' k'a xe'el-el richin nibekibana' oyowal rik'in ri Jehú, ruk'ajol ri Nimsí. Jak'a ri Jehová kan rucha'on ri Jehú richin yeruk'is konojel ri e ralk'ual y ri rixjayil ri Acab.

⁸Rokik ri Jehú najin chubanik ri k'o chi nuben pa kiwi' ri e aj pa rachoch kan ri Acab, jari' toq xerutz'et ri e tata'al richin ri Judá y ri e ruch'utik'ajol ri Ocozías, ri ye'ilin richin rija'. Konojel ri' xerukamisaj ri Jehú.

⁹Jak'a ri Ocozías xa xberewaj-ri' k'a pa tinamit Samaria. Y ri Jehú xuteq rukanoxik y toq xilitej-pe, k'ari' xk'amer-pe chuwech ri Jehú y chiri' xkikamisaj-wi. Y ri Ocozías kan xkimuq k'a, roma ketaman chi ruk'ajol ri Josafat, ri kan xutej ruq'ij rik'in ronojel ránima richin xukanoj ri Jehová. Kan man jun chik k'a ri xk'oje' ta kan chike ri aj pa rachoch ri Ocozías ri kan xtikir ta xok-q'anej rey.

¹⁰Toq ri Atalía, ri rute' ri Ocozías, xrak'axaj chi ri ral xken, jari' toq xuchop yerukamisaj ri e rijatzul kan ri Ocozías.

¹¹Jak'a ri Joseba ri rumi'al kan ri rey Joram, xrelesaj-el ri Joás, jun chike ri ruk'ajol ri Ocozías, y chuqa' xrelesaj-el ri ixoq ri xk'iytisan richin, richin man xkamisex ta, roma konojel rach'alal xekamisex yan. Xrewaj ri Joás y ri ixoq; xerewaj chiri' pa jun jay richin xerukol chuwech ri Atalía. Y re Joseba re', rana' ri Ocozías, y rixjayil ri nimalej sacerdote Joiadá.

¹²Waqi' k'a juna' xkewaj ri Joás kik'in rije' chiri' pa rachoch ri Dios, rokik ri Atalía nuq'et-tzij chupan ri ruwach'ulew Judá.