Read Kaqchikel 2 Crón 34 Bible Online

2 Crón 34 - Kaqchikel bible

2 Crón 34

¹Ri Josías k'o k'a waqxaqi' rujuna' toq xuchop nuq'et-tzij pa ruwi' ri ajawaren richin Judá chiri' pa Jerusalem, y juwineq julajuj juna' xuq'et-tzij.

²Rija' kan utz k'a xuben chuwech ri Jehová, y kan xuben achi'el xuben ri David; kan man xujech'ej ta kan ri' ni pa rijkiq'a' ni pa rajxokon.

³Chupan k'a ri waqxaqi' juna' chire ri ruq'atbal-tzij, rija' kan k'a ala' na. Man rik'in ri', kan xukanoj k'a ri ru-Dios ri David ri rumama'. Y chupan k'a ri kablajuj juna' chire ri ruq'atbal-tzij xuchop rujosq'ixik ri tinamit Jerusalem y chijun ri Judá, chire ri akuchi nikiya-wi kiq'ij ri wachibel ri pa ruwi' taq juyu', ri paban-che' richin Asera, ri wachibel e paban y ri wachibel ri e ya'erisan pa q'aq'.

⁴Y xeruwulaj k'a el ri porobel kichin ri Baal, y xeruk'ajij ri porobel-pom ri e ya'on pa ruwi' ri porobel ri'. Chuqa' xerupaxij ri paban-che' richin ri Asera, ri ch'aqa' chik wachibel ri e paban, y ri wachibel ri e ya'erisan pa q'aq'. Ronojel re' kan xuben k'a poqolaj chike, y k'ari' xberujopij kan pa kiwi' ri akuchi e muqun-wi ri winaqi' ri xesuju kamelabel chiri'.

⁵Chuqa' xberuk'ama-pe ri kibaqil ri e sacerdote kichin ri wachibel, y kan xeruporoj pa kiwi' ri kiporobal richin xuch'ajch'ojirisaj ri tinamit Jerusalem y chijun ri Judá.

⁶Chuqa' keri' xuben chupan ri tinamit ri ek'o pa ruwach'ulew kichin ri e rijatzul ri Manasés, ri Efraín y ri Simeón, y xapon k'a rik'in ri ruwach'ulew kichin ri e rijatzul ri Neftalí, y chuqa' ronojel ri akuchi tolan tolan chik richin ri ruwach'ulew ri'.

⁷Y xeruwulaj k'a kan ronojel porobel, ronojel ri paban-che' richin ri Asera y ronojel ri ch'aqa' chik wachibel e paban. Ronojel re' xeruk'ajij kan y xuben poqolaj chike. Keri' chuqa' xeruwulaj kan ronojel ri porobel-pom. Y chirij ronojel re' xtzolin pa Jerusalem.

⁸Chupan k'a ri waqxaqlajuj juna' chire ri q'atbel-tzij richin ri Josías, toq xuch'ajch'ojirisaj yan ri ruwach'ulew y ri rachoch ri Jehová, jari' toq xeruteq-el ri Safán ruk'ajol ri Asalías, ri Amasías ri aj-raqen pa ruwi' ri tinamit Jerusalem, y ri aj-tz'ib rubini'an Joah ruk'ajol ri Joacaz, richin tibekichojmirisaj ri rachoch ri Jehová ri Dios.

⁹Rije' xebe rik'in ri nimalej sacerdote Hilquías richin xbekijacha' y richin niyak kan chiri' ri méro ri xkimol ri e levita ri e chajiy ruchi' ri rachoch ri Jehová. Y ri méro ri' xkimol-pe pa kiruwach'ulew ri aj-Manasés, aj-Efraín y kik'in ri ch'aqa' chik winaqi' ri k'a ek'o kan pan Israel, y chuqa' kik'in konojel aj-Judá, ri aj-Benjamín y ri aj-Jerusalem.

¹⁰Chirij re, ri méro ri yakon kan xjach k'a pa kiq'a' ri e aj-raqen pa ruwi' ri samaj chupan ri rachoch ri Jehová. Y ri e aj-raqen rik'in re méro re' xekitojbej-wi ri yechojmirisan ri rachoch ri Jehová.

