Read Kaqchikel 2 Crón 24 Bible Online

2 Crón 24 - Kaqchikel bible

2 Crón 24

¹Wuqu' k'a rujuna' ri Joás toq xuchop nuq'et-tzij, y kawineq juna' xq'aton-tzij pa ruwi' ri Judá chiri' pa Jerusalem. Ri rute' rubini'an Sibiá aj-Beerseba.

²Ri Joás kan utz k'a xuben chuwech ri Jehová, rokik k'es ri sacerdote Joiadá.

³Ri Joiadá xuk'uluba' ri Joás kik'in e ka'i' ixoqi', y kan xek'oje' k'a ralk'ual.

⁴K'o k'a jun q'ij ri rey xunojij richin nuchojmirisaj ri rachoch ri Jehová.

⁵Xerumol k'a konojel ri e sacerdote y ri e levita y xubij chike: Titaluj-iwi' chupan chijun ri ajawaren, y tik'utuj chike ri winaqi' ri kan k'o chi nikitoj chuwe, richin keri' ronojel k'a juna' xtichojmirisex k'a ri rachoch ri qa-Dios, y kan chi'anin tibana' re samaj re', xcha'. Jak'a ri e levita xa kan man xkiteleche'ej ta.

⁶K'ari' ri rey xroyoj ri nimalej sacerdote Joiadá y xubij chire: ¿Achike roma man abanon ta chike ri e levita chi kik'amon ta chik pe wawe' ri k'o chi nikitoj ri winaqi' aj-Judá y ri aj-Jerusalem, ri ruq'aton kan ri Moisés, rusamajel ri Jehová pa qawi' roj israelita, richin niqachojmirisaj ri jay ri akuchi k'o-wi ri rujikibel-tzij ri Dios?, xcha'.

⁷Ri Joás xubij keri' roma ri e tzeqelibey richin ri itzel ixoq Atalía xe'ok chupan ri rachoch ri Dios richin xbekelesaj-pe ri samajibel richin ri rachoch ri Jehová, y rik'in ri' xkiya' kiq'ij ri kiwachibel Baal.

⁸Ri rey xuteq k'a rubanik jun káxa, y xkiya' k'a chunaqaj ri ruchi' ri rachoch ri Jehová ri chuwa-jay-el.

⁹K'ari' xkiya' rutzijol chupan chijun rajawaren y pa Jerusalem chi k'atzinel nikik'uaj-el pa rachoch ri Jehová ri kuchuj, achi'el ri xubij ri Moisés, rusamajel ri Dios, chike ri winaqi' israelita pa tz'iran ruwach'ulew.

¹⁰Toq xkak'axaj k'a ronojel re', konojel aj-raqen kichin ri tinamit y konojel ri winaqi' xebe k'a rik'in janila kikoten chuya'ik ri kikuchuj chupan ri káxa y kan chi'anin k'a xnoj ri káxa ri'.

¹¹Ronojel k'a mul toq ri e levita nikik'uaj-el ri káxa kik'in ri samajela' richin ri rey, kan jantape' nojineq. Y toq nikitz'et chi k'o chik janila méro, jari' toq ri tz'ibanel richin ri rey y jun chik samajel ri kanon roma ri Joiadá nikijem kan ri káxa. K'ari' nibekiya' chik kan jun bey pa ruk'ojelibal. Keri' k'a nikiben ronojel q'ij, y kan janila k'a k'iy méro nikimol.

¹²K'ari' ri rey y ri Joiadá nikijech k'a ri méro ri' chike ri aj-raqen kichin ri yesamajin ri rachoch ri Jehová richin xekanox samajela' ri e choyoy abej y ri ajanela', chuqa' ri yesamej rik'in q'eqapueq y rik'in q'enq'oj-pueq richin nikichojmirisaj ri rachoch ri Jehová.

¹³Konojel re samajela' re' kan chi'anin k'a xkiben ri kisamaj. Y kan xkiben k'a chire achi'el ri retal ri k'o kan, y kan utz rubanik xkiben chire.

¹⁴Y toq xk'achoj rubanik, xkik'uaj-el chire ri rey y chire ri Joiadá, ri méro ri man xk'is ta. Rije' xekichilabej samajibel ri yek'atzin pa rachoch ri Jehová: samajibel richin ri kamelabel ri yeporox, ri pajbel y ri ch'aqa' chik samajibel. Ronojel re' e banon rik'in q'anapueq y saqipueq. Rokik k'a k'es na ri Joiadá kan beneq ruwech xesuj ri kamelabel ri niporox chijun chiri' pa rachoch ri Jehová.

