Read Kaqchikel Esd 3 Bible Online

Esd 3 - Kaqchikel bible

Esd 3

¹Y toq xapon k'a ri ruwuq ik' chire ri juna' ri', toq kan konojel ri winaqi' ri xe'apon chiri' y jikil chik ek'o pa taq kitinamit, jari' toq konojel ri winaqi' israelita xbekimolo' k'a ki' chiri' pa Jerusalem.

²K'ari' ri Josué ruk'ajol ri Sadoc, ri e sacerdote ri e rachibil, ri Zorobabel ruk'ajol ri Salatiel y ri e rach'alal; konojel rije' xkipaba' chik q'anej ri porobel richin ri ki-Dios, richin nikiporoj chikop pa ruwi', achi'el tz'ibatel kan chupan ri pixa' ri xya'ox chire ri Moisés ri xok rusamajel ri Dios.

³Stape' kixibin-ki' chikiwech ri winaqi' ri ek'o chikinaqaj, rije' xkiben chik q'anej jun bey ri porobel pa ruwi' ri ruch'okolibal ri k'o kan. Y xkichop chik nikiporoj chikop pa ruwi' ri porobel ronojel nimaq'a' y tiqaq'ij, richin nikiya' ruq'ij ri Jehová.

⁴Y chuqa' kan xkinimaq'ijuj ri nimaq'ij richin taq jay ri e banon rik'in ruq'a-che', achi'el ri tz'ibatel kan. Y xkiporoj chikop richin kamelabel ronojel q'ij achi'el ri k'o chi nikiben.

⁵Y man xaxe ta k'a keri', xa kan jantape' xkiporoj ri chikop ri richin q'ij-q'ij, ri nimaq'ij richin toq nalex ri ik' y ri ch'aqa' chik nimaq'ij toq nikiya' ruq'ij ri Jehová. Y chirij k'a ronojel re' xkisuj kamelabel rik'in ronojel kánima.

⁶Y keri' chupan k'a ri nabey q'ij richin ri ruwuq ik', xkichop richin nikiporoj chikop chuwech ri Jehová pa ruwi' ri porobel, stape' ri ruch'okolibal ri rachoch ri Jehová kan man jani k'a tiya'ox-qa.

⁷Y xkiya' k'a méro chike ri aj-tz'aq y chike ri ajanela' ri xkebesamej. Y chuqa' xkiya' kiway-kuk'ya' y aceite, chike ri aj-Sidón y ri aj-Tiro, richin chi nikik'en-pe tiox-che' k'a pa Líbano y nikik'uaj k'a pa Jope pa ruwi' ya'. Y ronojel re' xban roma ri Ciro, rey richin Persia, kan xuya' q'ij chike.

⁸Chupan ri ruka'n ik' chire ri ruka'n juna' toq xetzolin pa Jerusalem, jari' toq xkimol-ki' ri Zorobabel ruk'ajol ri Salatiel, y ri Josué ruk'ajol ri Josadac y ri e sacerdote, ri e levita ri e kachibil toq xetzolin. Rije' xekiya' ri e levita ri k'o chik juwineq kijuna', richin yek'oje' pa ruwi' ri samaj richin xkiben-q'anej ri rachoch ri Jehová. Rije' y konojel ri ch'aqa' chik winaqi' ri xetzolin-pe xkichop chik q'anej rupabaxik ri rachoch ri Dios.

⁹Y keri' ri Josué, ri Cadmiel y ri Henadad, y konojel ri e kalk'ual y ri e kach'alal, konojel e levita, xeya'ox pa ruwi' ri samaj ri'.

¹⁰Toq ri samajela' xek'achoj richin xkiya-qa ri ruch'okolibal ri rachoch ri Jehová, jari' toq ri e sacerdote xek'oje' chiri' richin xkiya' ruq'ij ri Jehová, achi'el ri pixa' ri xuya' kan ri David, rey richin Israel. Ri e sacerdote xkikusaj ri kitziaq ri kan ch'aron, y kik'uan ki-trompeta. Y ri e levita ri e rijatzul ri Asaf kik'uan platillo.

¹¹Y rije' nikibixaj re bix re': Niqamatiox chire ri Jehová, roma rija' kan janila utz, roma beneq ruwech nujoyowaj qawech roj ri oj aj-Israel. Y ri rujoyowanik kan richin q'asen, xecha'. Y chijun ri tinamit nisik'in roma kikoten y kan nikiya' ruq'ij rija', roma kan xya'ox yan qa ri ruch'okolibal ri rachoch ri Jehová.

¹²Jak'a e k'iy chike ri rijita'q taq sacerdote, levita y ri aj-raqen kichin ri winaqi', ri kan kitz'eton ri nabey rachoch ri Jehová Dios; toq nikitz'et chi xkichop chik q'anej ri rachoch ri Dios, rije' rik'in uchuq'a' xe'oq' roma bis. Y kan keri' k'a chuqa' e k'iy ri kan yesik'in roma kikoten.

¹³Y ri winaqi' man k'a yetikir ta nikiya' ri rukojolil ri oq'ej richin bis o richin kikoten, roma ri winaqi' kan janila raqoj-chi'ij ri nikiben. Y kan janila nej nak'axatej-wi.