Read Kaqchikel Esd 8 Bible Online

Esd 8 - Kaqchikel bible

Esd 8

¹Ja kibi' re' ri aj-raqen pa kiwi' ri tzobaj ri xe'el-pe wik'in yin pa Babilonia chupan ri q'atbel-tzij richin ri Artajerjes:

²Guersón ri rijatzul kan ri Finees; Daniel ri rijatzul kan ri Itamar; Hatús ri rijatzul kan ri David

³y ri Secanías; Zacarías rijatzul kan ri Parós e rachibilan e 150 achi'a';

⁴ri Eliehoenai ruk'ajol ri Zeraías, ri rijatzul kan ri Pahat-moab e rachibilan e 200 achi'a';

⁵ri Secanías ruk'ajol ri Jahaziel, ri rijatzul ri Zatú e rachibilan e 300 achi'a';

⁶ri Ébed ri ruk'ajol ri Jonatán, ri rijatzul ri Adín e rachibilan e kawineq lajuj achi'a';

⁷ri Isaías ruk'ajol ri Atalías, ri rijatzul ri Elam e rachibilan e oxk'al lajuj achi'a';

⁸ri Zebadías ruk'ajol ri Micael, ri rijatzul ri Sefatías e rachibilan e jumuch' achi'a';

⁹ri Abdías ruk'ajol ri Jehiel, ri rijatzul ri Joab e rachibilan e 218 achi'a';

¹⁰ri Selomit ruk'ajol ri Josifías, ri rijatzul ri Baní e rachibilan e 160 achi'a';

¹¹ri Zacarías ruk'ajol ri Bebai, ri rijatzul kan ri jun chik Bebai e rachibilan e juwineq waqxaqi' achi'a';

¹²ri Johanán ruk'ajol ri Hacatán, ri rijatzul ri Azgad e rachibilan e 110 achi'a';

¹³ri Elifélet, Jeiel, y Semaías, ja e ruk'isibel e rijatzul kan ri Adonicam e kachibilan e oxk'al achi'a';

¹⁴y ri Utai y Zabud, ri e rijatzul kan ri Bigvai e kachibilan e oxk'al achi'a'.

¹⁵Xenmol k'a chuchi' ri raqen-ya' ri peteneq pa tinamit Ahavá chiri' pa Babilonia, y xojk'oje-qa chiri' oxi' q'ij. Y xinkanoj k'a chikikojol ri nuwinaq y chikikojol ri sacerdote, y man xenwil ta ch'aqa' chik levita.

¹⁶K'ari' xenteq-el ri Eliézer, Ariel, Semaías, Elnatán, Jarib, jun chik Elnatán, Natán, Zacarías y ri Mesulam; konojel ri achi'a' ri' kan k'o janila kiq'ij. Y keri' chuqa' xenteq-el ri Joiarib y jun chik Elnatán, achi'a' ri kan e aj-na'oj.

¹⁷Xenteq-el k'a el rik'in ri Idó, jun aj-raqen ri chiri' chupan ri tinamit Casifiá, y xinbij k'a el chike ri achike ch'abel ri k'o chi nikibij chire ri Idó, y chike ri kijatzul ri samajela' ri xesamej chupan ri rachoch ri Dios, richin chi yekik'en ta pe samajela' ri yesamajin ri Dios ri chiri' pa Jerusalem.

¹⁸Ri rutzil ri Dios k'o pa qawi', y roma ri' xkik'en-pe jun achin ri aj-na'oj rubini'an Serebías. Rija' ruk'ajol ri Mahli, jun chike ri rijatzul ri Leví, ri rijatzul kan ri Israel. Chuqa' xekik'en-pe ri e ruk'ajol y ri e rach'alal; konojel rije' e waqxaqlajuj.

¹⁹Chuqa' xekik'en-pe ri Hasabías, ri Isaías rijatzul ri Merarí, y ri ruk'ajol y ri rach'alal, konojel rije' e juwineq.

²⁰Y chuqa' xekik'en-pe e 220 kijatzul ri samajela' ri xesamej pa rachoch ri Dios, ri xeya'ox ojer kan koma ri David y ri tata'al, richin xe'ok samajela' kichin ri levita. Y k'ari' xtz'ibex kan ri kibi' ri e 220.

²¹Y chiri' chunaqaj ri raqen-ya' Ahavá, xinbij chi tiqach'ara' jun q'ij richin yojmewayin, richin chi niqaqasaj-qi' chuwech ri qa-Dios, y richin niqak'utuj chire chi utz ta yojbe, y keri' ri qalk'ual chuqa', y keri' rik'in chuqa' ri k'o qik'in.