¹⁵Xapon k'a ri q'ij toq ri Joiadá janila xrijix, y xken, y k'o k'a 130 rujuna' toq xken;

¹⁶y xkimuq k'a pa rutinamit kan ri rey David. Junan xmuq kik'in ri rey, roma kan janila utz xuben chupan ri ajawaren, y chuqa' janila utz ri xuben chuwech ri Dios y ri rachoch.

¹⁷Chirij k'a ri rukamik ri Joiadá xe'apon ri e tata'al richin ri Judá, y kan xkinimirisaj k'a ruq'ij ri rey, y rija' xa xujel ri ruch'obonik y xa ja chik rije' ri xunimaj kitzij.

¹⁸Roma ri' ri winaqi' xkimalij kan ri rachoch ri Jehová ri ki-Dios kan ri kati't-kimama', y xkisamajij k'a ri ruwachibel Asera y ri ch'aqa' chik wachibel. Roma re mak re' ri Dios xpe royowal pa ruwi' ri Judá y ri Jerusalem.

¹⁹Man rik'in ri' ri Jehová xeruteq k'a q'alajirisey ri ruch'abel richin xuben chike chi xetzolin ta pe rik'in. Jak'a ri winaqi' man xeniman ta chike ri e q'alajirisey ruch'abel.

²⁰K'ari' ri Espíritu richin ri Dios xpe rik'in ri Zacarías, ruk'ajol kan ri Joiadá. Y xapon kik'in ri winaqi' y xpa'e' chikiwech akuchi ri más pa jotol, y xubij: Kere' nubij ri Dios: ¿Achike roma rix man itaqen ta ri nupixa'? ¿Achike roma xa iyon rix xikanoj ruk'ayewal? Roma rix xa xinimalij kan, keri' chuqa' yin xkixinmalij kan, nicha' ri Jehová, xcha'.

²¹Jak'a ri winaqi' xa xeyakatej chirij, y ri rey xubij chike chi tikik'aqa' chi abej chiri' chuwa-jay chire ri rachoch ri Jehová.

²²Y keri' ri rey Joás xa kan xumestaj yan ri joyowanik ri xuk'ut kan ri Joiadá chuwech, y roma ri' xukamisaj ri Zacarías, ri ruk'ajol. Y toq ri Zacarías niken yan qa, xubij: Kan ja ri Jehová xtitz'eton ronojel re', y kan ja rija' xtiq'aton-tzij pan iwi', xcha'.

²³Toq xtz'aqet yan k'a jun juna' chi tik'uluwachitej re', xepe k'a jun ko'ol tzobaj aj-labal aj-Siria chirij ri tinamit Judá y ri Jerusalem. Ri Jehová kan xerujech k'a pa kiq'a' ri winaqi' ri', stape' ri aj-Judá kan e janila chi aj-labal. Kere' xuben chike roma xa xkimalij kan rija', stape' kan ja rija' ri ki-Dios kan ri kati't-kimama'. Ri aj-Siria xekikamisaj kan konojel aj-raqen ri k'o más kiq'ij chupan ri q'atbel-tzij, y ronojel k'a ri k'o rejqalen ri k'o pa Jerusalem xkimej-el chuwi-kiq'a' y xbekiya' chire ri rey ri k'o pa Damasco. Keri' toq ri Dios xuq'et-tzij pa ruwi' ri Joás roma ri xuben.

²⁵Ri Joás kan xsokotej k'a kan chire ri oyowal ri' y kan jurayil xuben kan y toq ri aj-Siria xe'el-el chiri', jari' toq ri rusamajela' xeyakatej chirij y xkikamisaj kan chiri' pa ruch'at, roma rija' xukamisaj ri Zacarías, ruk'ajol kan ri Joiadá. Ri Joás xmuq chiri' pa rutinamit kan ri rey David y man xmuq ta k'a ri akuchi e muqun-wi ri ch'aqa' chik rey.

²⁶Ri xekamisan richin ja ri Zabad*f11* ral ri Simat aj-Amón, y ri Jozabad ral ri Simrit*f12* aj-Moab.

²⁷Ri kibanobal ri ralk'ual ri Joás, ri ronojel ri bin-pe pa ruwi' rija' y ri samaj ri xuben toq xuchojmirisaj ri rachoch ri Jehová; ronojel re' xtz'ibatej kan chupan ri Wuj Kichin ri Rey. Y toq xken ri Joás, ri xk'oje' kan pa ruk'exel ja ri Amasías ri ruk'ajol.