Read Kaqchikel 2 Crón 3 Bible Online

2 Crón 3 - Kaqchikel bible

2 Crón 3

¹Ri Salomón xuchop richin nupaba-q'anej ri rachoch ri Jehová pa Jerusalem chiri' pa juyu' Moria, akuchi xuk'ut-wi-ri' ri Jehová chuwech ri David ri rutata', chupan ri era richin kan ri Ornán ri aj-Jebús. Y ri ulew ri' kan ruchojmirisan chik kan ri David.

²Chupan k'a ri ruka'n q'ij chire ri ruka'n ik' chire ri rukaj juna' chire ri q'atbel-tzij richin ri Salomón, jari' toq xuchop richin nupaba-q'anej ri rachoch ri Dios.

³Jare' k'a ri retabal ri rachoch ri Dios ri xuben ri Salomón: waqlajuj jaj ri raqen y wo'o' jaj rik'in nik'aj ri ruwech.

⁴Ri corredor ri k'o pan okibel chire ri rachoch ri Dios k'o k'a wo'o' jaj rik'in nik'aj ri ruwech, junan rik'in ri ruwech ri jay, y ri rujotolen chuqa' k'o wo'o' jaj rik'in nik'aj. Y rija' kan xutz'apej k'a rij rik'in q'anapueq ri jebel ch'ajch'oj ronojel ruwech ri jay ri',

⁵y chupan apo ri nima-jay, xeruya' tz'alem ri banon rik'in k'isis, y chuwech k'a ri tz'alem ri' ya'on q'anapueq. Rija' xerubanala' k'a kiwachibel palmera y cadena chuwech ri rupan ri jay.

⁶Chuqa' xeruwiq rik'in jebelej taq abej, y ja ri q'anapueq ri jebel ch'ajch'oj ri xukusaj ri nilitej pa ruwach'ulew rubini'an Parvaim.*f1*

⁷Xuya' k'a q'anapueq chupan chijun ri rupan ri jay, ri tem, ri palibel richin ri okibel, ri ruwech ri tz'aq, ri ruchi-jay, y chuqa' xeruben kiwachibel querubín e k'oton chuwech ri jay.

⁸Chuqa' xuben ri jay ri akuchi nik'oje-wi ri Jehová, y ri raqen, xuya' wo'o' jaj rik'in nik'aj, keri' chuqa' ri ruwech, wo'o' jaj rik'in nik'aj; y k'ari' xutz'apej-rij rik'in q'anapueq y richin ri' xukusaj jubama 450 quintal.

⁹Ri clavo ri xerukusaj yepajon más juba' jujun libra chikijujunal. Xutz'apej k'a ruwech ri rupan ri jay rik'in q'anapueq, y keri' chuqa' ri chikaj.

¹⁰Chupan ri akuchi nik'oje-wi ri Jehová, xeruya' kiwachibel ka'i' querubín banon rik'in che', y keri' chuqa' xutz'apej-kij rik'in q'anapueq.

¹¹Ri raqen ri kixik' ri querubín ka'i' jaj rik'in oxi' q'a'aj y ri kipalen chikijujunal jun jaj rik'in wo'o' q'a'aj. Ri kixik' napon k'a chuwech ri tz'alem richin ri jay, y ri jun chik kixik' nutun ri' pa nik'aj chire ri jay. Ri querubín ri' kan choj k'a yetzu'un chuchi' ri jay.

¹⁴Chuqa' xuben ri tasbel rupan ri jay rik'in tzieq lino, y xukusaj ri betz' raxroj, q'eqq'oj-keq y keq yetzu'un, y xerutz'is k'a kiwachibel querubín chuwech.

¹⁵K'ari' ri Salomón xuben ka'i' pilar richin ri chuwech ri jay y beleje' jaj rik'in oxi' q'a'aj ri kijotolen chikijujunal y ri ketz'aba'l ruwi' ri pilar jun jaj rik'in ka'i' q'a'aj.

¹⁶Chuqa' xuben cadena achi'el ya'l y xeruya' pa kiwi' ri pilar. Chuqa' xeruben kiwachibel wok'al granada richin xuya' chukojol chikijujunal ri cadena.

¹⁷Y xerupaba' k'a q'anej ri pilar chuwech ri rachoch ri Dios, y toq e ruya'on chik pa kik'ojelibal xuya' kibi' ri pilar: Ri pilar ri k'o pa xaman xubini'aj Jaquín,*f2* y ri pilar ri k'o pa xokon xubini'aj Bóaz.