²²Xqaben keri' roma yin kan xik'ix k'a richin nink'utuj chire ri rey, richin yeruteq achi'a' ri yech'oke' chikij kiej, richin chi yojkito' chikiwech ri e etzelanel qichin chupan ri bey. Y chuqa' roma xa kan xqabij yan chire ri rey chi ri Dios kan yojruto' qonojel ri yojkanon richin. Jak'a ri nimalej ruchuq'a' y ri labal kan k'o pa kiwi' ri winaqi' ri nikimalij kan rija'.

²³Roma ri' xojmewayin k'a y xqak'utuj chire ri qa-Dios pa ruwi' ronojel re', y rija' kan xojruk'uluba-pe.

²⁴K'ari' xencha' k'a e kablajuj sacerdote ri k'o más kiq'ij, y chuqa' ri Serebías y ri Hasabías, y e lajuj kach'alal.

²⁵Y xinwetaj k'a ri saqipueq, ri q'anapueq y ronojel ri samajibel ri xkiya-apo ri rey, ri rupixabanela' y ri e tata'al, y konojel israelita ri ek'o-apo chiri', richin niban-q'anej ri rachoch ri qa-Dios.

²⁶Xinwetaj k'a y xinjech-apo chike 490 quintal saqipueq, leq ri banon rik'in saqipueq ri ralal oxk'al wolajuj quintal, oxk'al wolajuj quintal q'anapueq,

²⁷y chuqa' juwineq leq ri banon rik'in q'anapueq ralal más juba' waqxaqlajuj libra y ka'i' samajibel ri banon rik'in q'enq'oj-pueq ri kan jebel banon chire y kan janila rejqalen, y nitzu'un achi'el xa ja ri banon rik'in q'anapueq.

²⁸Y chuqa' xinbij chike: Rix kan ix ch'aron chire ri Jehová y chuqa' re samajibel re', re saqipueq y re q'anapueq. Re sipanik re' kan xkiya' rik'in ronojel kánima chire ri Jehová Dios, ri qa-Dios y ri ki-Dios ri qati't-qamama'.

²⁹Tichajij jebel y tiyaka' k'a, k'a xkixapon na pa Jerusalem. K'ari' xtiwetaj pa rachoch ri Jehová chikiwech ri tata'al kichin ri sacerdote, ri e levita y ri aj-raqen pa kiwi' ri taq tzobaj ri ek'o pa Jerusalem, xicha'.

³⁰Keri' ri e sacerdote y ri e levita xkik'ul ri saqipueq y ri q'anapueq y ri samajibel, richin nikik'uaj pa Jerusalem richin nibekiya' pa rachoch ri Jehová ri qa-Dios.

³¹Y xojel-pe chiri' rik'in ri raqen-ya' Ahavá chupan ri q'ij kablajuj richin ri nabey ik' chire ri juna', richin xojbe pa Jerusalem. Ri ruq'a' ri Jehová ri qa-Dios k'o k'a pa qawi', y xojrukol pa kiq'a' ri eleq'oma' ri ye'el-pe pa taq bey y chuqa' ri e etzelanel qichin.

³²Y xojapon k'a pa Jerusalem, y xojuxlan k'a oxi' q'ij.

³³Chupan ri rukaj q'ij, xetex chik k'a ri saqipueq, ri q'anapueq y ri samajibel, chupan ri rachoch ri Jehová ri qa-Dios. Xqajech k'a pa ruq'a' ri sacerdote Meremot ruk'ajol ri Urías, y rik'in rija' k'o k'a ri Eleazar ruk'ajol ri Finees, y chuqa' ka'i' levita: Ri Jozabad ruk'ajol ri Josué, y ri Noadías ruk'ajol ri Binuy.

³⁴Chupan k'a ri q'ij ri' xetex y xajlex, y ronojel xqajech kan, y ronojel xtz'ibex k'a kan.

³⁵K'ari' qonojel ri oj uk'uan-el xojtzolin pa Jerusalem, xqasuj chikop richin niporox chire ri qa-Dios. Y xqasuj kablajuj nima-alaji' achija' taq wákix, jumuch' waqlajuj achija' taq karne'l, oxk'al wuqlajuj alaji' achija' taq karne'l y kablajuj achija' tzuntzun richin nikuyutej qamak. Ronojel re' xeporox richin xqasuj chire ri Jehová.

³⁶Y xkijech k'a ri pixa' ri ruya'on-pe ri rey chiqe, y xkijech chike ri aj-raqen y chike ri yeq'aton-tzij pa ruwi' ri ruwach'ulew ri k'o pa qajbel-q'ij chire ri raqen-ya' Éufrates. Y rije' kan xeto'on qik'in y rik'in ri rachoch ri Dios.