Read Kaqchikel 2 Crón 29 Bible Online

2 Crón 29 - Kaqchikel bible

2 Crón 29

¹Chirij re' ri Ezequías xuchop nuq'et-tzij pa Jerusalem y xuq'et k'a tzij juwineq beleje' juna' chiri'. K'o k'a juwineq ka'i' rujuna' toq xok kan rey, y ri rute' rubini'an Abí, rumi'al kan ri Zacarías.

²Ri rubanobal rija' kan utz k'a chuwech ri Jehová, achi'el ri rubanobal ri David, ri rumama'.

³Ja rija' ri xjaqon chik ri ruchi' ri rachoch ri Jehová y xeruchojmirisala'. Y re' xuben chupan ri nabey ik' chire ri nabey juna' chire ri ruq'atbal-tzij.

⁴K'ari' xeroyoj k'a ri e sacerdote y ri ch'aqa' chik levita. Xerumol k'a chiri' chupan ri nima-ruwech bey richin molojri'il ri k'o pa relebel-q'ij chire ri rachoch ri Dios.

⁵Y xubij chike: Rix levita kiniwak'axaj: Tich'ajch'ojirisaj k'a iwi', y tich'ajch'ojirisaj k'a ri rachoch ri Jehová, ri qa-Dios roj y ri ki-Dios kan ri qati't-qamama'. Tiwelesaj-pe chiri', ronojel ri man e ch'ajch'oj ta.

⁶Rix iwetaman chi ri qate-qatata' xa xeyakatej chirij ri Jehová ri qa-Dios, y xa kan janila itzel ri kibanobal ri xkiben chuwech y xa xkimalij kan. Chuqa' xkiben chi xkimestaj kan jumul re rachoch y man xe'oqaqa ta chik chupan.

⁷Xa xekichup kan ri lámpara y man xkiporoj ta chik pom. Xa xkitz'apej k'a kan ri ruchi' ri jay. Keri' chuqa' xkitanaba' rusujik ri chikopi' ri yeporox pa ruwi' re porobel re k'o wawe' chuwa-jay.

⁸Roma ri' ri Jehová xuteq-pe ri royowal pa kiwi' ri qate-qatata' ri ek'o pa Judá y pa Jerusalem, y xuben chike richin xkik'uluwachij nima'q taq q'axo'n, y ri winaqi' richin ri ch'aqa' chik ruwach'ulew kan xkixibij k'a ki' toq xekitz'et, y chuqa' kan xetze'en chikij. Y rix kan itz'eton k'a pe re'.

⁹Roma ri' ri qate-qatata' xeken chi espada chupan ri oyowal, y ri ak'uala' y ri ixoqi' xe'uk'uex-el.

¹⁰Y roma ri' yin xinch'ob chi ninjikiba' nutzij chuwech ri Jehová ri qa-Dios chi junan ta qawech, richin ta chi xtik'o-el ri royowal chiqij.

¹¹Y roma ri' k'a nuwinaq yin, kan titija' k'a iq'ij, roma ri Jehová kan ix rucha'on richin nisamajij y kan xtiporoj k'a pom chuwech, xcha'.

¹²Y ri e levita ri' kan chi'anin xkichop rubanik ri samaj. Chike ri e rijatzul kan ri Quehat, xesamej ri Máhat ruk'ajol ri Amasai, y ri Joel ruk'ajol ri Azarías. Chike ri e rijatzul kan ri Merarí, xesamej ri Cis ruk'ajol ri Abdí y ri Azarías, ruk'ajol ri Jehaleel. Chike ri e rijatzul ri Guersón, ja ri Joah ruk'ajol ri Zimá y ri Edén ruk'ajol ri Joah.

¹³Chike ri e rijatzul kan ri Elisafán, ja ri Simrí y ri Jehiel. Chike ri e rijatzul kan ri Asaf, ja ri Zacarías y ri Matanías.

¹⁴Chike ri e rijatzul kan ri Hemán, ja ri Jehiel y ri Simí, y chike ri e rijatzul kan ri Jedutún xesamej ri Semaías y ri Uziel.

