Read Kaqchikel Neh 1 Bible Online

Neh 1 - Kaqchikel bible

Neh 1

¹Yin in Nehemías in ruk'ajol kan ri Hacalías. Yin ink'o k'a ri pa tinamit Susa, ri nimalej tinamit ri ruk'u'x ri ruwach'ulew rubini'an Persia; y re' xbanatej chupan ri ik' Quisleu toq k'o yan juwineq juna' niq'aton-tzij ri Artajerjes pa ruwi' ri ruwach'ulew Persia.

²Jari' k'a toq xoqaqa ri Hananí, jun chike ri wach'alal, e rachibilan-pe ka'i-oxi' achi'a' aj chila' pa Judá. Y yin xink'utuj k'a chike chirij ri Jerusalem, y chikij ri winaqi' ri ek'o chiri' ri man xek'amer ta pe pa ruwach'ulew Babilonia.

³Rije' xkibij k'a chuwe: Ri qawinaq ri ek'o kan chupan ri qaruwach'ulew nikiq'axaj jun nimalej ruk'ayewal y k'ixbilal. Y ri tinamit Jerusalem k'a ja na rubanon, ek'o ram richin ri tz'aq e wulatejineq chiri' y ri ruchi' ri tinamit e k'atineq, xecha' chuwe.

⁴Toq xinwak'axaj k'a re ch'abel re' xitz'uye' k'a qa y xinoq'. Kan xinchajij k'a ri nubis y k'o k'iy q'ij ri man xiwa' ta, y xich'on k'a rik'in ri aj-chikajil Dios.

⁵Y xinbij k'a chire: Nink'utuj utzil chawe Jehová, Dios ri rajaw ri kaj, ri k'o janila awuchuq'a', y naben chiqe chi niqamey ronojel ri naben y kan k'o akiy. Y chuqa' kan man namestaj ta ri atzij ri xajikiba', y najoyowaj k'a kiwech ri ye'ajowan awichin y ri nikitaqej ri apixa';

⁶kan tatzu' k'a pe y tawak'axaj ri nuch'owen ri ninben yin ri asamajel ri yuqul pa samaj awik'in, ri nuk'utunik ri ninben chawech chi paq'ij chi chaq'a'. Ri ninben pa qawi' roj ri oj asamajela' ri oj yuqul pa samaj awik'in, kan ninq'alajirisaj k'a ri qamak ri xqaben chawech rat; kan jajun yin y ri aj pa rachoch kan ri nata', kan xojmakun chawech.

⁷Kan xik'o ruwi' ri itzel xeqaben chawech rat, man qataqen ta ronojel ri apixa' ri xajech pa ruq'a' ri Moisés ri asamajel, richin xuya' chiqe roj.

⁸Toqaqa k'a chi'ak'u'x ri ach'abel ri abin kan chire ri Moisés, toq xabij: Wi rix man xkininimaj ta, yin kan xkixintaluj-el pa ch'aqa' chik tinamit chuwech ri ruwach'ulew.

⁹Jak'a wi rik'in ronojel iwánima nitzolej-pe ik'u'x wik'in, y nitaqej ri nupixa' y kan niben, stape' ta k'a pa ruk'isibel chire ri ruwach'ulew ix nutalun-wi-el, k'a chiri' xkixinwelesaj-wi-pe richin yixink'uaj chupan ri ruwach'ulew ri nucha'on, ri akuchi utz chi niya'ox-wi nuq'ij, keri' ri abin kan chire rija'.

¹⁰Y ri xaben kik'in ri qate-qatata' chi xe'akol rik'in ri nimalej y janila awuchuq'a', keri' tabana' qik'in roj ri atinamit.

¹¹Roma ri' nink'utuj k'a chawe Jehová Dios, kan xtaya' ta ri axikin chire ri nuch'owen y ri kik'utunik ri ch'aqa' chik asamajela', roma rije' nikajo' nikiya' ri aq'ij-ak'ojlen rat; tabana' chire ri rey ri k'o pa ruwi' ri ruwach'ulew Persia chi xtiq'ax ta chuwech ri ch'abel ri xtinbij chire y kan utz ta k'a xtel ronojel chinuwech, xicha' chire ri Dios.