Read Kaqchikel Esd 4 Bible Online

Esd 4 - Kaqchikel bible

Esd 4

¹Toq ri achi'a' ri e etzelanel kichin ri aj-Judá y ri aj-Benjamín xkak'axaj chi rije' nikipaba' chik q'anej ri rachoch ri Jehová, ri ki-Dios,

²jari' toq xebe rik'in ri Zorobabel y kik'in ri e aj-raqen kichin ri winaqi' y xkibij chike: Tiya' q'ij chiqe richin yixqato', roma roj chuqa' niqakanoj ri i-Dios rix. Y chuqa' kan jantape' qasujun-pe kamelabel chire ri Dios, chupan-pe ri q'ij toq xojoqaqa wawe', toq xojruteq-pe ri Esarhadón rey richin Asiria, xecha'.

³Jak'a ri Zorobabel, ri Josué y ri ch'aqa' chik aj-raqen xkibij chike: Man ruk'amon ta richin niqapaba-q'anej ri rachoch ri Dios junan iwik'in rix. Kan qayon roj xtiqapaba-q'anej ri rachoch ri Jehová, ri qa-Dios, roma kan keri' xubij chiqe ri Ciro rey richin Persia, xecha'.

⁴K'ari' ri etzelanel kichin xkiben chike ri winaqi' aj-Judá chi xmayamo-qa ri kánima, y chuqa' xkiben chike chi xpe xibinri'il chike richin man nikipaba' ta chik q'anej ri rachoch ri Jehová.

⁵Xekipuaqij k'a jujun achi'a' ri ek'o pa q'atbel-tzij, richin chi tikibana' chike ri winaqi' ri xetzolin-pe chi tikimalij kik'u'x y man nikiben ta q'anej ri samaj. Keri' k'a xkiben ri winaqi' ri' janipe' xq'aton-tzij ri rey Ciro y chuqa' toq xq'aton-tzij ri Darío rey richin Persia.*f1*

⁶Y toq k'iy yan juna' tiq'ax kan richin nuq'et-tzij ri Darío, jari' toq xuchop nuq'et-tzij ri rey Asuero. Y chupan ri q'ij ri' xban k'a jun sujunik chikij ri winaqi' aj-Jerusalem y ri aj-Judá.

⁷Y toq q'axineq chik k'a k'iy juna', toq niq'aton-tzij ri rey Artajerjes ri chiri' pa ruwach'ulew Persia, jari' toq ek'o jujun aj-raqen aj-Persia ri ek'o chiri' pan Israel, ri kibini'an Bislam, Mitrídates y ri Tabeel. Y rije' y ri ch'aqa' chik kachibil xkitz'ibaj jun wuj chire ri rey ri', y ri wuj ri' pa ch'abel arameo xkitz'ibaj-wi.

⁸Chuqa' jun aj-raqen pa kiwi' ri aj-labal rubini'an Rehúm, y jun aj-tz'ib rubini'an Simsai xkitz'ibaj jun chik wuj chire ri rey, ri nich'on itzel chikij ri winaqi' aj-Jerusalem.

⁹Y toq ri Rehúm y ri Simsai xkitz'ibaj ri wuj ri', chuqa' kan ek'o chik ch'aqa' winaqi' ri xkitz'ibaj-el: Ri ch'aqa' chik e kachibil, ri to'onela', ri ch'aqa' chik aj-raqen pa kiwi' ri winaqi' ri e apowineq chiri' pa Persia, pan Erec, pa Babilonia, pa Susa, pan Elam,

¹⁰y ri ch'aqa' chik winaqi' ri xeruk'en-pe ri rey Asnapar ojer kan toq xuben chike chi xek'oje' pa tinamit Samaria y ri ch'aqa' chik taq tinamit ri ek'o pa qajbel-q'ij chire ri raqen-ya' Éufrates.

¹¹Y ja wuj re' ri xkiteq-el y kere' nubij: Niqateq rutzil awech rat rey Artajerjes. Roj ri oj asamajela' ri ojk'o wawe' pa qajbel-q'ij chire ri raqen-ya' Éufrates.