¹⁵Ri nabey xkiben, ja ri xekimol ri ch'aqa' chik kach'alal. Y k'ari' xkich'ajch'ojirisaj-ki' konojel, y xe'ok-apo chupan ri rachoch ri Jehová richin xkich'ajch'ojirisaj, roma keri' xubij ri rey, achi'el ri xbix chire roma ri Jehová.

¹⁶Xe'ok k'a apo ri e sacerdote chupan ri rachoch ri Jehová richin xkich'ajch'ojirisaj. Y xkelesaj k'a pe chuwa-jay ronojel ri man utz ta ri ek'o chiri' chupan ri rachoch ri Jehová. Y ri e levita xkik'uaj-el ronojel richin xbekik'aqa' kan k'a pa siwan ri akuchi niq'ax-wi ri ti ch'uti'n raqen-ya' Cedrón.

¹⁷Xkichop k'a ruch'ajch'ojirisaxik chupan ri q'ij ri', ri nabey q'ij chire ri nabey ik', y toq xapon ri waqxaqi' q'ij chire ri ik' ri', xek'achoj chujosq'ixik chijun rupan ri jay y xe'apon yan chupan ri ruwa-jay. Ri ruwa-jay xkich'ajch'ojirisaj chupan waqxaqi' chik q'ij, y xkik'achojirisaj ronojel chupan ri q'ij waqlajuj chire ri ik' ri'.

¹⁸Chirij re', k'ari' xe'ok-apo chupan ri jay akuchi nuq'et-wi-tzij ri rey Ezequías y xkibij chire: Xqach'ajch'ojirisaj yan ronojel ri rachoch ri Jehová y chuqa' ri porobel ri akuchi yesuj-wi chikopi' rachibilan ronojel ri samajibel. Xqach'ajch'ojirisaj chuqa' ri mesa akuchi yenuk'-wi ri kaxlan-wey rachibilan ronojel rusamajibal.

¹⁹Chuqa' xqanuk' yan y xqach'ajch'ojirisaj ronojel samajibel ri xerutz'ilobisaj kan ri rey Acaz; y wakami ek'o chik chuwech ri porobel richin ri Jehová.

²⁰K'ari' ri rey Ezequías nimaq'a' yan xyakatej richin xerumol konojel achi'a' ri k'o más kiq'ij richin ri tinamit ri', y xebe pa rachoch ri Jehová.

²¹Xekik'uaj k'a wuqu' nima-alaji' achija' taq wákix, wuqu' achija' karne'l, wuqu' alaji' taq karne'l y wuqu' achija' tzuntzun, richin nikisuj richin nikuyutej kimak ri winaqi' aj pa rachoch ri rey, ri winaqi' aj-Judá y richin nich'ajch'ojir ri jay richin ri Jehová. K'ari' ri rey xubij chike ri e sacerdote ri e rijatzul kan ri Aarón chi kekisuju' ri chikopi' ri' chuwech ri porobel richin ri Jehová.

²²K'ari' ri e sacerdote xekikamisaj ri wákix ri', y xkik'ul k'a ri kik' y xkikiraj chuxikin ri porobel. Chuqa' keri' xeban chike ri achija' karne'l y chuqa' chike ri ch'aqa' chik karne'l.

²³K'ari' xe'uk'uex-apo ri achija' tzuntzun richin xesuj chuwech ri Dios richin nikuyutej kimak ri rey y konojel ri ruwinaq. Rije' xkiya' k'a kiq'a' pa kiwi' re taq chikopi' re'.

²⁴Y k'ari' ri e sacerdote xekikamisaj-qa ri chikopi' y ri kikik'el xkiya' pa ruwi' ri porobel richin xkuyutej kimak. Y keri' ri Jehová xuk'en chik kiwech jun bey konojel israelita, roma ri rey xubij chi ri chikopi' ri' yeporox richin nikuyutej kimak konojel israelita.