¹¹Chuqa' rik'in re méro re' ri ajanela' y ri e choyoy abej xkiloq' abej y che' ri nima'q kaqen richin niya'ox pa ruwi' ri rachoch ri Dios, roma xa kan ronojel yojon kan koma ri rey e richin Judá ri e eleneq-el.

¹²Y re achi'a' re' kan jebel xesamej. Y ri ek'o pa kiwi' rije' ja ri e levita ri Jáhat, ri Abdías e rijatzul kan ri Merarí, ri Zacarías y ri Mesulam; konojel rije' e rijatzul kan ri Quehat. Y chuqa' ek'o ch'aqa' chik levita ri kan e aj-na'oj richin nikiq'ojomaj jalajoj ruwech q'ojom.

¹³Ja rije' ri ek'o pa kiwi' ri ye'ejqanej, y chuqa' pa kiwi' ri ch'aqa' chik samajela'. Chikikojol ri e levita ri' ek'o k'a aj-tz'ib, aj-raqen pa ruwi' ri ruwach'ulew y chajinela'.

¹⁴Ja k'a toq xbekelesaj-pe ri méro ri yakon kan pa rachoch ri Jehová, jari' toq ri sacerdote Hilquías xberila-pe jun wuj ri akuchi tz'ibatel kan ri rupixa' ri Jehová ri ruya'on kan chire ri Moisés.

¹⁵Y toq xunabej ri Hilquías chi ri wuj ri' kan richin ri rupixa' ri Dios, xubij chire ri aj-tz'ib rubini'an Safán: Yin xinwil wawe' jun wuj richin ri rupixa' ri Jehová, xcha'. Y kan xuya' k'a apo chire.

¹⁶Y ri Safán xuk'uaj-el re wuj re' rik'in ri rey, y xubij chire: Ri e tata'al kan xkiben yan ronojel ri samaj ri abin chike.

¹⁷Ri méro ri yakon pa rachoch ri Jehová xelesex yan pe y xjach yan pa kiq'a' ri aj-raqen pa kiwi' ri yesamej chiri' pa rachoch ri Dios, xcha'.

¹⁸Chirij ri' k'ari' xuq'alajirisaj-apo chire ri rey chi ri sacerdote Hilquías xuya' jun wuj chire, y xusik'ij-apo chuwech ri nubij ri wuj ri'.

¹⁹Y toq ri rey xrak'axaj ri nubij ri pixa', jari' toq xuretz ri rutziaq chirij,

²⁰y xuteq-el ri Hilquías, ri Ahicam ri ruk'ajol ri Safán, ri Abdón ri ruk'ajol ri Micaías, ri Safán ri aj-tz'ib y ri Asaías jun chike ri tata'al, y xubij-el chike:

²¹Kixbiyin; ja tibek'ulubej ri Jehová pa nuwi' yin y pa kiwi' ri winaqi' ri k'a ek'o kan pa ruwach'ulew Israel y pa ruwach'ulew Judá. Tik'utuj chire achike nel chitzij re nubij re wuj re xinwil, roma ri royowal ri Jehová kan nim wi ri xqaqa pa qawi'. Ronojel re' xa roma k'a ri qati't-qamama' man xkitaqej ta ri xubij ri Jehová, y kan man xkiben ta achi'el ri tz'ibatajineq kan chupan re wuj, xcha'.

²²Ri Hilquías y ri xecha'ox-el roma ri rey xebe k'a rik'in ri jun ixoq q'alajirisey ruch'abel ri Dios. Ri ixoq ri' rubini'an Huldá, rixjayil ri Salum ri ruk'ajol ri Ticvá, ri ruk'ajol kan ri Harhás. Y ri Salum ja rija' ri nichajin ri tzieq ri ek'o chiri' pa rachoch ri Dios. Ri rachoch ri Huldá k'o k'a chiri' ri akuchi nibix Ruka'n Tanaj chire, richin ri tinamit Jerusalem.