¹²Niqaq'alajirisaj chawe rey, chi ri judío ri xe'el-pe pan aruwach'ulew, ri xepe chik wawe' pa Jerusalem nikich'ob nikipaba' chik q'anej jun bey ri nimalej tinamit ri'. Y rije' janila e itzel y kan nikajo' yeyakatej chawij, y roma ri' nikiben ruchojmil ri ruxe' y xkichop yan q'anej rubanik ri tz'aq.

¹³Wakami k'a rey, tawetamaj chi wi ri tinamit xtiyak chik q'anej, y ri tz'aq xtipabex chik el jun bey, man xtikitoj ta chik ri kan k'o chi nikitoj chawe: Ri nitoj roma ri ulew, ri jay y ri nitoj roma ri k'ayij; y keri' kan xtik'is k'a qa ri abeyomel.

¹⁴Y roma kan yojsamej awik'in, kan man ruk'amon ta k'a chi choj yeqatzu' ri nikiben. Y roma ri' niqateq-el rubixik chawe,

¹⁵richin chi titz'et chupan ri wuj ri akuchi tz'iban-wi ri xbanatej kik'in ri ate-atata'. Y chiri' xtatz'et chi rije' kan jun tinamit ri k'o yakatajinenri'il kik'in, y kan e banoy ch'a'oj chike ri e rey y chike ri ch'aqa' chik tinamit. Y ojer kan, xkimol-ki' y xeyakatej chirij ri q'atoy-tzij y roma ri' kan xk'is ri kitinamit Jerusalem.

¹⁶Roma ri' niqabij chawe, wi re tinamit re' xtipabex chik q'anej jun bey, y xtik'achoj-q'anej ri tz'aq, ri ruwach'ulew ri k'o wawe' pa qajbel-q'ij chire ri raqen-ya' Éufrates kan man xtok ta chik awichin rat.

¹⁷K'ari' ri rey Artajerjes xuteq rubixik chike: Ri Rehúm ri aj-raqen pa kiwi' ri aj-labal, y chuqa' chire ri Simsai ri aj-tz'ib y chike ri e kachibil ri ek'o pa Samaria y ri ch'aqa' chik tinamit ri ek'o pa qajbel-q'ij chire ri raqen-ya' Éufrates. Ja ri raxnaqil y ri uxlanibel-k'u'x tik'oje' iwik'in.

¹⁸Ri wuj ri xiteq-pe chuwe kan xq'axex chinuwech pa nuch'abel.

¹⁹Roma ri' xinbij chi titz'et ri wuj akuchi tz'iban-wi ri xbanatej, y kan xilitej chikij chi ri tinamit ri' kan k'iy mul xeyakatej chikij ri ch'aqa' chik rey.

²⁰Y kan xek'oje' rey pa Jerusalem, ri kan janila kiq'ij, ri xek'oje' pa ruwi' ri ruwach'ulew ri k'o pa qajbel-q'ij chire ri raqen-ya' Éufrates. Y chike k'a rije' xtoj-wi ri méro ri kan k'o chi nitoj chire ri rey: Ri nitoj roma ulew, ri jay y ri nitoj roma ri k'ayij.

²¹Roma ri', tibij chike ri winaqi' ri' chi man chik tikiben ri samaj ri', y kan k'a xtinbij na yin, k'ari' xtiban chik q'anej.

²²Y kan titz'eta' k'a jebel, roma wi chaq k'a nikiben re samaj re' kan k'iy ruk'ayewal xtipe pa qawi' roj, xcha-el.

²³K'ari' ri wuj ri taqon-el roma ri rey Artajerjes xq'axex chikiwech pa kich'abel ri Rehúm, ri Simsai ri aj-tz'ib y ri e kachibil, jari' toq xebe k'a chi'anin pa Jerusalem kik'in ri judío. Y rik'in uchuq'a' xkiben chike chi tikitanaba' kan ri samaj ri'.

²⁴Rokik ri rey Darío k'a k'es na y chupan ri ruka'n juna' chire ri ruq'atbal-tzij, ri judío xkichop chik rubanik ri samaj ri kichapon chire ri rachoch ri Dios chiri' pa Jerusalem.