Read Kaqchikel Esd 5 Bible Online

Esd 5 - Kaqchikel bible

Esd 5

¹K'ari' xeyakatej ri e q'alajirisey ruch'abel ri Dios ri kibini'an Hageo y Zacarías ri ruk'ajol ri Idó. Rije', pa rubi' ri Dios richin Israel ri k'o pa kiwi', xkiya' kan uchuq'a' chike ri judío ri ek'o pa Jerusalem y chuqa' ri ek'o pa Judá.

²K'ari' ri Zorobabel ruk'ajol ri Salatiel, y ri Josué ruk'ajol ri Josadac, xkichop chik q'anej ri samaj richin xkipaba-q'anej ri rachoch ri Dios ri k'o pa Jerusalem; y ri q'alajirisanela' ri' ek'o k'a kik'in rije' richin yekito'.

³K'ari' xapon kik'in ri Tatenai ri q'atoy-tzij pa ruwi' ri ruwach'ulew ri k'o pa qajbel-q'ij chire ri raqen-ya' Éufrates, y ri Setar-boznai y ri e kachibil; y kere' k'a xubij chike ri judío: ¿Achike k'a xya'on q'ij chiwe richin chi nipaba' chik q'anej re jay re' y kan jebel niwiq?

⁴¿Achike kibi' re achi'a' re yebanon re samaj re'?, xecha'.

⁵Jak'a ri Dios kan e ruchajin ri aj-raqen kichin ri judío, y ri etzelanel kichin kan man xetikir ta k'a xekiq'et. Y kan xesamej rokik taqon-el rubixik chire ri rey Darío, y k'a ja toq xkik'ul ri rutzijol.

⁶Ja wuj re' ri xkiteq-el ri Tatenai, ri q'atoy-tzij pa ruwi' ri ruwach'ulew ri k'o pa qajbel-q'ij chire ri raqen-ya' Éufrates, y chuqa' ri Setar-boznai y ri e kachibil.

⁷Xkiteq k'a ri wuj chire ri Darío, y kere' ri xkitz'ibaj-el chupan: Niqarayibej chawe rey Darío chi k'o ta uxlanibel-k'u'x awik'in.

⁸Niqaq'alajirisaj chawe rey, chi xojbe pa Judá pa rachoch ri nimalej ki-Dios ri aj-Israel. Jari' toq xqatz'et chi nipabex-q'anej rik'in nima'q taq abej, y ri che' e ya'on chik apo chirij ri tz'aq. Y ri samaj kan chi'anin nikiben, y kan janila nibiyin chikiwech.

⁹Y roj xqak'utuj chike ri aj-raqen ri achike k'a yoyon q'ij chike chi tikipaba-q'anej re jay re'.

¹⁰Y chuqa' xqak'utuj ri kibi' ri achi'a' ri ek'o pa kiwi' ri samajela' richin re samaj re', richin chi niqabij chawe.

¹¹Y ri aj-Judá xkibij chiqe chi rije' e samajela' richin ri Dios rajaw ri kaj y ri ruwach'ulew. Y nikipaba' chik q'anej ri rachoch rija', ri k'iy yan juna' paban-q'anej roma jun nimalej rey richin Israel.

¹²Xkibij chuqa' chi roma ri kati't-kimama' xkiyek royowal ri Dios, y roma ri' rija' xerujech pa ruq'a' ri Nabucodonosor aj-Caldea, rey richin Babilonia. Ja rija' xwulan ri jay ri', y k'ari' xeruk'uaj-el ri winaqi' pa Babilonia.

¹³Jak'a chupan ri nabey juna' richin ri q'atbel-tzij richin ri Ciro, rey chuqa' pa ruwi' ri Babilonia, rija' xubij richin chi tiban chik q'anej jun bey ri rachoch ri ki-Dios.

¹⁴Chuqa' xrelesaj-pe pa rachoch ri ki-dios ri aj-Babilonia, ronojel ri samajibel ri banon rik'in q'anapueq y saqipueq ri e richin ri rachoch ri ki-Dios ri judío. Y ri samajibel ri', jari' ri xuk'uaj-el ri Nabucodonosor pa Babilonia. Y ri Ciro ruya'on ri Sesbasar aj-raqen pa ruwi' ri ruwach'ulew Judá, y xujech-el ri samajibel chire

¹⁵richin tuk'uaj-el pa rachoch ri ki-Dios ri k'o pa Jerusalem. Y rik'in re' kan xtipabex chik q'anej jun bey ri jay ri' ri chiri' pa ruk'ojelibal.

¹⁶K'ari' ri Sesbasar xpe y xuteq rubixik chi tiya'ox-qa ri ruch'okolibal ri rachoch ri Dios. Y kan k'ari' ye'ajin chupabaxik re wakami, y man jani tik'achoj-q'anej. Y keri' xkibij ri judío chiqe.

¹⁷Wakami k'a, wi rat rey nawajo', tikanox chupan ri awachoch akuchi e yakel-wi ri beyomel awichin rat, ri k'o chiri' pa Babilonia. Y tatz'eta' wi qitzij chi ri rey Ciro xubij chi tipabex chik q'anej jun bey ri rachoch ri Dios chiri' pa Jerusalem. Y k'ari' xtateq-pe rubixik chiqe achike nanojij pa ruwi' re', xecha-el chire ri Darío.