²³Y toq xkibij-apo ri bin-el chike, rija' xubij: Ri Jehová ri qa-Dios nubij chi kere' tibij chire ri ix taqayon-pe:

²⁴Yin Jehová ninbij chi xtinteq-pe jun nimalej ruk'ayewal pa ruwi' re tinamit re' y pa kiwi' konojel ri winaqi' ri ek'o chupan, kan achi'el k'a ri itzel oyonik ri tz'ibatajineq kan chupan ri wuj ri xril, ri xsik'ix chuwech ri rey richin Judá.

²⁵Roma ri winaqi' xa xinkimalij kan, y xa xkisuj kamelabel chikiwech ch'aqa' chik dios, y xkiben chuwe chi xpe woyowal chirij ronojel ri kisamaj ri kibanon; roma ri' xtiqaqa k'a ri woyowal pa ruwi' re tinamit re', y ri woyowal kan man xtik'o ta qa, nicha' ri Jehová.

²⁶Kere' k'a xtibij chire ri rey richin ri Judá, ri ix taqayon-pe richin no'ik'ulubej-el ri Jehová: Ri Jehová Dios richin Israel nubij chi roma kan xawak'axaj ri k'o kan chupan ri wuj,

²⁷y kan xsilon ri awánima y xaqasaj-awi' toq xawak'axaj ri nubij pa ruwi' re tinamit y pa kiwi' ri winaqi'; y roma kan xaqasaj-awi' chinuwech, xaretz ri atziaq chawij y janila xatoq' chinuwech; yin kan xatinwak'axaj yan k'a.

²⁸Jak'a rat kan man xtatz'et ta k'a el ri ruk'ayewal ri xtinteq-pe pa ruwi' re ruwach'ulew re' y pa kiwi' ri winaqi', roma xa kan xtinben k'a chi xkaken-el rik'in uxlanibel-k'u'x, y xkamuq kik'in ri awati't-amama'; jare' ri nubij ri Jehová, xcha' ri Huldá. K'ari' ri e rutaqon-el ri rey xetzolin, y xbekibij chire ronojel ri xbix-el chike.

²⁹K'ari' ri rey xuben jun molojri'il y xuteq koyoxik konojel achi'a' ri k'o kiq'ij ri ek'o pa Judá y pa Jerusalem.

³⁰Ri rey y konojel re achi'a' re', e kachibilan konojel ri winaqi' aj-Jerusalem, ri e sacerdote y ri e levita richin chijun ruwach'ulew; konojel rije' xebe pa rachoch ri Jehová. Y chiri' xbesik'ix-wi chikiwech ri tz'ibatajineq kan chupan ri wuj richin ri pixa' ri xilitej chupan ri rachoch ri Dios.

³¹K'ari' ri rey xbepa'e' rik'in ri pilar ri akuchi nipa'e-wi jantape' richin xujikiba' rutzij chuwech ri Jehová. Xujikiba' k'a chi kan choj xtibebiyin chuwech y kan rik'in ronojel ránima y ronojel ruk'u'x xtutaqej ronojel ri rupixa' ri ruya'on chire ri tinamit, y kan xtuben k'a achi'el ri tz'ibatajineq kan chupan ri wuj ri'.

³²Chirij re', k'ari' xuben chi konojel ri winaqi' ri ek'o chiri' pa Jerusalem y ri aj-Benjamín, chi kan tikijikiba' kitzij chuwech ri ki-Dios, y ri ki-Dios ri kati't-kimama'.

³³K'ari' ri Josías xuben chi chupan chijun ri ruwach'ulew Israel ke'elesex-el ronojel ri yekiya' kiq'ij ri winaqi' ri kan man niqa' ta chuwech ri Jehová, y xuben chi konojel tikisamajij xaxe ri Jehová ri ki-Dios. Rokik k'es ri Josías, ri winaqi' kan man xkijech'ej ta kan ki' rik'in ri Jehová ri ki-Dios, y ri Dios kichin ri kati't-kimama'.