Read Kaqchikel 2 Crón 27 Bible Online

2 Crón 27 - Kaqchikel bible

2 Crón 27

¹Ri Jotam k'o k'a juwineq wo'o' rujuna' toq xuchop nuq'et-tzij pa ruwi' ri ajawaren Judá chiri' pa Jerusalem, y waqlajuj k'a juna' xq'aton-tzij chiri'. Ri rute' rubini'an Jerusá, rumi'al ri Sadoc.

²Ri rubanobal ri Jotam kan utz k'a chuwech ri Dios, achi'el xuben ri rutata', xaxe rija' man xok ta chupan ri rachoch ri Jehová, achi'el ri xuben ri rutata'. Jak'a ri winaqi' richin ri rajawaren xa kan jantape' xkiben ri itzel taq banobel.

³Ja rija' ri xchojmirisan-q'anej ri ruchi' ri ruwa-jay ri k'o pa xaman richin ri rachoch ri Jehová, y chuqa' xeruchojmirisaj-q'anej ri tz'aq ri k'o chirij ri tinamit Ófel.*f14*

⁴Chuqa' xerupaba-q'anej tinamit chuwa taq juyu' richin Judá, y xeruben-q'anej jay e tz'apen chi tz'aq y xeruben chuqa' jay kichin ri chajinela' pa ruwi' ri tz'aq, pa taq k'echelaj.

⁵Xuben k'a labal rik'in ri rey kichin ri aj-Amón y kan xeruch'ek. Chupan k'a ri juna' ri' ri aj-Amón k'o chi xkitoj ri k'o chi nikitoj chire ri rey, rik'in jubama oxk'al wolajuj quintal saqipueq y 37,000 quintal trigo y keri' chuqa' ri retabal ri cebada. Kan jari' ri k'o chi xkiya' ri winaqi' ri', y oxi' juna' keri' xkiben.

⁶Ri Jotam kan janila k'a xnimer ruq'ij roma kan choj xuben chuwech ri Jehová ri ru-Dios.

⁷Ri rubanobal ri Jotam, ri labal ri xeruben y ri ch'aqa' chik rusamaj, xtz'ibatej kan chupan ri wuj kichin ri rey richin ri Israel y ri Judá.

⁸Ri Jotam k'o k'a juwineq wo'o' rujuna' toq xuchop nuq'et-tzij pa ruwi' ri ajawaren richin Judá chiri' pa Jerusalem, y waqlajuj k'a juna' xq'aton-tzij.

⁹Toq xken, xmuq k'a chupan ri tinamit richin ri rey David, y ri xk'oje' kan pa ruk'exel ja ri Acaz ri ruk'ajol.