²⁵Chuqa' ri Ezequías xeruya' pa rachoch ri Jehová, ri e levita richin xkiq'ojomaj jalajoj ruwech taq q'ojom: Ri platillo, ri salterio y ri arpa. Keri' xuben roma ri Dios kan keri' ri xubij kan chike ri David, chire ri Gad ri nitz'eton ri peteneq, y chire ri Natán ri q'alajirisey ruch'abel ri Dios.

²⁶Ri e levita e pa'el chiri' y kik'ualon pa kiq'a' ri q'ojom ri richin kan ri David; y ri e sacerdote chuqa' kik'uan ri ki-trompeta.

²⁷K'ari' ri Ezequías xubij chi tisuj ri chikop ri niporox chijun pa ruwi' ri porobel. Y toq xchap ruporoxik ri chikop, chuqa' jari' toq xchap rubixaxik ri bix richin niya'ox ruq'ij ri Jehová, y chuqa' xexupux ri trompeta e rachibilan ri ruq'ojom kan ri rey David.

²⁸Konojel k'a ri winaqi' xkiqasaj-ki' k'a pan ulew richin xkiya' ruq'ij ri Dios rokik ri bixanela' yebixan, y ri e sacerdote nikixupuj trompeta. Ronojel re' xtane', k'a toq xk'is na ri chikop ri xporox jumul pa ruwi' ri porobel.

²⁹Toq xk'is ronojel re', ri rey y konojel ri e rachibilan xexuke-qa richin xkiya' ruq'ij ri Dios.

³⁰Chirij re' ri rey y ri e tata'al xkibij chike ri e levita richin tikiya' ruq'ij ri Jehová rik'in bix ri rubanon kan ri David y ri Asaf ri nitz'eton ri peteneq. Y rije' kan xkiben rik'in janila kikoten y chuqa' xexuke' richin xkiya' ruq'ij ri Dios.

³¹K'ari' ri Ezequías xubij: Rix ix ch'ajch'oj chik chuwech ri Jehová; wakami k'a kixanpe richin nisuj kamelabel richin matioxinik chire ri Jehová, pa rachoch, xcha'. Y ri winaqi' kan keri' xkiben, y chuqa' konojel ri k'o kikoten pa taq kánima xekik'en-pe chikopi' richin xeporox chijun.

³²Y jare' k'a ri kajlabal ri chikopi' ri xekik'en-pe ri winaqi' richin xeporox chijun: oxk'al lajuj bóyix, wok'al achija' karne'l, y 200 alaji' taq karne'l. Ronojel k'a re' richin xeporox chijun chuwech ri Jehová.

³³Y ronojel k'a ri ch'aqa' chik sipanik ri xeya'ox-apo, e 600 wákix y 3,000 karne'l.

³⁴Jak'a ri e sacerdote e juba' ok y man yeruben ta richin yekichojmirisaj konojel ri chikopi' richin yeporox. Roma ri' k'o chi xeto'ox koma ri ch'aqa' chik levita k'a toq xk'achoj na ri samaj, rokik ri ch'aqa' chik e sacerdote xkich'ajch'ojirisaj-ki'. Kere' xbanatej roma ri e levita k'o más rayibel kik'in richin xkich'ajch'ojirisaj-ki' chikiwech ri e sacerdote.

³⁵Y pa kiwi' chik ri chikopi' richin yeporox chijun, chuqa' k'o pa ruk'iyal ri kiq'anal chikopi' richin ri sipanik ri nuq'alajirisaj chi junan kiwech rik'in ri Jehová, y chuqa' ri sipanik richin vino ri xya'ox chikij ri poron chikopi'. Kan keri' k'a xbanatej toq xtikeribex chik el jun bey ri rusamajixik ri Jehová richin niya'ox ruq'ij pa rachoch.

³⁶Y ri Ezequías y konojel ri winaqi' kan janila k'a xekikot, roma ri Dios xeruto' richin chi'anin xek'achoj chujosq'ixik chijun ri rachoch.