Read Kaqchikel Esd 9 Bible Online

Esd 9 - Kaqchikel bible

Esd 9

¹Toq k'achojineq chik k'a ronojel re', ri tata'al xepe wik'in y xkibij chuwe: Ri e sacerdote, ri e levita y ri ch'aqa' chik qawinaq man kich'aron ta k'a ki' kik'in ri winaqi' aj-Canaán, ri hitita, ri ferezeo, ri jebuseo, ri amonita, ri moabita, ri egipcio y ri winaqi' amorreo. Y chuqa' kan nikiben ri itzel kibanobal rije'.

²Rije' kan e k'ulan kik'in ri kimi'al re winaqi' re', y keri' chuqa' ri kik'ajol, y kan xkixol-pe-ki' qik'in roj, ri kan oj ch'aron. Y pa ruwi' re' ja ri e tata'al y ri e aj-raqen pa kiwi' ri qatinamit, ja rije' ri e nabey ri xebanon re mak re', xecha'.

³Toq xinwak'axaj re', xinretz ri nutziaq chuwij y xinretz ri ko'ol raqen tzieq ri nuq'un, y chuqa' xink'uq ri rusumal-nuwi' y ri rusumal-nuchi', y rik'in janila bis xitz'uye'.

⁴Y xejel k'a pe wik'in konojel ri kan qitzij nikitzeqelibej ri ruch'abel ri qa-Dios, roma ri kimak ri xkiben ri xetzolin pa Jerusalem. Jak'a yin kan chiri' xik'oje-wi roma bis, k'a toq xapon na ri tiqaq'ij richin nisuj ri kamelabel.

⁵Chupan ri ramaj ri' k'ari' xiyakatej-q'anej chupan ri poqonal ri ink'o-wi, y toq xinretz yan ri nutziaq ri nuq'un, xixuke-qa, y xinyek nuq'a' chikaj chuwech ri Jehová ri nu-Dios.

⁶Y xinbij: ¡Nu-Dios yin! Kan janila in k'ixbitajineq, y chuqa' kan janila xkiqasaj nuq'ij, y man yitikir ta ninyek-q'anej ri nuwech chawech, nu-Dios yin, roma ri itzel taq qabanobal kan janila k'iy y xapon yan k'a chikaj.

⁷Chupan k'a ri q'ij ri' toq k'a e k'es na ri qate-qatata', k'a re wakami, kan ojk'o pe chupan ri mak. Y roj, ri qa-rey y ri e qa-sacerdote kan xojach pa kiq'a' ri rey ri kichin ch'aqa' chik ruwach'ulew roma ri itzel taq qabanobal roj. Ri nuwinaq kan xejach pa kamik rik'in espada, pa ximonri'il y pa kiq'a' eleq'oma'; y pa k'ixbilal ri ojk'o-wi k'a re wakami.

⁸Y re wakami pa jun ti ramaj, xak'ut chiqawech ri ajoyowanik rat Jehová ri at qa-Dios, richin xaben chi xojtotej kan jun molaj. Chuqa' xojaya' pa jun k'ojelibel jikil wawe' chupan ri awachoch richin yojk'oje-qa chupan re ruwach'ulew re'. Rat xaben chiqe richin yojtzu'un richin k'o kikoten qik'in, y kan xaya' uxlanen chiqe toq roj ojk'o pa ilinri'il.

⁹Stape' roj kan oj samajela' ri oj ximil pa samaj, stape' ojk'o chupan ri ilinri'il, rat man xojamalij ta kan. Xa kan xaya' k'a joyowanik chiqe chikiwech ri rey richin Persia. Y roma ri' xaya' kuqubabel-k'u'x qik'in richin niqapaba' chik q'anej ri awachoch. Y chuqa' niqayek chik q'anej ri e wulutajineq kan, y xojachajij wawe' pa Jerusalem y chupan ronojel ruwach'ulew richin Judá.

¹⁰Jak'a re wakami, qatata' Dios, ¿achike ta k'a yojtikir niqabij chawe wakami chirij ronojel re'? Roma roj kan qamalin kan ri apixa',

¹¹ri xaya' chike ri qati't-qamama' koma ri asamajela' ri e q'alajirisey ri ach'abel rat. Xabij k'a: Ri ruwach'ulew ri akuchi yixok-wi y ri kan nibe'ok iwichin; re ruwach'ulew re' kan man ch'ajch'oj ta roma ri kimak ri winaqi' ri ek'o wawe'. Roma kan ye'ajin chubanik ri man niqa' ta chinuwech, y kan kinojisan chik ronojel ruk'ulba't ri ruwach'ulew rik'in ri kimak.

¹²Roma ri' man tiya' ri imi'al chike ri kik'ajol rije' richin yek'ule', ni man tiya' ri ik'ajol chike ri kimi'al rije' richin yek'ule'. Chuqa' man tijikiba' itzij kik'in rije' richin ye'ito'. Wi xtinimaj nutzij, rix kan xtik'oje' iwuchuq'a', y xtitej ri ruwech ri che' richin re ruwach'ulew re' y kan xtikichinaj kan ri iwalk'ual rix, richin jantape', xabij chike ojer.

¹³Chirij ronojel re xqaqa pa qawi', roma ri itzel taq qabanobal y roma ri nima'q taq qamak, stape' rat qa-Dios man aya'on ta ri rutojbalil ri qamak ri ruk'amon, y xaya' kan jun molaj chiqe, y ja roj ri'.

¹⁴Man ruk'amon ta chi chaq niqaq'ej ruwi' ri apixa' y man ruk'amon ta richin yojk'ule' kik'in ri winaqi' ri' ri nikiben ri man niqa' ta chawech rat. Wi niqaben keri', rat kan janila xtipe awoyowal chiqe, y kan xqojak'is.

¹⁵Jehová, ri qa-Dios, rat kan janila at choj qik'in, roma xojaya' kan jun q'ataj. Y roj kan qitzij na wi k'o qamak chawech rat, y roma ri' kan man yojtikir ta yojk'oje' chawech, xicha'.