Read Kaqchikel 2 Crón 23 Bible Online

2 Crón 23 - Kaqchikel bible

2 Crón 23

¹Chupan ri ruwuq juna' richin ri q'atbel-tzij richin ri Atalía, ri Joiadá xk'oje' ruchuq'a' y xuteq k'a koyoxik wo'o' aj-raqen kichin ri aj-labal richin xkitun-ki'. Y rije' kibini'an Azarías ruk'ajol ri Jeroham, Ismael ruk'ajol ri Johanán, Azarías ruk'ajol ri Obed, Maaseías ruk'ajol ri Adaías y ri Elisafat ruk'ajol ri Zicrí.

²Rije' xkitaluj k'a ki' chupan ri ajawaren richin Judá, y xekimol k'a ri e levita richin ri jalajoj tinamit, y chuqa' ri e tata'al kichin ri ach'alalri'il richin xepe pa Jerusalem.

³Ri janila chi winaqi' ri xe'apon, xkimol-ki' chiri' pa rachoch ri Jehová, richin xkijikiba' kitzij rik'in ri Joás ri ruk'ajol kan ri rey. Jari' toq ri Joiadá xubij chike: Jare' k'a ri ruk'ajol kan ri rey, y ja rija' k'a xtibeq'aton-tzij pa qawi' achi'el ri rubin kan ri Jehová pa kiwi' ri e rijatzul kan ri David.

⁴Wakami k'a kere' tibana': Tich'ara-iwi' pan oxi' tzobaj. Rix sacerdote y levita, ix richin ri nabey tzobaj. Ja rix ri xkixok-pe chupan ri q'ij richin uxlanen richin nichajij ronojel ri ruchi' ri rachoch ri Dios.

⁵Ri ix richin ri ruka'n tzobaj, xtichajij ri rachoch ri rey akuchi k'o-wi ri Atalía; y rix ri ix richin ri rox tzobaj, xtichajij ri ruchi' ri tz'aq rubini'an Xur.*f10* Konojel k'a ri qawinaq xkek'oje' wawe' chuwa-jay chire re rachoch ri Jehová.

⁶Y kan man jun k'a xtok-pe pa rachoch ri Jehová, xa kan xaxe rix sacerdote y levita, roma ijachon-iwi' chire ri Jehová, jak'a konojel ri ch'aqa' chik winaqi' kan man ke'ok-pe wawe', achi'el rubin ri Jehová.

⁷Wi k'o jun xtrajo' xtok-pe pa rachoch ri Jehová, kan xtikamisex. Rix levita kan tibesutij k'a rij ri rey Joás; chi'ijujunal tik'uaj ri ikamisabal, y kan titzeqelibej ri rey xabakuchi nibe-wi rija'.

⁸Ri e levita y ri winaqi' xkiben k'a ronojel ri xbix chike roma ri sacerdote Joiadá. Y ri aj-raqen pa kiwi' ri chajinela' ri ye'ok-apo richin yekijel-el ri k'o chi ye'el-el, man xuya' ta q'ij richin yetzolin toq xkijech yan kan ri kisamaj, roma keri' xubij ri Joiadá.

⁹K'ari' ri Joiadá xujech chike ri aj-raqen pa kiwi' ri aj-labal ri kum y ri jalajoj kiwech tobel ri e richin kan ri rey David ri ek'o kan chupan ri jay richin yakonabel chiri' pa rachoch ri Dios.

¹⁰Y xerunuk' k'a ri winaqi' chukojol ri porobel y ri rachoch ri Dios, nitiker-pe pa rajxokon chire ri jay, y napon k'a pa rijkiq'a'. Chikijujunal kik'uan ri kikamisabal pa kiq'a' richin nikisutij-rij ri Joás.

¹¹K'ari' ri Joiadá y ri e ruk'ajol xbekelesaj-pe ri Joás, ri ruk'ajol kan ri rey, y xkiya' jun corona pa rujolon y xkijech jun wuj chire ri k'o ri rupixa' ri Jehová chuwech. K'ari' xkiqasaj aceite pa ruwi' y konojel xesik'in y xkibij: ¡Tiqaya' ruq'ij ri rey!, xecha'.

¹²Y toq ri Atalía xrak'axaj chi ri winaqi' yesik'in y yebujuj y nikiya' ruq'ij ri rey, xbe k'a pa rachoch ri Dios akuchi ek'o-wi konojel.

¹³Jari' toq xutz'et-apo chi ri rey pa'el rik'in ri pilar ri k'o-pe chuwech ri jay, y pa kinik'ajal ri e tata'al y ri yeq'ojoman. Y ri winaqi' janila yekikot y nikixupuj trompeta, y ri q'ojomanela' nikiq'ojomaj jalajoj ruwech q'ojom richin yebixan konojel. Jari' toq ri Atalía xuretz ri rutziaq y xsik'in y xubij: ¡Xinkiq'ol! ¡Xinkiq'ol!, xcha'.

¹⁴K'ari' ri Joiadá xeroyoj ri e aj-raqen kichin ri aj-labal, y xubij chike chi tikelesaj-el ri ixoq ri' chikikojol y wi k'o ta jun nitzeqeliben richin nuto', kan tikamisex k'a kan chi espada juk'an chik chire ri jay, roma ri Joiadá kan rubin chi man nikamisex ta chiri' pa rachoch ri Jehová.

¹⁵Xkichop k'a y xkikusaj-apo akuchi ye'el-ye'ok-wi ri kiej chiri' pa rachoch ri rey y chiri' xkikamisaj-wi kan.

¹⁶K'ari' ri Joiadá xuben chi konojel ri winaqi' junan rik'in ri rey tikijikiba-kitzij chi kan xke'ok rutinamit ri Jehová.

¹⁷Chirij ri', konojel xebe pa rachoch ri Baal, xkiwulaj k'a kan ri jay ri' y xkiwulaj kan ri porobel y ri wachibel ri ek'o chiri'. Keri' chuqa' xkiqupij kan ruqul ri Matán ri nisamajin richin ri Baal, chiri' chuwech ri porobel.

¹⁸Ri Joiadá xerucha' k'a kan ri e tata'al kichin ri e sacerdote y ri e levita chiri' pa rachoch ri Jehová, achi'el rubanon kan ri David, richin chi ja rije' ri yeporon ri chikopi' chuwech ri Jehová, achi'el ri tz'ibatel kan chupan ri pixa' ri ruya'on kan ri Moisés; y k'o chi nikiben rik'in bix y rik'in janila kikoten kan achi'el ri ruchojmilal ri ruya'on kan ri David.

¹⁹Chuqa' xeruya' chajinela' chuchi' ri rachoch ri Jehová, richin man ye'ok ta ok ri man kich'ajch'ojirisan ta ki'.

²⁰K'ari' xerunuk' ri aj-raqen kichin ri aj-labal, ri achi'a' ri k'o kiq'ij, ri e q'atoy taq tzij, y konojel ri winaqi' richin nikachibilaj-el ri rey; xe'el-el chupan ri rachoch ri Jehová y xe'apon k'a rik'in ri rachoch ri rey. Xe'ok k'a apo akuchi k'o-wi ri ruchi' ri más nim, y xbekitz'uyuba' kan ri rey pa rutz'uyubal richin q'atbel-tzij.

²¹Chirij ri rukamik ri Atalía, konojel k'a ri winaqi' richin ri ruwach'ulew ri' kan janila xekikot y kan xek'oje' rik'in ch'uch'ujil.